Ngô͘ To̍k-liû

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋

Ngô͘ To̍k-liû (吳濁流; 1900 nî 6 goe̍h 28 ji̍t – 1976 nî 10 goe̍h 7 ji̍t) sī chi̍t ūi Tâi-oân chin ū-miâ ê si-jîn, siáu-soat-ka kiam kì-chiá. I-ê pún-miâ hō-chò Ngô͘ Kiàn-tiân (吳建田), sī Sin-tek-koān Sin-po͘-tìn chhut-sin ê Kheh-lâng. Ngô͘ To̍k-liû it-seng siōng-kài chhut-miâ ê tiông-phian siā-hōe phe-phoàⁿ siáu-soat ū A-sè-a ê Ko͘-jî, Bû-hoa-kó kap Tâi-oân Liân-khiàu. Ngô͘ To̍k-liû bat tòa tī Biâu-le̍k kap Tiong-kok Lâm-kiaⁿ, āu-lâi poaⁿ-sóa kàu Tâi-pak-chhī seng-oa̍h. Ùi Tâi-pak Su-hoān pit-gia̍p, ka-ji̍p Le̍k-siā chò si-jîn, chiâⁿ-chò Kheh-ka bûn-ha̍k ê tiōng-iàu chok-ka. Lēng-gōa, i iā bat chhòng-pān Tâi-oân Bûn-gē cha̍p-chì, lo̍h-bóe tī i boán-liân ê sî-chūn koh siat-li̍p Ngô͘ To̍k-liû Bûn-ha̍k-chióng, sī Tâi-oân tī Jī-chhù Tāi-chiàn liáu-āu tiōng-iàu ê bûn-ha̍k chok-ka, hō͘ lâng hō-chò "thiat-hiat si-jîn" (鐵血詩人).