Hô-chhoan
Wikipedia (chū-iû ê pek-kho-choân-su) beh kā lí kóng...
Hô-chhoan ia̍h hô-liû, sī lio̍k-tē-siōng ê chúi-liû, ē lâu-ji̍p tōa-hái, ô͘-po̍h, ia̍h-sī pa̍t-ê hô-chhoan, ū-sî mā-ē lâu-ji̍p tē-hā, ia̍h-sī ta-khó.
[siu-kái] Hô-chhoan ê miâ
Tī Hàn-gí lāi-bīn, iōng-lâi kā hô-chhoan hō-miâ ê jī ū "chúi" (水), "kang" (江), "hô" (河), "chhoan" (川), "khe" (溪) téng-téng. Kî-tiong, "kang" sī kó͘-chá Tn̂g-kang ê miâ; "hô" sī kó͘-chá N̂g-hô ê miâ. It-poaⁿ kóng-khí, sè-tiâu ê hô-chhoan hō-chòe "khe", m̄-koh iàu-bô it-tēng ê piau-chún.
Tī Tiong-kok Hok-kiàn, tōa-tiâu ê hô-chhoan It-poaⁿ hō-chòe "kang", chhin-chhiūⁿ Bân-kang chham Chìn-kang, sè-tiâu hō-chòe "khe", chhin-chhiūⁿ Kiàn-khe.
Tī Tâi-ôan, tōa-pō͘-hūn ê hô-chhoan lóng-sī hō-chòe "khe", chhin-chhiūⁿ Ko-pîn-khe, chió-sò͘ hō-chòe "hô", chhin-chhiūⁿ Ke-lâng-hô, Tām-chúi-hô. Tâi-ôan mā-ū chi̍t-kóa hô-chhoan hō-chòe "chhoan", chhin-chhiūⁿ Tâi-tiong ê Le̍k-chhoan, ia̍h-sī Ji̍t-pún sî-tāi ê Ko-hiông-chhoan (hiān-chāi ê Ài-hô).
