Liû-hông-tó Chiàn-ia̍h

Wikipedia (chū-iû ê pek-kho-choân-su) beh kā lí kóng...
Liû-hông-tó Chiàn-ia̍h ê tiûⁿ-kéng

Liû-hông-tó Chiàn-ia̍h (Eng: Battle of Iwo Jima; Ji̍t: 硫黄島の戦い) sī Bí-kok kap Ji̍t-pún siang-hong tī Tē-jī-chhù Sè-kài Tāi-chiàn Thài-pêng-iûⁿ Chiàn-cheng lāi ê chi̍t tiûⁿ chiàn-ia̍h, ùi 1945 nî 2 goe̍h 19 hō sio-chiàn kàu 3 goe̍h 26 hō ûi-chí. Liû-hông-tó Chiàn-ia̍h sī Thài-pêng-iûⁿ Chiàn-cheng lāi siōng-kài kek-lia̍t ê kî-tiong chi̍t tiûⁿ chiàn-tò͘; tī chiàn-tò͘ ê kî-kan, Ji̍t-pún kun-tūi ngē-siú Liû-hông-tó, tān-sī chòe-āu iáu-sī khì-hō͘ Bí-kun kong-chiàm. Tī chiàn-tò͘ tiong, Bí-kun lóng-chóng hi-seng 6,821 lâng; Ji̍t-pún ê 22,786 ūi peng-á, tû-liáu 1,083 khì-hō͘ Bí-kun oa̍h-lia̍h, chhun-ê tiō lóng-chóng tīn-bông. Chit chhù chiàn-tò͘ liáu-āu, Bí-kun kā Liû-hông-tó kiàn-siat chò chiàn-tò͘-ki ê ki-tiûⁿ, ūi B-29 hō͘-hâng, tōa-tōa thê-seng Bí-kok tùi Ji̍t-pún chèng-tī kiam kang-gia̍p hu̍t-sim ê Tang-kiaⁿ ê chiàn-lio̍k hong-chà ê hāu-lu̍t.