Pang-chān:百濟

三國早期兮情勢。

百濟（韓國語：百濟 / 백제 ^Baekje），又閣號做南扶餘（南扶餘 / 남부여 ^Nambuyeo），是古早徛佇朝鮮半島兮君主國家，屬於朝鮮三國之一。

歷史

建國

根據高麗史冊《三國史記》兮記錄，西元前18年，高朱蒙兮兩位後生沸流佮溫祚 (chó͘)，帶領一陣高句麗儂到半島南方入侵馬韓，建立新國家伯濟。溫祚佇慰禮城建國，國號十濟；沸流佇彌 (Bî)鄒 (-chau-)忽 (hut)建國，毋過遐傷倚海，水傷過鹹，彌鄒忽兮百姓漸漸攏搬徙去慰禮城。沸流要求祚愛共王位讓予家己，去予溫祚拒絕。兩兄弟相戰，沸流戰敗自殺；溫祚才共國號改做百濟。

擴張

百濟古爾王時代，百濟兮國家制度已經完備。根據《日本史記》兮記錄，249年，百濟兮勢力擴張到洛東江佮新羅和伽倻 (Ka-iâ)相倚。300年，中國晉朝發生八王之亂；百濟開始佮高句麗相爭樂浪郡。《日本史記》記錄，367年，百濟第一擺佮日本有外交往來。

近肖古王時代，百濟向北入侵高句麗，同時嘛漸漸消滅賰兮馬韓部落；這陣是百濟上蓋興旺兮歷史時期。這个時期除了戰爭，百濟嘛自動吸收濟濟漢文化佮中國技術。遮兮物件嘛流傳去日本，其中包含漢字、佛教佮陶器。

熊津時期

五世紀，高句麗向南入侵百濟；475年，高句麗攻擊慰禮城。475年至538年兮期間，百濟遷都熊津。熊津佇山區，是防禦高句麗軍隊進攻真好兮所在；毋過按呢，百濟佮外口着較無交流。另外，因為熊津較倚新羅，因此兩國結盟，共同對抗北方兮高句麗。

泗沘時期

523年，百濟共首都徙去位佇平埔兮泗沘 (Sù-pí)，並且共國號改做「南扶餘」。

660年，唐佮新羅做伙攻擊百濟，落尾百濟滅亡，原本兮領土予唐佮新羅瓜分，國王佮萬外百姓夆俘虜去中國洛陽。