Siang-liân Tiúⁿ-ló Kàu-hōe

Siang-liân Tiúⁿ-ló-kàu-hōe
	; Siang-liân Tiúⁿ-ló-kàu-hōe Kiàn-tiok-bu̍t chiàⁿ-bīn
Chong-kàu
Léng-tō-chiá	Chú-jīm bo̍k-su: Chhòa Chèng-tō
khai-kong nî	1913 nî
Só͘-chāi
Só͘-chāi	Tâi-oânTâi-pak-chhī Tiong-san-khu Tiong-san pak-lō͘ 2 tōaⁿ 111 hō
Website
	www.slpctaipei.org

Tâi-oân Ki-tok Tiúⁿ-ló-kàu-hōe Siang-liân kàu-hōe, koh chheng-chò Siang-liân Tiúⁿ-ló-kàu-hōe iah-sī Siang-liân kàu-hōe , chū-chí tī Tâi-oân Tâi-pak-chhī Tiong-san-khu Tiong-san pak-lō͘ 2 tōaⁿ 111 hō, siat-li̍p tī 1913 nî. Khí-thâu sī "Gû-po͘-chng káng-gī-só͘", sī thê-kiong gōa-kok soan-kàu-su chū-hōe ê tiûⁿ-só͘; āu-lâi sêng-li̍p Siang-liân kàu-hōe, sī Tâi-pak-chhī chá-kî kiàn-li̍p ê lé-pài-tn̂g chi-it, sio̍k-tī Tâi-oân Ki-tok Tiúⁿ-ló-kàu-hōe Chhit-chhiⁿ Tiong-hōe.

Le̍k-têng[siu-kái | kái goân-sí-bé]

1913 nî, Tâi-pak-chhī Tiong-san pak lō͘ hit tah, pha-hng ê chio̍h-thâu-á-lō͘ téng-bīn khì chi̍t keng "Gû-po͘-chng káng-gī-só͘". Hit-tong-sî Tâi-pak-chhī siōng-tōa ê nāu-jia̍t só͘-chāi sī Tōa-tiū-tiâⁿ, siâⁿ-lāi (Hêng-iông-lō͘ Se-mn̂g-teng) kap Báng-kah téng só͘-chāi, Siang-liân tē-khu sī sio̍k-tī "Chhân-chng". Tiong-san pak-lō͘ chit tiâu chio̍h-thâu-á-lō͘ kan-ta 2, 3 tâi chhia thang kè, jî-chhiáⁿ khám-khia̍t bô pêⁿ, óa tang-pêng ū chi̍t tiâu tōa chui-kau ti̍t thàng-kàu Îⁿ-soaⁿ-á. Kan-ta chi̍t-kóa pêⁿ-chhù-á, kî-thaⁿ lóng-sī chhân-hn̂g kap chháu-po͘, só͘-í lông-ka ê chúi-gû nā bô lê-chhân, tō pàng in tī chháu-po͘ chia̍h-chháu, só͘-í kiò-chò "Gû-po͘-á". Chit-má ê Sêng-ian Tiong-ha̍k kap i ê tùi-bīn, ū 2 ê tōa-pi (pi-tn̂g) sio-liân, chiah iā kiò-chò "Siang-liân-pi". Hit-tong-sî khí-chō poh-hōaⁿ khí bô hó-sè, it-tàn chò hong-thai, Siang-liân hit-tah lóng chò-tōa-chúi, chúi-tiòng ê sî, bat ū 5, 6 kong-chhioh koân, ài khai 2 kang chúi chiah ē-tàng thè--khì, tiāⁿ-tiāⁿ khòaⁿ-kìⁿ Tân Khe-chùn bo̍k-su（1895 nî-1990 nî, bo̍k-ióng Siang-liân kàu-hōe 55 tang）kò tek-pâi-á thàm-hóng hōe-iú.

1912 nî, Kàu-sū-hōe tī Tâi-pak Gû-po͘-chng kiàn-li̍p Má-kai Kì-liām Pēⁿ-īⁿ. In-ūi Kàu-sū-hōe kám-kak-tio̍h ū su-iàu tī hù-kīn siat-li̍p chi̍t-keng káng-gī-só͘ hong-piān lâi thoân-hok-im, chū-án-ne, 1913 nî ti kin-á-ji̍t ê Bîn-seng se-lō͘ Tâi-pak Chhī-chèng-hú Kéng-chhat-kio̍k Tiong-san Jī phài-chhut-só͘ piⁿ-á siat-li̍p "Gû-po͘-chng káng-gī-só͘", tō-sī Siang-liân kàu-hōe ê chian-sin. Āu-lâi in-ūi kám-kak-tio̍h Gû-po͘-chng káng-gī-só͘ só͘-chāi siuⁿ sè, só͘-í 1917 nî tī kin-á-ji̍t ê Bîn-seng tang-lō͘ kap Tiong-san pak-lō͘ ê siang-chhe lō͘-kháu khí tē-it keng chèng-sek ê lé-pài-tn̂g, kā chit-ê káng-gī-só͘ chèng-sek kái-miâ chò Siang-liân kàu-hōe. 1939 nî Tâi-pak-chhī-e̍k-só͘ ūi-tio̍h beh khok-tián Tiong-san pak-lō͘, kàu-tn̂g hông thiah. Kàu-tn̂g chiū ti hiān-kim ūi-tì heng-kiàn nn̄g chàn lâu ê lé-pài-tn̂g.

Siang-liân kàu-hōe hù-sio̍k ê ki-kò͘ pau-koat Siang-liân Sī-chiòng Koan-hoâi Ki-kim-hōe, Siang-liân an-ióng-tiong-sim, Siang-liân Iù-tī-hn̂g téng-téng. Kî-tiong Siang-liân an-ióng-tiong-sim phòe-ha̍p chèng-hú ê chèng-chhek, khok-tián to-goân tn̂g-chiàu ho̍k-bū, jî-chhiáⁿ kap sán-ha̍k-kài khai-chhòng sin-ê sán-ha̍k ha̍p-chok bô͘-sek, li̍p-hoat-úi-oân Lí Lē-hun chheng-chàn Siang-liân an-ióng-tiong-sim sī "Tâi-oân an-ióng ki-kò͘ ê bô͘-hoān”.

Lé-pài kap Chū-hōe[siu-kái | kái goân-sí-bé]

Siat-li̍p Eng-gí, Tâi-gí, Hôa-gí lé-pài. Tī 2019 nî, ū 1426 miâ pôe-chhan hōe-oân, 265 miâ bī-pôe-chhan hōe-oân, 220 miâ che̍k-chāi-jîn-put-chāi hōe-oân (chí chhiau-kè 1 nî bô chham-ka lé-pài ê hōe-oân).

Siang-liân káng-chō[siu-kái | kái goân-sí-bé]

Ūi-tio̍h beh hoat-hui koh-khah tōa ê hāu-kó, tiāⁿ-tiāⁿ iau-chhiáⁿ kú-hêng Siang-liân káng-chō. Le̍k-nî lâi káng-chō ê chú-tê pau-koat "Khòa-sè-kí Siōng-pan-cho̍k Lí-châi kap Sim-lêng Chēng-hòa ê Siang-iâⁿ Chhek-lio̍k", "Siā-khu Bûn-hòa ê Súi hun-hióng", "Au-chiu Ū-miâ kàu-tn̂g Sûn-lé", "Tân Tì-hiông lia̍t-sū kap Thài-goân Gō͘ Lia̍t-sū Sū-chek", "Jīn-bat Hì-sòaⁿ-gâm" téng-téng.

Kiàn-tiok[siu-kái | kái goân-sí-bé]

Siang-liân Tiúⁿ-lo-kàu-hōe tī 1970 nî 9 ge̍h 29 hō chèng-sek sêng-li̍p "Siang-liân-tōa-lâu Heng-kiàn Úi-oân-hōe", iû nn̄g ūi bo̍k-su, saⁿ ūi tiúⁿ-lo kap sì ūi chip-sū chō͘-chiâⁿ hū-chek tiû-kiàn sū-hāng.

1971 nî 4 ge̍h 11 hō kú-hêng tōa-lâu tāng-thó͘ tián-lé, si-kang chóng-kiōng khai 608 kang, kang-têng ê siat-kè, kàm-kang cheng-phìn Lîm Khèng-hong kiàn-tio̍k-su sū-bū-só͘ hū-chek, kang-têng si-kang iû Sam-goân Êng-chō-chhióng tit-piau, 1972 nî 2 ge̍h tè choân-pō͘ oân-kang, 1973 nî 3 ge̍h 3 ji̍t kú-hêng lo̍h-sêng hiàn-tông tián-lé. Sī 11 chân-lâu kǹg-kin khōng-ku-lí hiān-tāi se-sek kiàn-tiok, ū saⁿ pâi chiâⁿ súi ê chiam-téng siuⁿ chhái-sek po-lê chhái-kong-thang-á, tong-nî Tâi-pak khah hán-leh ū ko-lâu, Siang-liân-tōa-lâu piàn-chó siā-khu tē-piau. 1 - 2 lâu sòe hō͘ Chiong-hòa Gîn-hâng êng-gia̍p, 3 -6 lâu sòe hō͘ kong-si hâng-hō, 7-11 kau chū-iōng. 10-11 lâu sī lâu-tiong-lâu lé-pài-tn̂g koh kà-siat koán-hong-khîm, tī tong-nî sī hán-leh ū ê siat-pī.。

Gōa-pō͘ liân-kiat[siu-kái | kái goân-sí-bé]

Chham-khó Chu-liāu[siu-kái | kái goân-sí-bé]