Pang-chān:中央山脈

中央山脈

臺灣南部兮中央山龍衛星相片。（1998年11月翕）

中央山龍是臺灣五个大山龍內底兮一个，上北到佇宜蘭縣蘇澳兮東澳嶺，上南來到臺灣尾梢兮鵝鑾鼻。

中央山龍窮實較偏佇臺灣島兮東爿，對北佮南攏總有340公里遐長，若東西闊面是差不多80公里，佇島嶼頂懸兮行向是北北東到南南西，伊嘛是臺灣上長兮山龍，有「臺灣曲脊」兮體號，嘛因為按呢閣予人號做中脊山龍（華語：脊樑山脈）。

一般講兮中脊山龍是狹義兮中央山龍，若廣義兮中央山龍，就愛共「中脊山龍」、「雪山山龍」（華語：雪山山脈）佮「玉山山龍」（華語：玉山山脈）攏算在內，嘛有儂共廣義兮中央山龍叫做「中央山地」來區分狹義佮廣義兮中央山龍。

中央山龍共臺灣島分做登爿佮西爿無對陣兮兩部份，東爿較細个、較坎坷，西爿較闊，嘛較平坦，中央山龍原仔是台灣島逐个水系兮本水。

中央山龍兮懸山相紲，台灣100山母（華語：臺灣百岳）就有誠濟是屬佇中央山龍，比論講：秀姑巒山（3825公尺）、南湖大山（3742公尺）、合歡山（3714公尺）、中央尖山（3705公尺）、關山（3668公尺）、奇萊山北嶺頭（3607公尺）、向陽山（3602公尺）、奇萊主山（3560公尺）、三叉山（3496公尺）、丹大山（3325公尺）、能高山（3262公尺）。

照統計來看，中央山龍內底兮「臺灣100山母」攏總有69粒，若超過3,000公尺兮懸山，嘛有181粒，這个數字是「臺灣五个大山龍」內底徛頭名兮。