Thó-lūn:Tâi-oân bûn-ha̍k
(Tùi 臺灣文學 choán--lâi)
臺灣文學[kái goân-sí-bé]
臺灣文學的發祖一般是講佇日本殖民的1920年代的臺灣新文學運動，這个運動的性質和傳統的舊文學較無相仝，對日本時代新文學運動開始，臺灣的作家就一直共怹建立起來的文學號做臺灣文學。
後來因為政治環境，特別是國民政府統治臺灣了後，臺灣文學這个名詞就一直有爭議，親像1970年代的鄉土文學盤話的時，就有人厚操煩，講鄉土文學佮分離主義相黏蒂帶，嘛有人講鄉土文學佮中國共產黨統一之下的文學穿仝領褲，是工農兵文藝，嘛閣有人刁持共鬱拗，號做"邊疆文學"。
一直到1980年代起初，臺灣的作家總算是成功共臺灣文學爭取著地位，公開提倡佇臺灣產生的文學就是臺灣文學，一來二去，見若認同臺灣的人，用臺灣人的觀點，來寫出疼痛臺灣，佮臺灣有關係的文學作品，攏會使叫做臺灣文學。
若看臺灣文學使用的文字，有漢字文言文，河佬、日本佮華語等等，有的寫漢字，有的用羅馬字，sam-téng-jī-hō，算是臺灣文學的特色。
若對歷史來看，臺灣文學是較晏發祖的文學，佮先進國家比起來，毋但比日本慢起行真濟，甚至嘛比中國五四運動的新文學較慢幾若冬，因為臺灣文學發祖較晏，所以自然就繼承其他文學的性質佮成績，歐洲佮美洲文學對伊有影響，日本佮中國文學嘛對伊有真濟影響。
日本時代，賴和共臺灣文學號做"世界主義下跤的臺灣新文學"，若這个時代的作家鍾肇政（客語: Chûng Seu-chṳn）是講："臺灣文學是臺灣本土的文學，是臺灣人的文學，是世界文學的一支"。