Sap-bûn

Wikipedia (chū-iû ê pek-kho-choân-su) beh kā lí kóng...

Sap-bûn sī chi̍t-ê lūi-hêng ê chheng-kiat-che, iōng chí-hông-sng chham kalium (K) ia̍h natrium (Na) ê iông-lī-chú hóan-èng chè-chō, sī hòa-ha̍k-siōng ê iâm-lūi.

Sap-bûn chheng-kiat ê gôan-lí sī lī-iōng iông-lī-chú ê chhin-chúi-sèng chham chí-hông-sng ê iàm-chúi-sèng, chi̍t-hong-bīn chham a-cha-mi̍h khan-liân, chi̍t-hong-bīn chham chúi-hun-chú khan-liân, liáu-āu kā a-cha khan lī-khui mi̍h-kiāⁿ ê piáu-bīn.

[siu-kái] Gí-gôan

Bân-lâm-gí "sap-bûn" chi̍t-ê bêng-sû sī ùi Au-chiu thôan-ji̍p, Hàn-jī ē-tàng siá-chòe "雪文", Pe̍h-oē-jī mā peng-chòe "sat-bûn" ia̍h "soat-bûn".

Tī chi̍t-kóa só͘-chāi, sap-bûn chi̍t-khóan mi̍h-kiāⁿ hō-chòe "tê-kho͘" (茶箍), che-sī in-ūi kó͘-chá-sî lī-iōng tê-kho͘, iā-chiū-sī chè-chō tê-iû chhun-lo̍h ê chân-che lâi chheng-kiat seng-khu, chheng-kiat mi̍h-kiāⁿ.

Mā ū chi̍t-kóa só͘-chāi kóng "hoan-kiⁿ" (番梘).