Kiú-liông-kang

Wikipedia (chū-iû ê pek-kho-choân-su) beh kā lí kóng...

Kiú-liông-kang (九龍江), Hok-kiàn-séng tē-jī tōa ê khe, sī iû Sai-khe kah Pak-khe chit 2-tiâu siāng-kài chú-iàu ê chi-liû chó·-sêng.

Kó·-tián[siu-kái | kái goân-sí-bé]

Kūn-kù Liông-khe Kōan-chì ê kì-chài, Liông-khe-kōan (chit-chūn ê Liông-hái-chhī) kiān kōan tī Lâm-tiâu Niû-bú tè Tāi-tông 6 nî (kong-gôan 540 nî), thiaⁿ-í-kóng hit-chūn-á ū lâng khòaⁿ tio̍h 9 bóe liông tiàm khe-á lāi leh sńg-chúi, in-ūi chit-ê kó·-tián ê koan-hē, lō·-bóe Chiang-chiu chit-ê só·-chāi soah chôan hō·-miâ kiò-chò Liông-khe. Hiān-chú-sî, lâi-kàu Pak-khe Liông-thâm chit-ê só·-chāi, (tī Hôa-an-kōan Hong-san-tīn) iáu-koh ē-tàng khòaⁿ tio̍h soaⁿ-khàm ê chio̍h-piah téng khek tio̍h "九龍戲江處" chit-5-ê tōa jī. Khó-kiàn, Liông-khe-kōan kah Kiú-liông-kang chit-2-ê tē-hō· miâ ê lâi-le̍k, sī kāng-khóan--ê.

Hiang-kang[siu-kái | kái goân-sí-bé]

Le̍k-sú-siōng, chi̍t-kóa-á Chiang-chiu ê tha̍k-chheh-lâng kā Kiú-liông-kang kiò-chò "Hiang-kang" (薌江). Bêng-tiâu Hông-bú 23 nî ( 1630 nî ) ê tiong-kan, chāi-tē-lâng Iûⁿ Gàn-chiong (楊彥章) kah Âng Kan (洪干) hiàng Chiang-chiu tī-hú kah Liông-khe tī-kōan siāng-su, iau-kiû kiàn "Hiang-kang Su-īⁿ" (薌江書院), tit-tio̍h phoe-chùn. Hiang-kang Su-īⁿ chit-keng hàn-o̍h-á (o̍h-tn̂g) tī Bêng, Chheng 2 ê tiâu-tāi lâi kóng, ôan-á chiâⁿ chhut-miâ tī--leh. Āu--lâi, "Hiang-kang" chit-ê miâ soah piàn-chòe Kiú-liông-kang ê pia̍t-chheng, liáu-āu iu-koh ta̍uh-ta̍uh-á chiâⁿ-chòe Chiang-chiu chit-ê tē-hō· ê phiau-chì.