Gotô Midori

Wikipedia (chū-iû ê pek-kho-choân-su) beh kā lí kóng...

Gotô Midori (Ji̍t-gí: 五嶋 みどり; 1971 nî 10 goe̍h 25—), Bí-kok-chek ê Ji̍t-pún bai-ó͘-lín-ka, chhut-sì tī Tāi-pán.

I ê a-bú tī Midori 2 hoè sî hoat-kiàn i ē-hiáu hm kúi-ā-kang chêng thiaⁿ--koè ê Bach me-ló͘-tih, tō khai-sí kà i e khîm. 6 hoè thâu-pái kong-ián, chàu Paganini ê 24 Siú Kî-sióng-khek. 1982 nî bó-kiáⁿ poaⁿ-chhù khì tī New York, tī hia pài chhut-miâ ê bai-ó͘-lín sin-seⁿ Dorothy DeLay chò su-hū. Kāng hit nî i hām Zubin Mehta chí-hui ê New York Ài-ga̍k tàu-tīn kong-ián. Midori āu--lâi kap Mehta saⁿ-kap ūi Sony Classical lio̍k chiâⁿ chē tiuⁿ CD. 1985 nî sī i ê seng-gâi ê 1 ê lō͘-chām-pi. I hit-nî tī Tanglewood ê ián-chhut taⁿ í-keng sī thoân-kî. I m̄-taⁿ e tn̄g 2 ki khîm ê E hiân, chí-hui Leonard Bernstein koh kám-tōng kah kūi toà i bīn-thâu-chêng. Keh-tńg-ji̍t ê New York Sî-pò thâu-ia̍h toā pò chit-chân tāi-chì.