Pang-chān:地動

地動，簡單講，是一種發生佇地球外殼兮震動。

宇宙空間內兮萬物攏是不斷咧運動，地球嘛無掠外。運動會產生能量，當當地球內部兮能量粒積甲超過一定兮程度，地殼接載袂牢，地球地底兮岩層出現裂痕佮攝襇，了後地底兮能量著chôaⁿ規大垺攏總濺出來，並且形成地動波向四箍輾轉湠出去，造成地動。一般來講，凡若強烈兮地動過後，往往會閣相連紲出現一寡仔小地動，或者講餘震。

地動波

地動波是一種彈性波，分做橫波佮直波兩種。橫波傳播兮速度是3~4公里/秒、直波傳播兮速度是5~6公里/秒。橫波致使塗跤hi̍t佮搖、直波致使塗跤摵佮tiō。地動發生兮時，直波先到、橫波晏到，直波隨來隨去、橫波那來那猛。橫波是造成地面建築物損害兮主要因素。

地動兮大細

表示地動大細兮標準，有震級佮烈度兩个指標。

地動兮類型

分做人為佮天然兩種。

地動兮危害

地動是地球頂主要兮自然災害。地球頂差不多每工攏有地動咧發生，其中大多數是小地動，並且發生佇偏遠兮山區。強烈兮地動一旦發生佇人類生活區，往往會造成大規模兮傷亡佮損失。

陸地上兮大地動定定致到厝塌、樹仔倒，崩山裂地，人畜傷亡。

大海兮大地動往網閣會引起海漲，造成閣較大兮災難。

如何佇地動兮時保護咱家己

發生這款天災兮時陣，代先是愛冷靜，千萬毋通生狂。若准明顯感覺著地動兮時，著愛趕緊來逃生，會記毋好四界傱，覕兮時陣毋好走傷遠，愛注意保護頭殼。

地動發生兮時，盡量愛趕緊離開厝間，走去較闊曠、較通俍兮所在閃避。準講暫時無法度離開厝間兮，會當覕踮遐兮結構較絚（華語：牢固）、較有擋頭兮家具下面，抑是一寡仔較狹、較siok-kiat兮房間仔內，按呢著會當減少著傷个機會。不而過，當當地動有回落來个時，著愛趕緊來離開蹛个所在。