Iûⁿ Sū-chheng (Imacat)

Iûⁿ Sū0chheng（1971 nî—）, sió-miâ I-má Niau（Imacat）, nńg-thé kang-têng-su, Tâi-oân Lú-chú Chū-iû-nńg-thé Kang-chok Sió-cho͘（WoFOSS^{[chù 1]}）kah Pyladies Taiwan hoat-khí-jîn, OpenOffice khai-hoat koán-lí thoân-tūi sêng-oân, Khòa-sèng-pia̍t ūn-tōng-chiá. Bo̍k-chiân sī Tâi-oân Wiki Mûi-thé Hia̍p-hōe siông-bū lí-sū.^[1]

Sió-toān

Iûⁿ Sū-chheng chhut-sì tī 1971 nî.^[2] I ùi ha̍k-seng sî-tāi tō khai-sí koan-chù sèng-pia̍t gī-tôe, koh chham-ú lú-sèng khoân-lī siong-koan ê siā-hōe ūn-tōng. Pau-koat Tâi-tāi Iâ-lîm Hong-chêng La-chí pán pán-chú, Kong-chhiong Chū-kiù-hōe ê gī-kang téng-téng.^[3] 2009 nî, Iûⁿ Sū-chheng kám-kak Tâi-oân khiàm-khoeh lú-sèng ûi-chú ê Chū-iû-nńg-thé cho͘-chit, só͘-í thàu-kè Plurk se̍k-sāi kúi-nā-ê tâu-sin chū-iû-nńg-thé ê lú-sèng, pēng-chhiáⁿ thó-lūn ín-ji̍p lú-sèng chū-iû-nńg-thé cho͘-chit ê khó-lêng-sèng. Khí-thâu in khó-lū ín-ji̍p Debian Women, m̄-koh in-ūi tùi siā-kûn bô-kàu se̍k, sêng-oân hun-sòaⁿ kok-tōe téng-téng in-sò͘, Debian Women ê kè-ōe sit-pāi.^[3] 2010 nî, Iûⁿ Sū-chheng thàu-kè COSCUP kah Gnome Taiwan ê lú-sèng chham-ú si̍t-sip kè-ōe chhē-tio̍h chham-ú-chiá, pēng-chhiáⁿ hoat-khí Tâi-oân Lú-chú Chū-iû-nńg-thé Kang-chok sió-cho͘（WoFOSS）, sī Tâi-oân thâu-chi̍t-ê lú-sèng nńg-thé kang-têng-su siā-kûn.^[3] Chiàu Iûⁿ Sū-chheng koan-chhat, tōa-pō͘-hūn ê WoFOSS chū-hōe chham-ú-chiá, sī thâu-chi̍t-pái chham-ú khai-goân siā-kûn.^[4] 2013 nî, Iûⁿ Sū-chheng chú-pān tē-it-kài Pyladies Taiwan. 2015 nî, WoFOSS kah Wikimedia Taiwan hoat-khí「Bî-ki ê Pâng-keng」kè-ōe, kó͘-lē lú-sèng chham-ú-chiá tâu-ji̍p Wiki Pek-kho, pēng-chhiáⁿ pôe-ióng lú-sèng su-siá ê Wiki Pek-kho lú-sèng siá-chhiú. Iûⁿ Sū-chheng pún-lâng iā-sī Wiki Pek-kho ê oa̍h-thiàu chham-ú-chiá. I chōe-pái kiông-tiāu Wiki Pek-kho ê sèng-pia̍t phian-ngō, koh chhì-tô͘ kai-koat chit-ê būn-tôe.^[5]^[4]

2010 nî, Iû Sū-chheng khó-tiâu Kok-li̍p Tâi-oân Su-hoān Tāi-ha̍k Kàu-io̍k Gián-kiù-só͘. 2015 nî kàu 2017 nî, Iûⁿ Sū-chheng sú-ēng Su-tāi Iû-éng-tî ê lú-sèng keng-i-sek, khiok hông tâu-sò͘, Iû Sū-chheng tùi tâu-sò͘ thê-khí sèng-pîⁿ sin-sò͘. Su-tāi Sèng-pîⁿ-hōe chòe-āu tông-ì i kè-siok sú-ēng lú-sèng keng-i-sek. Iûⁿ Sū-chheng liáu-āu hoat-hiān tâu-sò͘ kah kiáu-jiáu chhî-siok, koat-tēng chìn-hêng tē-jī-pái sin-sò͘. Tī tē-jī-pái sin-sò͘, Su-tāi Sèng-pîⁿ-hōe m̄-nā tông-ì i kè-siok sú-ēng lú-sèng keng-i-sek, koh iau-kiû ha̍k-hāu ài chú-tōng iâⁿ-chō sèng-pia̍t iú-siān khoân-kéng, put-tek kî-sī khòa-sèng-pia̍t, chi-chhî khòa-sèng-pia̍t-chiá chiàu sèng-pia̍t jīn-tông sú-ēng kong-kiōng siat-si. Tâi-Su-tāi hāu-tiúⁿ Ngô͘ Chèng-kí piáu-sī, kai-chhù sū-kiāⁿ sī ha̍k-hāu chìn-chi̍t-pō͘ khí-chō sèng-pia̍t iú-siān khoân-kéng ê khòe-ki. 2024 nî, Iûⁿ Sū-chheng téng lâng hù Tiong-soán-hōe tîn-chêng, iau-kiû soán-kú jîn-oân sin-hūn giām-chèng ê sî, kái-siān tùi khòa-sèng-pia̍t-chiá ê thāi-tō͘. Siâng-sî kó͘-lē to-goân sèng-pia̍t cho̍k-kûn, hêng-sú chèng-tī koân-lī.

Choan-tióng

2005 nî, Iûⁿ Sū-chheng siūⁿ-beh kiàn-tì bāng-chām, só͘-í su-iàu khai-hoat bāng-lō͘ thêng-sek; khiok-sī i hoat-hiān chá-kî ê Windows NT khoân-kéng oh-tit khai-hoat ta̍k-chióng chū-tēng kong-lêng, su-iàu i-nāi hē-thóng thê-kiong ê kong-lêng. In-chhú koat-tēng choán-ǹg Linux khoân-kéng.

Iûⁿ Sū-chheng choan-tióng Perl, PHP, Java, C gú-giân, C++, BASIC, JavaScript téng-téng gú-giân, sī Apache OpenOffice ê khai-hoat koán-lí thoân-tūi sêng-oân, pēng-chhiáⁿ hū-chek koán-lí OpenOffice lūn-tôaⁿ. 2010nî, i tī COSCUP ián-káng「OpenOffice ê Mô͘-su̍t」, tián-sī án-chóaⁿ sú-ēng oán-toaⁿ iâu-khòng OpenOffice Impress. 2012 nî, Iûⁿ Sū-chheng ēng OpenOffice sêng-oân sin-hūn chham-ka ApacheConEU. Í-gōa, Iûⁿ Sū-chheng koh-sī Oracle chū-iû káng-su, chú-iàu leh kà OpenOffice kah Perl.

Koan-tiám

Iûⁿ Sū-chheng tì-le̍k sèng-pia̍t siong-koan gī-tôe. I jīn-ûi chu-sìn kang-têng léng-he̍k ê lú-sèng put-chiok, chú-iàu goan-in kah「lú-sèng bûn-kho khah-gâu, lâm-sèng sò͘-lí khah-gâu」ê khek-pán ìn-siōng ū koan-hē. Siâng-sî iā jīn-ûi chu-sìn kang-têng léng-he̍k sêng-oân in-ūi lú-sèng jîn-sò͘ chió, chō-sêng tùi lú-sèng sán-seng te̍k-sû thāi-gū, iā ōe hō͘ lú-sèng kám-kak ngāi-gio̍h. Chiam-tùi khek-pán ìn-siōng būn-tôe, i jīn-ûi kai-tong ēng tùi「lâng」ê chun-tiōng chòe ki-pún tiâu-kiāⁿ, cheng-ka lú-sèng chham-ú kai-koat. Chiam-tùi lâm-lú ê te̍k-chit, Iûⁿ Sū-chheng jīn-ûi goân-thâu sī khoân-kéng ióng-sêng, m̄-sī sèng-pia̍t pún-chit ê chha-īⁿ.^[6]

Chù-kha

↑ Women in Free and Open Source Software in Taiwan，又稱「好自由小組」

Chham-khó Chu-liāu

↑ 元維基編者. "Wikimedia Taiwan/Organization". goân-loē-iông tī |archive-url= requires |archive-date= (help) hőng khó͘-pih. Unknown parameter |archive date= ignored (|archive-date= suggested) (help)
↑ Imacat
1 2 3 Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "ithome"
1 2 Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "verymulan"
↑ Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "ner"
↑ Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "csdn"

[1] Women in Free and Open Source Software in Taiwan，又稱「好自由小組」

[2] 元維基編者. "Wikimedia Taiwan/Organization". goân-loē-iông tī |archive-url= requires |archive-date= (help) hőng khó͘-pih. Unknown parameter |archive date= ignored (|archive-date= suggested) (help)

[userpage-3] Imacat

[ithome-4] 1 2 3 Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "ithome"

[verymulan-5] 1 2 Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "verymulan"

[ner-6] Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "ner"

[csdn-7] Ín-iōng chhò-gō͘: Bû-hāu ê <ref> tag; chhōe bô chí-miâ ê ref bûn-jī "csdn"

[chù 1]

[1]

[2]

[3]

[4]

[5]

[6]