Saint Lawrence Hái-oan

Wikipedia (chū-iû ê pek-kho-choân-su) beh kā lí kóng...
Thiàu khì: Se̍h chāmchhiau-chhoē
Saint Lawrence Hái-oan

Saint Lawrence Hái-oan (Eng-gí: Gulf of Saint Lawrence, Hoat-gí: Golfe du Saint-Laurent) sī choân sè-kài thōng toā ê hái-kháu. Pak Bí-chiu Gō͘-toā-ô͘ ê chúi keng-kòe Saint Lawrence Hô liáu, ùi chia lâu khì Tāi-se-iûⁿ.

Saint Lawrence Hô ùi 2-tiâu chúi-lō· lâu ji̍p-khì Saint Lawrence Hái-oan, chi̍t-tiâu sī Québec ê Côte-Nord tē-khu kap Anticosti Tó pak hoāⁿ tiong-kan ê Jacques Cartier Hái-kiap, lēng-goā chi̍t-tiâu sī Anticosti Tó lâm hoāⁿ kap Gaspé Poàn-tó tiong-ng ê Honguedo Hái-kiap.

Hái-oan sì-kho·-liàn-tńg chha-put-to lóng hō͘ thó͘-tē ûi--khí-lâi. I pak-pêng ū Labrador Poàn-tó, tang-pêng ū Newfoundland, lâm-pêng ū Nova Scotia (iû-kî sī Breton Hái-phīⁿ Tó), sai-pêng ū Gaspé Poàn-tó kap New Brunswick. Hái-oan lāi-té ū Anticosti Tó, Edward Ông-chú Tó kap Madeleine Kûn-tó.

Tî-khì Saint Lawrence Hô, kî-thaⁿ lâu ji̍p Saint Lawrence Hái-oan khah toā ê khe-hô iah-koh ū Miramichi Hô, Natashquan Hô, Restigouche Hô, Margaree Hô kap Humber Hô.

Breton Hái-phīⁿ Tó tang-pak-pêng ê St. Paul Tó in-ūi bat hoat-seng kòe chin chē hái-lān, ū "Hái-oan ê Bōng-á-po͘" ê thé-hō. Gaspé Poàn-tó tang-pêng ê Bonaventure Tó hām Madeleine Kûn-tó tang-pak-pêng ê Brion Tó kap Rochers-aux-Oiseaux sī hō͘ chhian-soá chiáu-á am-âⁿ ê tiōng-iàu ê só͘-chāi.