Pang-chān:Tâi-oân-ōe

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋

台灣話,或者叫台語台灣語,是主要佇台灣流通兮一款言語,算是闊曠意思兮閩南語當中一款,是台灣60%人口傳統上兮母語。

號名[siu-kái | kái goân-sú-bé]

對台灣話本身兮用語,對本言語兮號名其中一款是河老話;「河老」即个概念,照呼音也有講「鶴佬」,可能兮語源是廣東系兮客儂廣府儂潮州等他族兮稱呼,對福建較罕儂知。

佇學術界一般兮認識內面,台灣話算閩南語一種,總是台灣話用者本身佇口語上較罕咧用「閩南語」稱呼家己當咧講兮言語。對即款號名,若特別指名台灣兮分支,通講台灣閩南語。另外佇一寡場合,「台灣語」、「台語」等用語,予儂用來指各款台灣兮言語整體。

分類地位佮組成[siu-kái | kái goân-sú-bé]

閩南語傳統上定予儂講是一个方言。毋過若考慮著互相非理解性,閩南語是算漢語族(屬漢藏語系兮一份)下底兮一款言語。

近今台灣話主流腔口,主要是一款漳泉濫,也就是原來佇台灣分別流通佇部分地方兮漳州話泉州話兩款話相濫了後產生兮。除了漳泉兮來源,潮州話嘛占了真少份兮影響,潮州系兮人群佇台灣會當講已經融入在地河老儂內面。

福建或者是南洋等其他閩南語分支較無仝兮部分之一,是台灣話較濟來自日本話或者是經過日本話傳入兮外來語,另外也有少份南島語系兮成分,佮部分因為荷蘭佮鄭氏兼清國統治等特殊歷史背景影響產生兮詞彙佮呼音。戰後,佮華語接觸兮台語閣進一步受影響產生一寡語音佮漢字詞呼音文白選擇兮變化。