Wikipedia (chū-iû ê pek-kho-choân-su) beh kā lí kóng...
 |
Chit phiⁿ bûn-chiuⁿ ū Pe̍h-ōe-jī ê pán-pún. Chham-khó chit phiⁿ bûn-chiuⁿ ê Pe̍h-ōe-jī pán-pún. |
羅漢跤(仔)(羅漢腳(仔))本底是臺灣清朝時代無厝無某,嘛毋是讀冊人、農民、工人、生理人佮擔工的男性遊民,落尾閣有獨身中年查埔的意思。
臺灣一般的宮廟,巷路兩爿的壁多數有畫十八羅漢圖。遊民定定倚靠佇彼號壁的跤,遮風、覕雨、歇睏抑是嘻嘻嘩嘩。
另外的講法是,遊民散赤,時常穿破鞋,甚至褪赤跤,親像佛教的苦行頭陀(梵文:Dhata)佮羅漢,所以有羅漢跤這个耍笑的稱呼。
清朝時代前期,移民到臺灣的限制足嚴。1684年設立臺灣縣過後,發布渡臺禁令。移民臺灣進前,愛先予臺廈兵備道、臺灣海防同知審查佮批准。而且渡臺者袂當𤆬厝內人,廣東人嘛袂使到臺灣,致到臺灣人口中,客人較少。
因為禁令,紲落去欲一世紀,移民無法度𤆬家眷,女性不止仔乏,無法得娶某的「遊民」滿四界。遮的人著號做「羅漢跤仔」。
據《噶瑪蘭廳志》記載:
「臺灣一種無田宅無妻子,不士不農,不工不賈,不負載道路,俗指謂羅漢腳。嫖賭摸竊,械鬥樹旗,靡所不為。曷言乎羅漢腳也?謂其單身遊食四方,隨處結黨,褲衫不全,赤腳終生也。」[chù 1]
翻譯:「臺灣有一款無田無厝閣無某無猴,嘛毋是讀冊人、無作農民、工人、生理人抑擔工的人,俗稱是『羅漢腳』。𪜶開查某,跋筊,作賊仔,械鬥,啥物攏作會出來。是按怎叫𪜶羅漢腳?因為𪜶單身浪蕩四海,四界嚾黨,而且衫仔褲破糊糊,規世人褪赤跤。」
後來𪜶成做這馬所講的鱸鰻。