Pak-iûⁿ Kun-hoa̍t

Pak-iûⁿ Kun-hoa̍t (北洋軍閥) sī Tiong-hoâ Bîn-kok chho͘-kî siōng tiōng-iàu ê Bîn-kok kun-hoa̍t sè-le̍k chi-it, iû Oân Sè-khái só͘ pôe-si̍t ê Pak-iûⁿ-kun ê chú-iàu chiòng-léng lâi cho͘-sêng. Oân Sè-khái chip-chiáng chèng-khoân liáu-āu, i-ê Pak-iûⁿ-kun ê chú-iàu chiòng-léng hiông-pà-it-hong; tī 1916 nî Oân Sè-khái kòe-sin liáu-āu, in-ūi bô-lâng ū-hoat-tō͘ léng-tō kui-ê Pak-iûⁿ kun-tūi kap chèng-khoân, tì-sú chia-ê léng-tō-chiá kok-chū tī tē-hng koah-kì, chòe-āu hun-lia̍t. Pak-iûⁿ Kun-hoa̍t miâ-gī-siōng sī chiap-siū Pak-iûⁿ Chèng-hú ê chi-phòe, tān-sī Pak-iûⁿ Chèng-hú si̍t-chè-siōng sī iû tī bô-kāng sî-kî sè-le̍k pí-kàu kiông ê chi̍t hong só͘ khòng-chè, Pak-iûⁿ Chèng-hú tùi chi̍t-sì-kè ê kun-hoa̍t sè-le̍k ê si̍t-chè khòng-chè khah bô-la̍t.