Pak-hái Sió Eng-hiông

Pak-hái Sió Eng-hiông (hàn-jī: 北海小英雄) sī 1 chhut 1970 nî-tāi ê bàng-gah iáⁿ-chi̍p. Ji̍t-pún ê Zuiyô (瑞鷹) Khì-gia̍p Kong-si kah Tek-kok ê Taurus Film ha̍p-chok chhut-phín. Kò͘-sū chham-khó Sverige chok-ka Runer Jonsson ê goân-tù Vicke Viking (1963). Ji̍t-bûn phìⁿ-miâ hō 小さなバイキングビッケ ("Sió Viking Bikke"), Tek-gí miâ hō Wickie; Tâi-oân hoan-e̍k chò 北海小英雄.

Hòng-sàng

Chit chhut tī 1974 nî 1-goe̍h tāi-seng tī Tek-kok kong-kiōng tiān-sī-tâi ZDF hòng-sàng; 4-goe̍h tī Ji̍t-pún Huzi Tiān-sī-tâi hòng-sàng. Lóng-chóng 77 a̍h-sī 78 chi̍p, 1 chi̍p 25 hun-cheng. Kî-thaⁿ ê Europa kok-ka (Italia, Kē-tē-kok, Liân-ha̍p Ông-kok) mā ū chò. Tâi-oân tī 1978 nî 5-goe̍h 16 ji̍t khai-sí tī Tâi-sī poaⁿ, kàu-kah 8-goe̍h 8 ji̍t soah. Bat tī 1982 nî 1-goe̍h 27 ji̍t, 1990 nî 5-goe̍h 25 ji̍t têng-poh. 2004 nî 8-goe̍h tī Tong-sim Iù-iù-tâi koh-chài têng poaⁿ--1-piàn (pō·-hūn jîn-bu̍t ū hō sin miâ, mā têng phoè-im).

Kò͘-sū

Kò͘-sū ê chú-kak Sió-ui (小威) hām 1 tīn Viking-lâng tòa tī Pak Europa ê Pò͘-lân-chhoan (布蘭村, Flake). Sió-ui chit ê cha-po͘ gín-á bô chhiūⁿ in a-pa Halva Thâu-bo̍k sī 1 ê piau-chún ê Viking ióng-sū. I tian-tò khah gâu chiam-tùi tú--tio̍h ê būn-tê seng siūⁿ thàu-thiat chiah lo̍h-chhiú chìn-hêng. Halva bē-tàng liáu-kái i ê kiáⁿ ê choh-hoat, sui-jiân kóng kiàn-pái to-sī Sió-ui sêng-kong pang-chān in ta̍k-ê tō· kòe lân-koan.

• Kha-siàu: Sió-ui (Wickie), O͘-liông (Halvar), Ylva, Ylvi, Gilby, Tjure, Snorre, Urobe, Gorm, Ulme, Faxe

Chè-chok

Ji̍t-pún pán:

• Tō-ián: Hirosi Saito, Noboru Isiguro, Kiyosi Harada.
• Ōe-tô͘: Siniti Tuzi.
• Kò·-sū: Yuzi Husano, Hirosi Kaneko, Akira Saiga, Takesi Hidaka, Tikao Katui.

Tâi-oân pán:

• Chú-tê-koa tē-1-pān: sû Tēng Tìn-siong (鄧鎮湘), khek: Ong Se̍k-choân (汪石泉)
• Chú-tê-koa tē-2-pān: sû/khek: Tiuⁿ Bín-siâng (張敏祥)

Gōa-pō͘ liân-kiat

• Little Gems - Vicky the Viking - Eng-bûn-pán ê kài-siāu, ū chin chē tiuⁿ tô͘.
• Ji̍t-bûn koaⁿ-hong chām
• Tâi-oân pán ê chú-tê-koa Archived 2004-10-23 at the Wayback Machine.