Emma Thompson
| Emma Thompson | |||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|
 2025 nî | |||||||||||||||||||
| Gē-jîn he̍k gē-su̍t-ka | |||||||||||||||||||
| Kok-che̍k |  Eng-kok | ||||||||||||||||||
| Chhut-sì | 1959 nî 4 goe̍h 15 ji̍t (67 hòe) | ||||||||||||||||||
| Chit-gia̍p | Ián-oân, phian-kio̍k-ka, chok-ka | ||||||||||||||||||
| Ang-bó͘ | Kenneth Branagh (1989–1997, lī-hun) Greg Wise (2003–) | ||||||||||||||||||
| Kiáⁿ-jî | 2 | ||||||||||||||||||
| Pē-bú | Eric Thompson (1929–1982) Phyllida Law (1932–) | ||||||||||||||||||
| IMDb chu-sìn ia̍h-bīn | |||||||||||||||||||
Chióng-hāng
| |||||||||||||||||||
Dame Emma Thompson (1959 nî 4 goe̍h 15 ji̍t chhut-sì kàu-taⁿ), sī Eng-kok ê lú-ián-oân kah kio̍k-chok-ka, tī Lûn-tun Paddington chhut-sì. I ê iáⁿ-toâⁿ kah bú-tâi seng-gâi í-keng ū sì-cha̍p gōa tang, chóng-kiōng tit-tio̍h nn̄g ki Ò-sū-khah-chióng, saⁿ ki Eng-kok Tiān-iáⁿ Ha̍k-īⁿ-chióng, nn̄g ki Kim-kiû-chióng, kah chi̍t ki Ài-bí-chióng; lēng-gōa koh ū gō͘ pái Ò-sū-khah-chióng, káu pái Kim-kiû-chióng, chhit pái BAFTA kah la̍k pái Ài-bí-chióng ê thê-miâ. Thompson sī le̍k-sú-siōng î-it the̍h-tio̍h Ò-sū-khah Chòe-ka Phian-kio̍k-chióng ê Ò-sū-khah iáⁿ-hiō; mā tī Kim-kiû-chióng tit-tio̍h Chòe-ka Kio̍k-pún kah Chòe-ka Lú-chú-kak, sī iáⁿ-toâⁿ chin hán-tit ū ê ián-ki-phài lú-phian-kio̍k-ka. 2018 nî, i in-ūi tùi hì-kio̍k ê kòng-hiàn, tit-tio̍h Elizabeth Jī-sè lú-ông kā hong chòe DBE.
1992 nî, i in-ūi Howards End the̍h-tio̍h tē 65 kài Ò-sū-khah-chióng Chòe-ka Lú-chú-kak, BAFTA Chòe-ka Lú-chú-kak, kah Kim-kiû Chhiong-chiòng Kio̍k-chêng-lūi Tiān-iáⁿ Chòe-ka Lú-chú-kak-chióng téng-téng. Āu-lâi kúi nî, i koh hông thê-miâ Ò-sū-khah-chióng, pau-koat in-ūi The Remains of the Day kah In the Name of the Father kâng chi̍t-nî hông thê-miâ Chòe-ka Lú-chú-kak kah Chòe-ka Lú-phoè-kak, sī le̍k-sú-siōng kâng nî-tō͘ tit-tio̍h Ò-sū-khah-chióng nn̄g-hāng thê-miâ piáu-ián chióng-hāng ê ián-oân chi-it. I tē-it pái tam-jīm chú-kak sī tī 1989 nî ê hí-kio̍k tiān-iáⁿ The Tall Guy. 1995 nî, i tam-jīm tiān-iáⁿ Sense and Sensibility ê phian-kio̍k kiam lú-chú-kak, koh chi̍t-pái nn̄g-hāng ji̍p-ûi, tit-tio̍h tē 67 kài Ò-sū-khah Chòe-ka Kái-phian Kio̍k-pún kah BAFTA Chòe-ka Lú-chú-kak téng-téng chióng-hāng.
Kî-thaⁿ chhut-miâ ê ián-chhut pau-koat Love Actually (2003 nî), Stranger than Fiction (2006 nî), An Education (2009 nî), Saving Mr. Banks (2013 nî), Late Night (2019), Cruella (2021 nî), Good Luck to You, Leo Grande (2022 nî) kah Matilda the Musical (2022 nî) téng-téng; i mā tī 2004 nî kàu 2011 nî chi-kan chham-ka Harry Potter tiān-iáⁿ hē-lia̍t, poaⁿ chiam-pok-ha̍k kàu-siū Sybill Trelawney. Tiān-sī hong-bīn, tāi-piáu chok-phín pau-koat Wit (2001 nî), Angels in America (2003 nî), kah Years and Years (2019 nî) téng-téng. Tī Peter Rabbit chhut-pán-siā ê siū-koân chi-hā, Thompson lēng-gōa siá-kè saⁿ pún Peter Rabbit hē-lia̍t ê gín-á-chheh.
Seng-gâi
[siu-kái | kái goân-sí-bé]Chhut-sin kah ka-têng pōe-kéng
[siu-kái | kái goân-sí-bé]
1959 nî, Emma Thompson chhut-sì tī Lûn-tun ê Paddington khu, choân-ke tòa tī Lûn-tun pak-pō͘ ê West Hampstead; tiong-ha̍k tha̍k Camden Lú-chú Ha̍k-hāu. Lāu-pē Eric Thompson mā sī ián-oân (Old Vic kio̍k-thoân thoân-oân), ài siá-chok, siōng chhut-miâ ê chok-phín sī jî-tông tiān-sī-kio̍k The Magic Roundabout, chit-ê chiat-bo̍k tī 1960–1970 nî chi-kan tī BBC hòng-sàng. I ê lāu-pē tī Emma cha̍p-gōa hè ê sî tiòng-hong, tī i 23 hòe ê sî in-ūi hì-sng-that kè-sin[1]. I ê lāu-bú Phyllida Law sī Sū-kat-lân ián-oân; sió-bē Sophie Thompson mā sī ián-oân. Emma sè-hàn ê sî ka-kéng sàn-chhiah, khò pē-bú piàⁿ-miā sì-kè chiap ián-chhut î-chhî ka-kè; tī Emma 15 hòe chìn-chêng tōa pō͘-hūn ê gín-á sî-kî lóng tiàm Sū-kat-lân, i bat piáu-sī “Sū-kat-lân sī choân-sè-kài siōng súi ê só͘-chāi”[2].
1977 nî, i ji̍p Kiàm-kiô Tāi-ha̍k Eng-bûn-hē tha̍k-chheh. Kiû-ha̍k sî-kî, Emma tùi gú-giân kah bûn-ha̍k tek-pia̍t ū hèng-chhù, i pún-sin piáu-sī sī siū-tio̍h lāu-pē ê éng-hióng. Āu-lâi tha̍k The Madwoman in the Attic téng chheh, khai-sí tùi lú-sèng chú-gī ê gī-tê sán-seng chin chhim ê hèng-chhù. Emma goân-pún siūⁿ-beh chòe chok-ka, m̄-koh āu-lâi in-ūi him-sióng ōe-tàng chū-pian chū-ián ê hí-kio̍k ián-oân Lily Tomlin[3], koh ka-kī thian-seng ê hoa̍t-phoah sèng-keh, tō kā “hí-kio̍k ián-oân” tòng-chòe ka-kī ê bo̍k-phiau. Chit tōaⁿ sî-kî tùi Thompson mā chin ū khé-hoat-sèng: Eng-kok ê ti-miâ ián-oân Hugh Laurie āu-lâi chiap-siū chhái-hóng sî piáu-sī, hit-tng-sî ta̍k-ke tī ha̍k-hāu lóng kā Thompson kiò-chòe “Emma Talented”[4]. Thompson mā chham-ka ha̍k-hāu ū-miâ ê hì-kio̍k siā-thoân Footlights, tam-jīm hù-chú-sek[5]; hiān-tāi ti-miâ ê gē-jîn Stephen Fry kah Hugh Laurie téng lâng hit-tong-sî mā chham-ka chit-ê siā-thoân. Thompson tē-it pái chiūⁿ-tâi ián-chhut Aladdin ê kak-sek. I mā sī thâu-chi̍t-ê cha-bó͘ khau-sóe kio̍k-thoân WOMAN'S HOUR ê hoat-khí-jîn chi-it. Āu-lâi i piáu-sī, hit-tong-sî i ta̍k-kang sin-khu-piⁿ lóng ū chi̍t-tīn chhòng-ì boán-boán ê lâng, tùi chiâⁿ-chòe chi̍t-ê ián-oân kám-kak sī chin chū-jiân ê hoat-tián. 1980 nî 2 ge̍h, i ka-kī chè-chō, chū-tō chū-ián Kiàm-kiô Tāi-ha̍k tē-it chhut choân-pō͘ sī lú-sèng ián-chhut ê sî-sū khau-sóe kio̍k.
Chit-gia̍p seng-gâi
[siu-kái | kái goân-sí-bé].jpg)
Khí-pō͘ kai-toāⁿ
[siu-kái | kái goân-sí-bé]1982 nî, Thompson tī Kiàm-kiô Tāi-ha̍k pit-gia̍p, khai-sí tī Eng-kok sûn-ián bú-tâi-kio̍k kah im-ga̍k-kio̍k, mā chham-ka kio̍k-pún ê phian-siá kang-chok. Tī West End ê im-ga̍k-kio̍k Me and My Girl tit-tio̍h ko-ko ê phêng-kè, chiah sûn-hôe Ài-teng-pó kah Eng-kok kok-tē. Kāng chi̍t-tang-á, i ián-chhut kúi chhut tiān-sī hí-kio̍k, ná There's Nothing to Worry About! téng, hí-kio̍k piáu-hiān ín-khí chù-ì. 1987 nî i chham-ián ê BBC tiān-sī-kio̍k Fortunes of War mā ū hó phêng-kè. Chá-kî ián-chhut iā pau-hâm 1983 kah 1984 nî pò-ián ê tiān-sī-kio̍k Alfresco téng. I tī ián-oân seng-gâi ê thâu-chi̍t-pái tōa tu̍t-phò piáu-hiān, sī tī 1987 nî ê tiān-sī-kio̍k Tutti Frutti pān âng-mn̂g ê ki-tah-chhiú Suzi Kettles ê sî; mā in-ūi chit-chhut hì kah Fortunes of War tit-tio̍h BAFTA tiān-sī-lūi Chòe-ka Lú-chú-kak chióng. 1988 nî, i koh khoà chú-chhî tiān-sī hí-kio̍k chiat-bo̍k Thompson. Keh-tang-á, i tī Shakespeare ê bú-tâi-kio̍k King Lear ê ián-chhut hō͘ Chicago Tribune phêng-kè sī “piáu-hiān chhut-lūi-pa̍t-chuì”[6]. Chit tōaⁿ sî-kî ê Thompson, sī í kio̍k-tiûⁿ kah sió-phêng-bo̍k siang-chê chò chú.
Tiāⁿ-tio̍h tē-ūi
[siu-kái | kái goân-sí-bé]Thompson tē-it pái tam-jīm chú-kak sī tī 1990 nî siōng-ián, Richard Curtis chip-tō ê hí-kio̍k ài-chêng tiān-iáⁿ The Tall Guy. 1992 nî, i tī tiān-iáⁿ Howards End ê ián-chhut tit-tio̍h siōng-hó phêng-kè, hō͘ i ê ián-oân seng-gâi tōa-tōa kái-piàn, mā in-ūi án-ne the̍h-tio̍h Ò-sū-khah Siōng-hó Cha-bó͘ Chú-kak chióng. Tī 2013 nî 11 goe̍h BAFTA ûi i chú-pān ê chō-tâm-hōe (A Life In Pictures) ni̍h, Thompson piáu-sī “góa ài chit-ê jîn-bu̍t, góa siūⁿ-beh chhut-ián i.” 1993 nî siōng-ián ê In the Name of the Father lāi-té, i pān Guildford 4-lâng àn ê piān-hō͘ lu̍t-su Gareth Peirce, tit-tio̍h Ò-sū-khah Chòe-ka Lú-phoè-kak kah Kim-kiû Siōng-hó Tiān-iáⁿ Cha-bó͘ Phoè-kak ê thê-miâ. Thompson mā tī kâng chi̍t tang siōng-ián ê The Remains of the Day kah iáⁿ-tè Anthony Hopkins tâng-tâi ián-chhut, in-ūi chit nn̄g-chhut hì, i kâng-nî tit-tio̍h Ò-sū-khah Chòe-ka Lú-chú-kak kah Chòe-ka Lú-phoè-kak chióng ê thê-miâ. 1995 nî, Thompson tī Carrington (film) pān Eng-kok ê oē-ka Dora Carrington, tit-tio̍h Kok-ka Phêng-lūn Hia̍p-hōe Chòe-ka Lú-chú-kak chióng.
Tiān-iáⁿ phian-kio̍k
[siu-kái | kái goân-sí-bé]Chá tī 1989 nî, Bí-kok ê Mirage Enterprises chiū khai-sí chún-pī kā keng-tián bûn-ha̍k sió-soat Sense and Sensibility kái-phian chò tâng-miâ ê chin-lâng-pán tiān-iáⁿ Sense and Sensibility; sin jīm ê chè-phiàn Lindsay Doran khòaⁿ Thompson só͘ siá ê hí-kio̍k sió-phín chiat-bo̍k liáu-āu, jīn-ûi Thompson ê pit-tiāu kah i só͘ su-iàu ê chi̍t-tì, chiū iau-chhiáⁿ Thompson siá kio̍k-pún. M̄-koh tī 1990 nî chún-pī chho͘-kî, Thompson iáu sī chi̍t-ê miâ-siaⁿ bô tōa, iā bô chò phian-kio̍k keng-giām ê Eng-kok cha-bó͘ ián-oân, chē-chē tâu-chu-jîn khòaⁿ-tio̍h i ê mi̍h bô hó-táⁿ tâu-chu. Hó-ka-chài Columbia Pictures ê ko-chân chú-koán Amy Pascal khòaⁿ kè kio̍k-pún liáu-āu, tah-èng tam-jīm hoat-hêng-siong. Thompson chún-pī kio̍k-pún ê sî kè-kiōng hoa gō͘ tang, chhiú-siá ê chho͘-kó tō ū 300 ia̍h, āu-lâi mā in-ūi ī-sǹg téng būn-tê, koh hoa nn̄g goe̍h san-kái kio̍k-tōaⁿ. 1995 nî 2 goe̍h ê soán-kak kai-toāⁿ, pún-té chip-tō Lí Ang kah hoat-hêng-siong Columbia hi-bāng Thompson chú-chhut chú-kak, in-ūi Thompson bat í Howards End tit-tio̍h Ò-sū-khah iáⁿ-hō͘. M̄-koh tng-sî í-keng 36 hòe ê Thompson, in-ūi kio̍k-pún lāi-té ê nî-lêng siat-tēng būn-tê, hi-bāng iû Natasha Richardson lâi pān 19 hòe ê lú-chú-kak Elinor Dashwood. Lí Ang āu-lâi kā kak-sek ê nî-lêng tiâu-chéng kàu 27 hòe, chiah soeh-ho̍k Thompson[7][8]. 1995 nî bóe siōng-ián liáu-āu, Thompson tit-tio̍h Ò-sū-khah Siōng-hó Kái-phian Kio̍k-pún chióng, chiâⁿ-ûi le̍k-sú-siōng î-it the̍h-tio̍h Ò-sū-khah kim-siōng-chióng siōng-hó phian-kio̍k chióng ê Ò-sū-khah iáⁿ-hō͘; mā tē-saⁿ pái ji̍p-ûi Ò-sū-khah Chòe-ka Lú-chú-kak chióng. Thompson āu-lâi kā nn̄g chō Ò-sū-khah chióng-chō pàng tī e̍k-sek lāi, koh kā-kī sī iàⁿ-siū piáu-sī ang-lêng-tú pàng tī khah bêng-hián ê só͘-chāi; bat tī tiān-sī chiat-bo̍k QI téng piáu-sī, tng-sî kā kio̍k-pún phah ji̍p tiān-náu liáu-āu, in-ūi tiān-náu kò͘-chiong, sit-lo̍h Sense and Sensibility ê kio̍k-pún tóng-àn, siu-lí ê lâng mā bô-hoat-tō͘ ho̍k-goân chu-liāu, só͘-í i chiah kiò kè-thêng-chhia chài tiān-náu khì hó-pêng-iú Stephen Fry ê chhù, kah Hugh Laurie chò-hóe chiah chhit tiám-cheng kā kio̍k-pún ho̍k-goân[9].
1998 nî, Thompson piáu-sī kám-kak “thiám-thâu”, tî-liáu chi-chêng í-keng phah-hó ê tiān-iáⁿ siōng-ián í-gōa, chì-chió ū nn̄g tang bô chhia-iáⁿ, koh tī 1999 nî seⁿ chi̍t-ê cha-bó͘-kiáⁿ. 2000 nî í-āu, tiān-sī chok-phín pau-hâm 2001 nî thì kng thâu-khak ián-chhut ê HBO tiān-sī tiān-iáⁿ Wit, kha̍t-sî i pān ê kak-sek sī beh sí ê nn̄g-sào ài-bóe-kî pēⁿ-lâng, mā kiam tam-jīm phian-kio̍k; Thompson iā hoa kúi goe̍h ê sî-kan chún-pī kak-sek. Tio̍h-miâ tiān-iáⁿ phêng-lūn-ka Roger Ebert phêng-lūn chit-ê kak-sek: “í chi̍t chióng pó-liû chū-chun ê hong-sek khì tùi-khòng bô-chêng ê hiān-si̍t. Nā Wit sī chi̍t pō͘ kong-ián ê tiān-iáⁿ, i it-tēng ē hō͘ Emma Thompson ji̍p-ûi Ò-sū-khah; chit-chhut hì sī i seng-gâi kàu taⁿ siōng-hō͘ lâng kám-tōng ê ián-chhut.”[10] Thompson í chit-chhut hì koh ji̍p-ûi Kim-kiû, Emmy kah Bí-kok Ián-oân Kang-hōe ê lú-chú-kak kah phian-kio̍k chióng. 2003 nî, i tī tông-chì tê-châi ê tiān-sī-kio̍k Angels in America ni̍h chi̍t lâng hun-pān kúi-nā ê kak-sek, koh ji̍p-ûi Bí-kok Ián-oân Kang-hōe bî-lūi tiān-sī-kio̍k ia̍h tiān-sī tiān-iáⁿ lūi ê Chòe-ka Lú-chú-kak, kah Emmy Chòe-ka Lú-chú-kak. I tī tiān-sī-kio̍k Ellen ê ián-chhut (pān ka-kī) mā hō͘ i tī 1998 nî the̍h-tio̍h Emmy hí-kio̍k-lūi siōng-hó cha-bó͘ kheh-chhoàn ián-oân ê khéng-tēng.
Tam-jīm lio̍k-ia̍h
[siu-kái | kái goân-sí-bé]Thompson tī Wit liáu-āu ê chok-phín tōa-pō͘-hūn sī phoè-kak, piáu-ián lêng-hêk pau-hâm phoè-im kah phian-kio̍k téng; tiōng-iàu ê kè-ōe sī chū-phian chū-ián ê hē-lia̍t tiān-iáⁿ Nanny McPhee. 2004 nî í-āu, Harry Potter hē-lia̍t tiān-iáⁿ pau-hâm Harry Potter and the Prisoner of Azkaban, Harry Potter and the Order of the Phoenix lóng khòaⁿ ē tio̍h Thompson, i tī phìⁿ tiong pān bê-hó͘-hó͘ ê chiam-pok ha̍k kàu-siū Sybill Trelawney. 2006 nî, i koh í tiān-iáⁿ Stranger than Fiction ê pi-koan sîn-keng-chit chok-ka kak-sek ji̍p-ûi Siōng-hó Cha-bó͘ Phoè-kak chióng. 2012 nî, i tī hē-lia̍t tiān-iáⁿ chi-it Men in Black 3 pān “O oân”.
2013 nî, Thompson í Saving Mr. Banks ê chiⁿ-chân ián-chhut ji̍p-ûi Kim-kiû, Bí-kok Ián-oân Kang-hōe, BAFTA téng Chòe-ka Lú-chú-kak; koh tit-tio̍h Kok-ka Phêng-lūn Hia̍p-hōe Chòe-ka Lú-chú-kak. Phìⁿ tiong hō͘ lâng phêng-ûi nî-tō͘ siōng-hó ê ián-chhut chi-it, khiok bô-ū ji̍p-ûi Ò-sū-khah, hō͘ mûi-thé kah kâng-hâng ián-oân téng-téng chheng-ûi ûi-chu[11]. Thompson hoa chhiau-kè la̍k kò goe̍h ê sî-kan chún-pī P. L. Travers chit-ê kak-sek, koh piáu-sī chit-ê jîn-bu̍t kah i pêng-sî só͘ pān ê jîn-bu̍t bô-kāng: P. L. Travers sim-lāi ê chêng-kat kah i piáu-hiān chhut-lâi ê khòng-kī chi-kan ū bó͘ thêng-tō͘ ê ti̍t-tu̍t-kám; koh ka-siōng chū-lu̍t chin giâm ê P. L. Travers bô chhut-keh ê hêng-ûi thang chò chhui-siúⁿ ê sòaⁿ-soh, só͘-í sī i kàu taⁿ ián-kòe ê kak-sek lāi-té siōng-ū thiau-chiàn-sèng ê chi̍t-ê.
2013 nî liáu-āu, Thompson ê kang-chok tiōng-sim koh tńg-lâi bú-tâi, chham-ka im-ga̍k-kio̍k Sweeney Todd: The Demon Barber of Fleet Street ê sûn-ián téng. Kâng chi̍t tang, tit-tio̍h Santa Barbara Tiān-iáⁿ Chiat siúⁿ-sù i “Hiān-tāi Tāi-su Chióng” (Modern Master Award), piáu-ióng i tī hì-kio̍k lêng-hêk ê kòng-hiàn.
To-goân hoat-tián (2014 nî kàu taⁿ)
[siu-kái | kái goân-sí-bé]2014 nî 3 goe̍h, Thompson tī Niú-iok Lincoln Center ián-chhut Stephen Sondheim ê im-ga̍k-kio̍k Sweeney Todd: The Demon Barber of Fleet Street, pān Mrs Lovett; che sī i sio-keh 24 tang liáu chiah koh chiūⁿ bú-tâi, iā sī i ê Niú-iok chhó͘-ián, ián-chhut gō͘ mê, tit-tio̍h koân-koân ê phêng-kè; iā in-ūi tiān-sī pán-pún tē-la̍k pái ji̍p-ûi Emmy bî-lūi hì-kio̍k ia̍h tiān-sī tiān-iáⁿ lūi siōng-hó cha-bó͘ chú-kak[12]. Kâng nî ê pa̍t-chhut chok-phín pau-hâm i tam-jīm phian-kio̍k, kun-kù John Ruskin chin-si̍t hun-in kò͘-sū kái-phian ê sî-tāi-kio̍k Effie Gray, kah ûi Jason Reitman chip-tō ê Men, Women & Children tam-jīm pông-pe̍h. 2014 nî 8 goe̍h, Thompson chhōa i ê cha-bó͘-kiáⁿ Gaia khì chham-ka Le̍k-sek Hô-pêng Cho͘-chit ê “Save the Arctic” thàm-hiám oa̍h-tōng, lâi ín-khí tāi-chiòng tùi pak-ke̍k chio̍h-iû khai-chhái ê gûi-hâi ê koan-chù[13].
2015 nî, Thompson sio-soà ián-chhut iû Bill Bryson ê chok-phín kái-phian ê hí-kio̍k A Walk in the Woods, o͘-sek hí-kio̍k The Legend of Barney Thomson, kah bí-chia̍h chêng-chiat-phìⁿ Burnt; i tī The Legend of Barney Thomson pān chú-kak ê lāu-bú, chi̍t-ê 70 gōa hòe, sèng-chêng ióng-ngī ê Glasgow lāu-hū-jîn, Empire phêng i ê piáu-hiān “hō͘-lâng lân-bōng”[14]. 2016 nî, i chú-ián í Otto and Elise Hampel ê sū-che̍k kái-phian ê Tē-jī-chhù Sè-kài Tāi-chiàn chêng-chiat-phìⁿ Alone in Berlin; kâng nî iā chham-ka tiān-iáⁿ Bridget Jones's Baby ê phian-kio̍k kah ián-chhut[15]. 2017 nî, Thompson tī Disney chin-lâng-pán tiān-iáⁿ Beauty and the Beast ûi Mrs. Potts phoè-im; chit pō͘ phìⁿ chôan-kiû phiò-pâng chhiau-kè 12 ek Bí-kim, chiâⁿ-ûi tng-sî iáⁿ-sú siōng phiò-pâng siōng-koân ê chin-lâng-pán koa-bú-phìⁿ chi-it[16]. Kâng nî, i mā chham-ián Noah Baumbach chū-phian chū-tō ê hí-kio̍k The Meyerowitz Stories[17], kái-phian chū Ian McEwan tâng-miâ sió-soat, iû Richard Eyre chip-tō ê chêng-chiat-phìⁿ The Children Act[18], í-ki̍p BBC hí-kio̍k tiān-sī-kio̍k Upstart Crow ê Christmas te̍k-pia̍t-phiⁿ lāi-bīn kheh-chhoàn pān Elizabeth Tē-it.
2018 nî, Thompson ûi Le̍k-sek Hô-pêng Cho͘-chit só͘ chhiàng-gī ê chang-lû-iû kóng-kò phoè-im, āu-lâi siū Iceland chhiau-chhī kéng chò Christmas kóng-kò, m̄-koh in-ūi chèng-tī in-sò͘ siū Clearcast chù-cho̍at[19]. Kâng nî, i in-ūi tùi hì-kio̍k ê kòng-hiàn tit-tio̍h Elizabeth Jī-sè lú-ông hong i ûi DBE[20]; koh tī Johnny English Strikes Again kah Rowan Atkinson tâng-tâi, pān Eng-kok siú-siòng[21].
2019 nî, Thompson chú-ián iû Mindy Kaling chū-phian koh chū-ián ê hí-kio̍k Late Night, pān chi̍t-ê chu-chhim ê cha-bó͘ thoat-kháu-siù chú-chhî-jîn, piáu-hiān siū tio̍h khéng-tēng, ji̍p-ûi Kim-kiû-chióng Siōng-hó Im-ga̍k kap Hí-kio̍k-lūi Tiān-iáⁿ Cha-bó͘ Chú-kak[22]. Kâng nî i mā ûi tiāng-keh tōng-oē tiān-iáⁿ Missing Link phoè-im, koh pái ián-chhut Men in Black: International ê “O oân”, ia̍h kah ang-sài Greg Wise kah Bryony Kimmings kong-tông phian-kio̍k, chè-phiàn kiam chú-ián chiat-khèng lông-bān hí-kio̍k Last Christmas[23]. Kâng nî, Thompson tī Russell T Davies phian-kio̍k ê Eng-kok BBC kah HBO ha̍p-chè kīn bī-lâi tiān-sī-kio̍k Years and Years ni̍h pān sin-tōng bîn-chhuì-chú-gī ê chèng-tī jîn-bu̍t Vivienne Rook[24].
2021 nî, Thompson tī Disney chin-lâng-pán tiān-iáⁿ Cruella kah Emma Stone tâng-tâi, pān hoán-phài ê lú-chiok-hu-jîn, phêng-lūn chàn-siúⁿ i ê ián-chhut[25]. 2022 nî, i tī sèng hí-kio̍k Good Luck to You, Leo Grande kah Daryl McCormack tâng-tâi, thiáu-chiàn pān chi̍t-ê chui-kiû sèng kái-hòng ê thè-hiu lāu-su[26]; kâng nî koh tī Roald Dahl keng-tián sió-soat kái-phian ê koa-bú-phìⁿ Matilda the Musical pān giâm-khok ê hāu-tiúⁿ Miss Trunchbull, phêng-lūn-ka Robbie Collin tī The Daily Telegraph phêng i ê ián-chhut sī “hō͘ lâng lân-bōng ê hong-kông hoán-phài”[27]; koh kah Lily James kah Sajal Aly ha̍p-ián lông-bān hí-kio̍k What's Love Got to Do with It?[28].
2024 nî tang, Thompson khì Hun-lân Pak Karelia thiap-phiàn iû Brian Kirk chip-tō ê tōng-chok keng-sin phìⁿ Dead of Winter[29]. I tī thiap-phiàn kî-kan tī Helsingin Sanomat pò-chóa téng hoat-piáu kià hō͘ Hun-lân lâng ê kong-khai-phoe, o-ló Hun-lân kang-chok thoân-tūi[30]; Hun-lân chóng-thóng Alexander Stubb āu-lâi chhin-sin tá tiān-ōe hō͘ Thompson, kám-siā i tùi Hun-lân lâng ê sìn-jīm[31]. 2025 nî 10 goe̍h 29 ji̍t, Thompson tī Apple TV+ tiān-sī-kio̍k Down Cemetery Road pān su-ka cheng-thàm Zoë Boehm, che sī i kè 2019 nî Years and Years liáu-āu, thâu-chi̍t-pái koh tńg-lâi tam-jīm tiān-sī-kio̍k ê kò͘-tēng kak-sek[32].
Phêng-kè kah ián-ki hong-keh
[siu-kái | kái goân-sí-bé]Thompson siū kong-jīn sī i hit-tāi siōng-kia̍t-chhut ê cha-bó͘ ián-oân chi-it[33][34], mā sī siōng ū jīn-sek-tō͘ ê Eng-kok cha-bó͘ ián-oân chi-it[35]. Seng-gâi chá-kî, Thompson siông-siông kah i ê chêng-hu Kenneth Branagh ha̍p-chok, in-chhú hō͘ lâng sio-pí; nn̄g-lâng hun-ki liáu-āu, koan-chiòng hoán-tńg tuì Thompson koh-khah ū hó-kám, i mā tī 1990 nî-tāi chhiōng-sin ûi hit sî-tāi tāi-piáu-sèng ê cha-bó͘ ián-oân chi-it[35]. Phêng-lūn-ka Mark Kermode bat piáu-sī: “I sī hit-chióng hō͘-lâng 100 % sìn-jīm ê ián-oân, ē hō͘ lí kám-kak ‘góa lo̍h khì khó-khò ê chhiú ni̍h’…… i í-keng chiūⁿ-liáu siōng tōa-ê Eng-kok cha-bó͘ ián-oân ê hâng-liat.”[36]
Thompson te̍k-pia̍t gâu pán hâm-thiok kin-chhî, chêng-kám ap-ek ê kak-sek[37]; The Guardian phêng-lūn-ka Kate Kellaway jīn-ûi i te̍k-pia̍t ē pán “chhēng kó͘-chong ê hó cha-bó͘”[38]. I ê hì-lō͘ mā pau-hâm ngō͘-bān léng-chùn, ná pó-bú kāng-khoán giâm-lē ê kak-sek, m̄-koh iáu ē tit-tio̍h koan-chiòng ê kiōng-bêng[39]. Thompson siū kui chò Eng-kok í Heritage film chhut-miâ ê chi̍t-tīn chu-chhim cha-bó͘ ián-oân chi-it, kah Judi Dench, Kate Winslet kah Helena Bonham Carter pîng-miâ; chit chióng ián-chhut tiāⁿ-tiāⁿ thàu-kè lí-tì nā m̄-sī chêng-kám lâi piáu-hiān chêng-sū, koh tài hoán-phóng ê bī-tō, iōng án-ne piáu-hiān lú-chú-kak ê chhiau-jîn tōng-chhat-le̍k[40]. Thompson tiāⁿ-tiāⁿ hō͘ lâng tián-hêng ê “Eng-kok” hêng-siōng, i it-kuàn ko͘-chip, kín-sîn ê khì-chit mā tiāⁿ-tiāⁿ hō͘ lâng kah Maggie Smith pí-phēng[41].
Thompson sī í hí-kio̍k chhut-sin, ián-chhut to tài hoán-phóng ê sek-chhái. Sense and Sensibility chip-tō Lí Ang bat phêng-lūn: hí-kio̍k ián-chhut thang khó-lêng sī Thompson chò ián-oân siōng tōa ê kiông-hāng: “Emma sī chi̍t-ê ke̍k hong-chhù ê lâng. Chhin-chhiūⁿ Austen, i sin-chhù tī ka-kī ê bûn-hòa tiong, kāng chi̍t sî iā ēng hong-chhì ê gán-kng khòaⁿ i.”[41] Thompson iā bat piáu-sī “siōng hō͘-lâng kám-tōng ê tāi-chì óng-óng mā siōng khó-chhiò, bô-lūn sī seng-oa̍h iah sī gē-su̍t”[42]. I siông-siông kā chin-si̍t ê ka-kī iông-ji̍p tī kak-sek lāi-té, koh pe̍h-pe̍h piáu-sī ka-kī sī kīn ti̍t-kak ê ián-oân: “Góa bē-bat siū-kè giâm-keh ê hùn-liān, só͘-í bô chi̍t thò ián-ki ki-su̍t. Khui-phiàn chêng lí-sèng su-khó liáu-āu, góa pàng-hō͘ i chū-jiân hoat-seng, hō͘ kám-siū chū-iû íng-hiān, che téng-î sī tī ín-iú ka-kī ê chiâm-ì-sek. Góa sī iû lāi tùi gōa chò-tāi-chì.”[38]
Kò-jîn seng-oa̍h
[siu-kái | kái goân-sí-bé]
Emma Thompson tha̍k Kiàm-kiô Tāi-ha̍k ê sî, bat kah kâng-hāu ê tông-ha̍k Hugh Laurie ū kè chi̍t-tōaⁿ chêng. Tng-sî Hugh Laurie tha̍k Kiàm-kiô Tāi-ha̍k ê Khó͘-kó͘ kah Jîn-lūi-ha̍k-hē, lī Newnham Ha̍k-īⁿ chí chi̍t tiâu ke-á-lō͘. Nn̄g-lâng iā chham-ka Footlights kio̍k-siā.
Thompson tī 1989 nî 8 goe̍h 20 ji̍t kah Kenneth Branagh kiat-hun, tng-sî chiàⁿ-teh chham-ián tiān-sī-kio̍k Fortunes of War. In āu-lâi iā tī kúi-pō͘ tiān-iáⁿ lāi kiōng-tông ián-chhut, pau-hâm Henry V, Dead Again, kah Peter's Friends téng; chit-gia̍p kah kám-chêng ê koan-hē lóng bi̍t bô-hoat hun-khui, sī tng-sî Eng-kok mûi-thé kháu-tiong ê “kim-tông gio̍k-lú”, iā sī káu-á sió-pò ê tui-tṳk tùi-siōng[43]. In nn̄g-lâng tī 1995 nî 9 goe̍h soan-pò͘ hun-ki, 1997 nî chèng-sek lī-hun; Thompson tng-sî piáu-sī goân-in sī siang-hong kang-chok bô-êng, chū-chió lī-chē. Liáu-āu gōa-kài chiah chai-iáⁿ Branagh tī hun-in kî-kan kah cha-bó͘ ián-oân Helena Bonham Carter àm-tiong lâi-óng[44]. Thompson āu-lâi hôe-ek, lī-hun tēng-àn hit-ji̍t i tng-teh Los Angeles thiap-phiàn tiān-iáⁿ Primary Colors, Donald Trump hut-jiân tá tiān-ōe kàu i ê thoa-chhia iau-chhiáⁿ i iok-hōe. I āu-lâi khai sńg-chhiò kóng nā tng-sî tah-èng, “khó-lêng to kái-piàn Bí-kok le̍k-sú ê kiâⁿ-hiòng.”[45]
Thompson tī 1995 nî thiap-phiàn Sense and Sensibility kî-kan, kah hì tiong ha̍p-ián ê Greg Wise khai-sí kau-óng, nn̄g-lâng tī 2003 nî tī Sū-kat-lân ê Dunoon kiat-hun[46]. Cha-bó͘-kiáⁿ Gaia Romilly tī 1999 nî chhut-sì, sī Thompson 39 hòe ê sî í chhì-koán eng-jî siū-īn chhut-sì[47]. Ang-bó͘ nn̄g-lâng tī 2003 nî tī Refugee Council chú-pān ê oa̍h-tōng jīn-sek chi̍t-ê 16 hòe ê Rwanda chêng gín-á peng Tindyebwa Agaba, iau-chhiáⁿ i lâi chhù-nih kòe Christmas, āu-lâi ta̍uh-ta̍uh chiâⁿ-ûi ke-tiong chi̍t-ê, hui-chèng-sek siu-ióng i; Agaba tī 2009 nî chiâⁿ-ûi Eng-kok kok-bîn[48].
Thompson chi̍t-ke ê chú-iàu chhù-the̍h tī Lûn-tun West Hampstead, kah i sè-hàn ê chhù tī kâng chi̍t tiâu ke-á-lō͘[47]. 2020 nî 2 goe̍h 28 ji̍t, Thompson kah ang-sài tī Eng-kok thoat-Au liáu-āu chèng-sek tit-tio̍h Venice kî-liû; ang-bó͘ koh tī Lûn-tun, Sū-kat-lân ê Loch Eck pōng, kah Venice saⁿ tē lóng ū chhù[49].
2010 nî 8 goe̍h 6 ji̍t, Thompson siū iau-chhiáⁿ tī Hollywood Seng-kng Tāi-tō siōng lâu-hā kò-jîn seng-hêng chióng-pai kah chhiú-ìn[50].
Sui-jiân phah chē-chē Hollywood tiān-iáⁿ, iā ū tông-hâng kiàn-gī i poaⁿ khì Los Angeles hoat-tián, Thompson iáu-sī soán-te̍k tòa tī i ê kò͘-hiong Lûn-tun. I bat iōng khin-sang ê kháu-khì kóng-khí ta̍k-pái chhōe-hóng Los Angeles só͘ siū ê jia̍t-chêng chiau-thāi: ji̍p-chù ê lú-koán pâng-keng pâi-móa chhiⁿ-hoe kah koé-chí, chêng-hêng ná tiān-iáⁿ Saving Mr. Banks lāi-té P. L. Travers thâu-chi̍t-pái khì Hollywood ê sî, lú-koán pang kā thó-hó, tī pâng-keng tui-móa Mickey Mouse kah jiông-mô͘ ang-á ê chit-tōaⁿ.
Siā-hōe ūn-tōng kah koan-tiám
[siu-kái | kái goân-sí-bé]Thompson chū ha̍k-seng sî-tāi chiū koan-sim siā-hōe gī-tê, chhut-miâ liáu-āu siông-siông kong-khai hoat-piáu ì-kiàn, iā in-chhú tiāⁿ-tiāⁿ hō͘ lâng phoe-phêng sī siuⁿ kiông-sè[51]. I tuì chit-ê hôe-èng: “Góa jīn-ûi lán ta̍k-ê lóng eng-kai hoat-siaⁿ, jî-chhiáⁿ tng chi̍t-ê cha-bó͘ ū khah tōa ê hoat-siaⁿ koán-tō, i tō ài koh-khah tōa-siaⁿ kóng chhut-lâi.”[51]
Chong-kàu kah chèng-tī li̍p-tiûⁿ
[siu-kái | kái goân-sí-bé]Thompson sī bû-sîn-lūn-chiá, bat piáu-sī: “Góa sī bû-sîn-lūn-chiá……góa iōng kiaⁿ-hiâⁿ kah hoâi-gî ê gán-kng khòaⁿ chong-kàu. Kan-taⁿ kóng góa bô-siong-sìn sîn-bêng mā m̄-kàu: góa kā [chong-kàu] chit-ê chè-tō͘ pún-sin khòaⁿ chò chi̍t chióng khùn-jiáu; Sèng-keng kah Kó-lân-keng ni̍h só͘ biâu-siá ê bó͘-mih tāi-chì hō͘ góa kám-kak siū-mō͘-hoān, só͘-í góa kā i kū-choat.”[52] Chèng-tī siōng, Thompson chi-chhî Lô-kang-tóng, tī 2015 nî kah 2016 nî nn̄g-pái kong-khai chi-chhî Jeremy Corbyn kēng-soán Lô-kang-tóng tóng-khoe[53]. I mā bat siaⁿ-oān hiān-í kái-sàn ê Cha-bó͘ Pêng-téng Tóng, koh piáu-sī: “Góa m̄ ài tī sok-té lâm-lú sin-chúi chha chi-chêng tō sí.”[54]
Jîn-koân kah lân-bîn
[siu-kái | kái goân-sí-bé]Thompson tn̂g-kî tâu-ji̍p jîn-koân kang-chok, hiān-jīm hoán khok-hêng cho͘-chit Helen Bamber Foundation ê chú-se̍k[55]; iā tam-jīm Refugee Council ê chàn-chō͘-jîn, tī ka-kī ê pān-kong-sek lāi pān chi̍t keng hō͘ siū-siong lân-bîn sú-iōng ê sim-lí tī-liâu sek[38]. 2017 nî, i m̄-koán ka-kī hì-iām ê pēⁿ-chêng, chham-ka Lûn-tun ke-lō͘ siaⁿ-oān siū Iran khú-liû ê Eng-Iran siang-kok-chiah chû-siān kang-chok-chiá Nazanin Zaghari-Ratcliffe ê iû-hêng[56]. Thompson mā sī Elton John AIDS Foundation ê chàn-chō͘-jîn, bat chhin-sin khì U-kan-ta, Mô͘-sam-pí-khek, I-so-pí-a téng-téng tē-hng thui-tōng chû-siān kè-ōe; 2009 nî in-ūi i tùi Hui-chiu ài-ti̍t pēⁿ-lâng ê koan-chù, siū Time phiau-chhut kè “Au-chiu Eng-hiông” (European Hero)[51].
Khoân-kéng kah khì-hāu
[siu-kái | kái goân-sí-bé]Thompson sī Le̍k-sek Hô-pêng Cho͘-chit ê tn̂g-kî chi-chhî-chiá. 2009 nî 1 goe̍h, i kah kî-thaⁿ saⁿ-ê Le̍k-sek Hô-pêng sêng-oân chiū bé-tio̍h Lûn-tun Heathrow Ki-tiûⁿ pèng Sipson chng ê thó͘-tē, lâi chó͘-tòng ki-tiûⁿ khí tē saⁿ-tiâu pháu-tō ê kè-ōe[57]. 2014 nî 8 goe̍h, i chhōa cha-bó͘-kiáⁿ Gaia chham-ka Le̍k-sek Hô-pêng “Save the Arctic” hâng-hêng, ín-khí tāi-chiòng tùi Petroleum exploration in the Arctic gûi-hâi ê koan-chù[58]. 2016 nî 10 goe̍h, i ûi kiat-lo̍h Koch Industries chu-chō͘ hoán khì-hāu piàn-chhian gián-kiù ê kí-lio̍k tói-phìⁿ The Doubt Machine: Inside the Koch Brothers' War on Climate Science (The Doubt Machine) tam-jīm pông-pe̍h[59]. 2019 nî, Thompson tī Lûn-tun chham-ka Hoán-khòng Bia̍t-choa̍t ê khì-hāu khòng-gī; sui-jiân in-ūi chē poe-ki tuì Los Angeles poe tńg Lûn-tun chham-ka siū-tio̍h pō͘-hūn phoe-phêng, i iáu-sī kong-khai chi-chhî[60]. I iā tam-jīm Galapagos Conservation Trust ê tāi-sài[61].
Siaⁿ-oān U-khek-lân
[siu-kái | kái goân-sí-bé]2024 nî 2 goe̍h 24 ji̍t Ú-U chiàn-cheng móa nn̄g nî, Thompson kah kî-thaⁿ 29 uī kok-chè iáⁿ-chhin kiōng-tông phah siaⁿ-oān ê iáⁿ-phìⁿ, piáu-sī chi-chhî U-khek-lân tùi-khòng Lō-se-a ê chhim-lio̍k[62].
Iáⁿ-sī chok-phín
[siu-kái | kái goân-sí-bé]Tiān-iáⁿ
[siu-kái | kái goân-sí-bé]| Nî-hūn | Phìⁿ | Kak-sek | Pī-chù kah chióng-hāng | |
|---|---|---|---|---|
| POJ | Goân-miâ | |||
| 1989 | Henry V | Henry V | Catherine ông-hui | |
| 1990 | The Tall Guy | The Tall Guy | Kate Lemmon | |
| 1991 | Dead Again | Dead Again | Grace/Margaret Strauss | |
| Impromptu | Impromptu | Claudette, Duchess d'Antan | Thê-miâ — Tok-li̍p Cheng-sîn Chióng Chòe-ka Lú-phoè-kak | |
| 1992 | Howards End | Howards End | Margaret Schlegel | Ò-sū-khah Chòe-ka Lú-chú-kak Kok-ka Phêng-lūn Hia̍p-hōe Chòe-ka Lú-chú-kak Kim-kiû-chióng Chhiong-chiòng Tiān-iáⁿ Chòe-ka Lú-chú-kak BAFTA Chòe-ka Lú-chú-kak |
| Peter's Friends | Peter's Friends | Maggie Chester | ||
| 1993 | Much Ado About Nothing | Much Ado About Nothing | Beatrice | Thê-miâ — Tok-li̍p Cheng-sîn Chióng Chòe-ka Lú-chú-kak |
| The Remains of the Day | The Remains of the Day | Miss Kenton | Thê-miâ — Ò-sū-khah, Kim-kiû, BAFTA Chòe-ka Lú-chú-kak | |
| In the Name of the Father | In the Name of the Father | Gareth Peirce | Thê-miâ — Ò-sū-khah Chòe-ka Lú-phoè-kak, Kim-kiû Siōng-hó Tiān-iáⁿ Cha-bó͘ Phoè-kak | |
| 1994 | Junior | Junior | Dr. Diana Reddin | Thê-miâ — Kim-kiû Siōng-hó Im-ga̍k kah Hí-kio̍k-lūi Tiān-iáⁿ lú-chú-kak |
| 1995 | Carrington | Carrington | Dora Carrington | Kok-ka Phêng-lūn Hia̍p-hōe Chòe-ka Lú-chú-kak |
| Sense and Sensibility | Sense and Sensibility | Elinor Dashwood | Kiam phian-kio̍k Ò-sū-khah Chòe-ka Kái-phian Kio̍k-pún BAFTA Chòe-ka Lú-chú-kak Kim-kiû Siōng-hó Kio̍k-pún Thê-miâ — Ò-sū-khah Chòe-ka Lú-chú-kak | |
| 1997 | The Winter Guest | The Winter Guest | Frances | Venice Tiān-iáⁿ Chiat Pasinetti Chióng Siōng-hó Cha-bó͘ Ián-oân |
| 1998 | Primary Colors | Primary Colors | Susan Stanton | |
| Judas Kiss | Judas Kiss | Sadie Hawkins | ||
| 2000 | Maybe Baby | Maybe Baby | Druscilla | |
| 2002 | Treasure Planet | Treasure Planet | Captain Amelia | Phoè-im |
| 2003 | Imagining Argentina | Imagining Argentina | Cecilia | |
| Love Actually | Love Actually | Karen | Thê-miâ — BAFTA Chòe-ka Lú-phoè-kak | |
| 2004 | Harry Potter and the Prisoner of Azkaban | Harry Potter and the Prisoner of Azkaban | Sybill Trelawney | |
| 2005 | Nanny McPhee | Nanny McPhee | Nanny McPhee | Kiam phian-kio̍k |
| 2006 | Stranger than Fiction | Stranger than Fiction | Karen Eiffel | Thê-miâ — Satellite Chòe-ka Lú-phoè-kak |
| 2007 | Harry Potter and the Order of the Phoenix | Harry Potter and the Order of the Phoenix | Sybill Trelawney | |
| I Am Legend | I Am Legend | Dr. Alice Krippin | Kheh-chhoàn | |
| 2008 | Brideshead Revisited | Brideshead Revisited | Lady Marchmain | |
| Last Chance Harvey | Last Chance Harvey | Kate Walker | Thê-miâ — Kim-kiû Siōng-hó Im-ga̍k kah Hí-kio̍k-lūi Tiān-iáⁿ lú-chú-kak | |
| 2009 | An Education | An Education | Hāu-tiúⁿ | |
| The Boat That Rocked | The Boat That Rocked | Charlotte | ||
| 2010 | Nanny McPhee and the Big Bang | Nanny McPhee and the Big Bang | Nanny McPhee | Kiam phian-kio̍k |
| 2011 | Harry Potter and the Deathly Hallows – Part 2 | Harry Potter and the Deathly Hallows – Part 2 | Sybill Trelawney | |
| 2012 | Men in Black 3 | Men in Black 3 | Agent O | |
| Brave | Brave | Queen Elinor | Phoè-im | |
| 2013 | Beautiful Creatures | Beautiful Creatures | Mrs. Lincoln/Sarafine | Thê-miâ — London Tiān-iáⁿ Phêng-lūn Hia̍p-hōe Chióng Siōng-hó Eng-kok Cha-bó͘ Ián-oân |
| Saving Mr. Banks | Saving Mr. Banks | P. L. Travers | Kok-ka Phêng-lūn Hia̍p-hōe Chòe-ka Lú-chú-kak | |
| The Love Punch | The Love Punch | Kate | ||
| 2014 | Effie Gray | Effie Gray | Lady Eastlake | Kiam phian-kio̍k |
| Men, Women & Children | Men, Women & Children | Phoè-im | ||
| 2015 | A Walk in the Woods | A Walk in the Woods | Jeannie Bryson | |
| The Legend of Barney Thomson | The Legend of Barney Thomson | Cemolina | ||
| Burnt | Burnt | Dr. Rosshilde | ||
| 2016 | Alone in Berlin | Alone in Berlin | Anna Quangel | |
| Bridget Jones's Baby | Bridget Jones's Baby | Dr. Rawlings | Kiam phian-kio̍k | |
| 2017 | Beauty and the Beast | Beauty and the Beast | Mrs. Potts | |
| The Meyerowitz Stories | The Meyerowitz Stories | Maureen | ||
| The Children Act | The Children Act | |||
| 2018 | Johnny English Strikes Again | Johnny English Strikes Again | ||
| 2019 | Late Night | Late Night | Katherine Newbury | Thê-miâ — Kim-kiû Siōng-hó Im-ga̍k kah Hí-kio̍k-lūi Tiān-iáⁿ lú-chú-kak |
| Missing Link | Missing Link | Yeti Elder | Phoè-im | |
| Men in Black: International | Men in Black: International | Agent O | ||
| Last Christmas | Last Christmas | Adelia | ||
| 2020 | Dolittle | Dolittle | Polynesia | Phoè-im |
| 2021 | Cruella | Cruella | The Baroness | |
| 2022 | Good Luck to You, Leo Grande | Good Luck to You, Leo Grande | Nancy Stokes | |
| What's Love Got to Do with It? | What's Love Got to Do with It? | Cath | ||
| Matilda the Musical | Matilda the Musical | Miss Trunchbull | ||
| 2025 | Dead of Winter | Dead of Winter | Barbara | Tī Hun-lân thiap-phiàn |
Tiān-sī
[siu-kái | kái goân-sí-bé]| Nî-hūn | Kio̍k-chi̍p | Kak-sek | Pī-chù | |
|---|---|---|---|---|
| POJ | Goân-miâ | |||
| 1982 | Cambridge Footlights Revue | various characters | 1 chi̍p | |
| There's Nothing to Worry About! | Mrs. Wally | 3 chi̍p | ||
| 1983–84 | Alfresco | various characters | 13 chi̍p | |
| 1984 | The Young Ones | Miss Money-Sterling | 1 chi̍p – Bambi | |
| 1987 | Tutti Frutti | Suzi Kettles | ||
| Fortunes of War | Harriet Pringle | BAFTA Tiān-sī-lūi Chòe-ka Lú-chú-kak | ||
| 1988 | Thompson | Various Roles | ||
| 1989 | Look Back in Anger | Alison Porter | Tiān-sī tiān-iáⁿ | |
| 1990 | The Winslow Boy | Catherine Winslow | Tiān-sī tiān-iáⁿ | |
| 1992 | Cheers | Cheers | Nanette Guzman | 1 chi̍p |
| 1994 | The Blue Boy | The Blue Boy | Marie Bonnar | Tiān-sī tiān-iáⁿ |
| 1997 | Ellen | Ellen | Pún-jîn | 1 chi̍p Emmy Hí-kio̍k-lūi Siōng-hó Cha-bó͘ Kheh-chhoàn Ián-oân |
| Hospital! | Elephant Woman | 1 chi̍p | ||
| 2001 | Wit | Wit | Vivian Bearing | Chū-phian chū-ián (tiān-sī tiān-iáⁿ) Thê-miâ — Emmy, Kim-kiû, Bí-kok Ián-oân Kang-hōe Chòe-ka Lú-chú-kak |
| 2003 | Angels in America | Angels in America | Nurse Emily/Homeless Woman/Angel America | Thê-miâ — Emmy Chòe-ka Lú-chú-kak |
| 2012 | Playhouse Presents | Playhouse Presents | Elizabeth Jī-sè | 1 chi̍p Walking the Dogs |
| 2017 | Upstart Crow | Upstart Crow | Elizabeth Tē-it | Christmas te̍k-pia̍t-phiⁿ kheh-chhoàn |
| 2018 | King Lear | King Lear | Goneril | BBC Two tiān-sī tiān-iáⁿ; Richard Eyre chip-tō, Anthony Hopkins chú-ián[63] |
| 2019 | Years and Years | Years and Years | Vivienne Rook | |
| 2025 | Down Cemetery Road | Down Cemetery Road | Zoë Boehm | Apple TV+ kio̍k; kái-phian chū Mick Herron tâng-miâ sió-soat |
Chú-iàu kio̍k-tiûⁿ ián-chhut
[siu-kái | kái goân-sí-bé]- 1982 nî: Not the Nine O'Clock News – Eng-kok sûn-ián
- 1982 nî: Chū-phian chū-ián Beyond the Footlights – Eng-kok Lûn-tun Lyric Shaftesbury kio̍k-īⁿ
- 1984 nî: Chū-phian chū-ián Short Vehicle – Ài-teng-pó Gē-su̍t-chiat
- 1984–1985 nî: Tī im-ga̍k-kio̍k Me and My Girl pān Sally – Eng-kok Lûn-tun Adelphi Theatre
- 1989 nî: Tī John Osborne ê kio̍k Look Back in Anger pān Alison – Eng-kok Lûn-tun Lyric Shaftesbury kio̍k-īⁿ
- 1990 nî: Tī Shakespeare ê King Lear pān lông-jîn
- 1990 nî: Tī A Midsummer Night's Dream pān Helena – Kok-chè sûn-ián
- 2014 nî: Tī im-ga̍k-kio̍k Sweeney Todd: The Demon Barber of Fleet Street pān Mrs. Lovett – Bí-kok Niú-iok Lincoln Center
Chheh tù-chok
[siu-kái | kái goân-sí-bé]Tī Peter Rabbit chhut-pán-siā Frederick Warne siū-koân ē, Thompson siá kè saⁿ pún Peter Rabbit hē-lia̍t gín-á-chheh, sī chū 1930 nî í-lâi thâu-chi̍t-ê siū-koân kè-sio̍k siá Beatrix Potter pit-hā Peter Rabbit kò͘-sū ê chok-ka[64]:
- 2012 nî: The Further Tale of Peter Rabbit – ûi kì-liām Peter Rabbit chhut-pán 110 chiu-nî só͘ siá, bat siōng New York Times Best Seller pâng[64].
- 2013 nî: The Christmas Tale of Peter Rabbit[65]
- 2014 nî: The Spectacular Tale of Peter Rabbit[66]
Iân-sin ia̍t-tho̍k
[siu-kái | kái goân-sí-bé]- Hewison, Robert (1984). Footlights! A Hundred Years of Cambridge Comedy. Methuen, London. ISBN 0-413-56050-3.
- Branagh, Kenneth (1989). Beginning. St. Martin's Press, New York. ISBN 0-312-05822-5.
- Shuttleworth, Ian (1994). Ken and Em. Headline Book Publishing, London. ISBN 0-7472-1225-2.
- Nickson, Chris (1997). Emma: The Many Facets of Emma Thompson. Taylor Publishing. ISBN 0878339655.
Chham-khó chu-liāu
[siu-kái | kái goân-sí-bé]- ↑ "Beauty Is Much Less Than Skin Deep". Goân-pún bāng-ia̍h Pó-chûn tī 2021-05-21. 2014-04-18 khòaⁿ--ê.
- ↑ "IT'S NANNY McME". Goân-pún bāng-ia̍h Pó-chûn tī 2019-12-13. 2014-04-22 khòaⁿ--ê.
- ↑
YouTube téng ê Emma Thompson: On Acting ê iáⁿ-phìⁿ - ↑ "Emma Thompson: the A-lister who sets her own rules". Goân-pún bāng-ia̍h Pó-chûn tī 2020-07-31. 2014-04-20 khòaⁿ--ê.
- ↑ Shakespeare Re-dressed: Cross-gender Casting in Contemporary Performance
- ↑ "An Impressive 'King Lear' Outshines A Flawed, Hilarious 'dream'". Goân-pún bāng-ia̍h Pó-chûn tī 2013-10-17. 2014-04-20 khòaⁿ--ê.
- ↑ "Interview With Lindsay Doran: Producer Nanny McPhee Returns". Goân-pún bāng-ia̍h Pó-chûn tī 2013-10-26. 2014-04-22 khòaⁿ--ê.
- ↑ "Emma Thompson: Write for the Part". Goân-pún bāng-ia̍h Pó-chûn tī 2013-09-25. 2014-04-22 khòaⁿ--ê.
- ↑ "Movie & TV News - WENN". IMDb.com. 2006-01-17. Goân-pún bāng-ia̍h Pó-chûn tī 2016-03-23. 2009-01-18 khòaⁿ--ê.
- ↑ "When a movie hurts too much". Goân-pún bāng-ia̍h Pó-chûn tī 2019-12-01. 2014-04-20 khòaⁿ--ê.
- ↑ "奧斯卡公布入圍 明星為遺珠叫屈". Goân-pún bāng-ia̍h Pó-chûn tī 2020-09-21. 2014-04-20 khòaⁿ--ê.
- ↑ Brown, Mark (2014-03-06). "Emma Thompson makes acclaimed New York debut in Sweeney Todd". The Guardian. 2026-04-20 khòaⁿ--ê.
- ↑ "Emma Thompson: 'It's a different patch of life, your 50s'". The Guardian. 2014-09-13. 2026-04-20 khòaⁿ--ê.
- ↑ "The Legend of Barney Thompson". Empire. goân-loē-iông tī 2015-09-05 hőng khó͘-pih. 2026-04-20 khòaⁿ--ê.
- ↑ "Emma Thompson to Rewrite 'Bridget Jones's Baby'". Variety. 2015-06-05. 2026-04-20 khòaⁿ--ê.
- ↑ "Beauty and the Beast (2017)". Rotten Tomatoes. 2026-04-20 khòaⁿ--ê.
- ↑ "The Meyerowitz Stories (2017)". Rotten Tomatoes. 2026-04-20 khòaⁿ--ê.
- ↑ "Toronto Film Review: 'The Children Act'". Variety. 2017-09-10. 2026-04-20 khòaⁿ--ê.
- ↑ "Iceland Christmas advert banned for being too political". The Telegraph. 2018-11-09. 2026-04-20 khòaⁿ--ê.
- ↑ "Birthday Honours 2018: Kenny Dalglish and Emma Thompson head list". BBC News. 2018-06-09. 2026-04-20 khòaⁿ--ê.
- ↑ "Emma Thompson, Olga Kurylenko Join Rowan Atkinson in 'Johnny English 3'". Variety. 2017-12-05. 2026-04-20 khòaⁿ--ê.
- ↑ "Film Review: Late Night". Variety. 2019-01-26. 2026-04-20 khòaⁿ--ê.
- ↑ Ford, Rebecca (2018-09-28). "Emilia Clarke, Henry Golding to Star in 'Last Christmas' (Exclusive)". The Hollywood Reporter. 2026-04-20 khòaⁿ--ê.
- ↑ D'Addario, Daniel (2019-06-22). "TV Review: 'Years and Years'". Variety. 2026-04-20 khòaⁿ--ê.
- ↑ Duralde, Alonso (2021-05-28). "'Cruella' Film Review: Emma Stone Generates Sympathy for the de Vil". The Wrap. 2026-04-20 khòaⁿ--ê.
- ↑ Kennedy, Lisa (2022-06-15). "'Good Luck to You, Leo Grande' Review: Pleasure Principles". The New York Times. 2026-04-20 khòaⁿ--ê.
- ↑ Collin, Robbie (2022-11-24). "Emma Thompson gives Matilda The Musical a deranged villain to remember". The Telegraph. 2026-04-20 khòaⁿ--ê.
- ↑ Ramachandran, Naman (2021-01-15). "Rob Brydon, Shabana Azmi Board Lily James and Emma Thompson Comedy 'What's Love Got To Do With It?'". Variety. 2026-04-20 khòaⁿ--ê.
- ↑ Balaga, Marta (2024-03-30). "Emma Thompson Gushes Over Working With Finnish Crew on 'The Fisherwoman'". Variety. 2026-04-20 khòaⁿ--ê.
- ↑ "Näyttelijä Emma Thompsonin kiitoskirje Suomelle". Helsingin Sanomat (ēng Hun-lân-gí). 2024-03-30. 2026-04-20 khòaⁿ--ê.
- ↑ Lehtonen, Veli-Pekka (2024-03-30). "Presidentti Stubb soitti Suomea hehkuttaneelle brittinäyttelijä Emma Thompsonille". Aamulehti (ēng Hun-lân-gí). 2026-04-20 khòaⁿ--ê.
- ↑ Mangan, Lucy (2025-10-29). "Down Cemetery Road review – Emma Thompson is magnificent in this thriller from Slow Horses' creator". The Guardian. 2026-04-20 khòaⁿ--ê.
- ↑ Ingersoll, Earl G. (2012-02-16). Filming Forster: The Challenges of Adapting E.M. Forster's Novels for the Screen. Lexington Books. p. 242. ISBN 978-1-61147-518-0.
- ↑ Sands, Sarah (2008-10-05). "Sarah Sands: Emma Thompson is the true lady of Brideshead". The Independent. 2026-04-20 khòaⁿ--ê.
- 1 2 "Why Are They Famous?: Emma Thompson". The Independent. 1999-12-12. 2026-04-20 khòaⁿ--ê.
- ↑ Kermode, Mark (2014-10-12). "Emma Thompson on Effie Gray". The Guardian. 2026-04-20 khòaⁿ--ê.
- ↑ "Interview with Emma Thompson". Reader's Digest (South Africa). 2009-12-18. goân-loē-iông tī 2013-09-26 hőng khó͘-pih. 2026-04-20 khòaⁿ--ê.
- 1 2 3 Kellaway, Kate (2005-10-16). "Warts'n'all". The Guardian. 2026-04-20 khòaⁿ--ê.
- ↑ Thorpe, Vanessa (2014-03-22). "Emma Thompson: the A-lister who sets her own rules". The Observer. 2026-04-20 khòaⁿ--ê.
- ↑ Hollinger, Karen (2006). The Actress: Hollywood Acting and the Female Star. Taylor & Francis. p. 62. ISBN 978-0-415-97792-0.
- 1 2 Gilbert, Matthew (1995-12-10). "Emma and sensibility". The Boston Globe.
- ↑ "A Life in Pictures: Emma Thompson". BAFTA. 2013-11-20. 2026-04-20 khòaⁿ--ê.[íng-íng bô-hāu ê liân-kiat]
- ↑ Denworth, Lydia (1995-10-16). "One Pooped Pair". People. 2026-04-20 khòaⁿ--ê.
- ↑ "Emma Thompson Talks Kenneth Branagh's Alleged Affair With Helena Bonham Carter". HuffPost. 2013-11-12. 2026-04-20 khòaⁿ--ê.
- ↑ Perry, Kevin E G (2025-08-11). "Emma Thompson jokes she could've 'changed American history' by saying yes to Trump". The Independent. 2026-04-20 khòaⁿ--ê.
- ↑ Johnson, Simon (2012-08-07). "Scottish independence: Emma Thompson attacks separation". The Telegraph. 2026-04-20 khòaⁿ--ê.
- 1 2 Moorhead, Joanna (2010-03-20). "Emma Thompson: 'Family is about connection'". The Guardian. 2026-04-20 khòaⁿ--ê.
- ↑ Singh, Anita (2008-06-26). "Emma Thompson and her 'adopted' son meet Nelson Mandela". The Telegraph. 2026-04-20 khòaⁿ--ê.
- ↑ Simpson, Craig; Gardner, Bill (2020-05-01). "Emma Thompson left new home in Venice to self-isolate at 'mum's house in Scotland'". The Telegraph. 2026-04-20 khòaⁿ--ê.
- ↑ "Hollywood Walk of Fame – Emma Thompson". 2026-04-20 khòaⁿ--ê.
- 1 2 3 Moorhead, Joann (2009-01-18). "Emma Thompson: Doth the lady protest too much?". The Independent. 2026-04-20 khòaⁿ--ê.
- ↑ Cornwell, Jane (2008-10-15). "Acting on outspoken beliefs". The Australian. goân-loē-iông tī 2013-11-24 hőng khó͘-pih. 2026-04-20 khòaⁿ--ê.
- ↑ McCrum, Robert (2016-09-21). "Emma Thompson: English rose. Flower of Scotland. And all-round thorn in the side". The Guardian. 2026-04-20 khòaⁿ--ê.
- ↑ Thompson, Emma (2016-05-02). "Letters: Emma Thompson 'I do not want to die before closing the pay gap'". The Guardian. 2026-04-20 khòaⁿ--ê.
- ↑ Saner, Emine (2011-03-08). "Emma Thompson". The Guardian. 2026-04-20 khòaⁿ--ê.
- ↑ Turner, Camilla (2017-11-25). "Emma Thompson braves pneumonia to join march in support of Nazanin Zaghari-Ratcliffe". The Telegraph. 2026-04-20 khòaⁿ--ê.
- ↑ "Protesters buy up Heathrow land". BBC News. 2009-01-13. 2026-04-20 khòaⁿ--ê.
- ↑ Brockes, Emma (2014-09-13). "Emma Thompson: 'It's a different patch of life, your 50s'". The Guardian. 2026-04-20 khòaⁿ--ê.
- ↑ "The Doubt Machine: Inside the Koch Brothers' War on Climate Science". The Real News Network. goân-loē-iông tī 2016-11-04 hőng khó͘-pih. 2026-04-20 khòaⁿ--ê.
- ↑ Middleton, Lucy (2019-04-19). "Emma Thompson flew 5,400 miles to join climate change protest". Metro. 2026-04-20 khòaⁿ--ê.
- ↑ "Ambassadors". Galapagos Conservation Trust. 2026-04-20 khòaⁿ--ê.
- ↑ "#StandWithUkraine - UNITED24: 30 world stars support Ukraine against Russia (2024)". 2024-02-24. 2026-04-20 khòaⁿ--ê – via YouTube.
- ↑ Mangan, Lucy (2018-05-28). "King Lear review – Anthony Hopkins towers in a mighty adaptation". The Guardian. 2026-04-20 khòaⁿ--ê.
- 1 2 "Emma Thompson revives anarchist Peter Rabbit". NPR.org. 2012-10-11. 2026-04-20 khòaⁿ--ê.
- ↑ "The Christmas Tale of Peter Rabbit". Waterstones. goân-loē-iông tī 2014-02-02 hőng khó͘-pih. 2026-04-20 khòaⁿ--ê.
- ↑ Silman, Anna (2014-10-03). "An Evening With Emma Thompson and Peter Rabbit". Vulture. 2026-04-20 khòaⁿ--ê.
.png){kind=icon}
Gōa-pō͘ liân-kiat
[siu-kái | kái goân-sí-bé]- Emma Thompson tī Bāng-lō͘ Tiān-iáⁿ Chu-liāu-khò͘
- Interview, 1/27/06, Today Entertainment
- Interview on her views on parenting, 10/01/05, RaisingkidsArchived 2009-07-05 at the Wayback Machine.
- Interview with NetributionArchived 2016-03-20 at the Wayback Machine.