Lars von Trier

Lars von Trier, Tan-be̍h ê tiān-iáⁿ tō-ián. I tī 11 hòe ê sî tō khai-sí iōng 8mm té-phìⁿ siok-iáⁿ-ki phah tiān-iáⁿ. 1979 nî khó ji̍p Tan-be̍h Tiān-iáⁿ Ha̍k-hāu. 1984 nî phah thâu chi̍t phō tn̂g-phìⁿ Forbrydelsens element, chham-ha̍p Tek-kok piáu-hiān-chú-gī kah Bí-kok o͘-sek tiān-iáⁿ ê hong-keh, tī Tē-37 Kài Hoat-kok Cannes Tiān-iáⁿ-cheh tit tio̍h Chòe-ka Ki-su̍t Chióng.

1991 nî, tō-ián Zentropa, tī Tē-44 Kài Cannes Tiān-iáⁿ-cheh tit tio̍h Choân-kiû Ki-su̍t Tāi-chióng. 1995 nî, kah kî-thaⁿ ê siàu-liân tō-ián kiōng-tông chhiam-sú "Dogme 95 Soan-giân". 1996 nî phah ài-chêng-phìⁿ Breaking the Waves, tī Tē-49 Kài Cannes Tiān-iáⁿ-cheh tit Phêng-sím-thoân Tāi-chióng. 1999 nî phah "The Idiots", tī Tē-49 Kài Berlin Tiān-iáⁿ-cheh tit Gîn-hîm Chióng.

2000 nî tō-ián Dancer in the Dark, tī Tē-53 Kài Cannes Kok-chè Tiān-iáⁿ-cheh tit Chòe-ka Kim-chong-lū (金棕櫚) Chióng. Kî-thaⁿ chok-phín iáu ū Riget, Dogville, Melancholia, Nymphomaniac téng. I ê chok-phín kiông-tiāu si̍t-giām-sèng kah kí-lo̍k-sèng, ū chin chē hoán-poān ê cheng-sîn. ​ ​