Chhim-hòa-cho͘ sū-kiāⁿ

Chhim-hòa-cho͘ sū-kiāⁿ (深化組事件 / 심화조사건) sī 1997 nî chì 2000 nî hoat-seng tī Pak-hân kok-lāi ê chi̍t tiûⁿ tōa kui-bô͘ ê siok-chheng ūn-tōng. Chit-pái ê sū-kiāⁿ chêng-āu 4 tang, iû hit-tang-chūn ê kok-ka chòe-ko léng-tō-jîn Kim Chèng-ji̍t hoat-khí, Tiâu-sián Lô-tōng-tóng hêng-chèng-pō͘ pō͘-tiúⁿ Tiuⁿ Sêng-te̍k hū-chek, Siā-hōe An-choân-pō͘ chip-hêng. Tī hit-kúi-nî nî-kan, pī bû-hām chò kàn-tia̍p ê jîn-sò͘ ū 2-bān 5-chheng gōa lâng, kî-tiong pau-hâm chē-chē pêng-bîn kap chèng-hú ko-kàn. Chia-ê lâng ū kúi-chheng ê pī chhú-koat, chhun-ê tiō tâu-ji̍p kiông-chè siu-iông-só͘. Chit-chhù ê sū-kiāⁿ lo̍h-bóe ín-khí tio̍h Pak-hân jîn-bîn ê put-boán chêng-sū, Kim Chèng-ji̍t chiah tī 2000 nî soan-pò͘ tiong-chí siok-chheng, chhú-sí sū-kiāⁿ tiong ê kúi-nā ê chip-hêng-chiá liáu-āu, sat-lio̍k chiah chèng-sek kiat-sok. Chhim-hòa-cho͘ sū-kiāⁿ hō͘ lâng hō-chò sī Pak-hân ê McCarthy-chú-gī.