Sin-pak Chhī-li̍p Sin-chng Iá-kiû-tiûⁿ

Sin-pak Chhī-li̍p Sin-chng Iá-kiû-tiûⁿ
新北市立新莊野球場
Ki-pún chu-liāu
Ūi-tì	Tiong-hôa Bîn-kok Sin-pak-chhī Sin-chng-khu; Hô-heng-ke 66-hō
Chō-piau	25°02′27″N 121°26′51″E / 25.04083°N 121.44750°E
Tāng-kang	1996 nî 7 goe̍h 4 hō
Khé-iōng	1997 nî 10 goe̍h 19
Gia̍p-chú	Sin-pak-chhī chèng-hú
Êng-ūn tan-ūi	Hù-pang Hān-chiòng
Chháu-po͘-á; piáu-chân	Thian-jiân chháu-po͘-á, Jîn-kang chháu-po͘-á
Kiàn-tio̍k-su	Chong-māi Kiàn-tio̍k-su Sū-bū-só͘
Chú; sêng-pau-siong	Oán-iông Êng-chō Kang-têng Kong-si
Iông-la̍p jîn-sò͘	12150 lâng
Tiôⁿ-tē; chhùn-chhioh	Tó-gōa-iá: 325 Eng-chhioh ; Tiong-gōa-iá: 400 Eng-chhioh ; Chiàⁿ-gōa-iá: 325 Eng-chhioh
Sú-iōng-chiá	Tâi-pak Thài-iông (1998 nî－2002 nî); Sêng-thài Thài-iông (2003 nî); Sêng-thài Cobras (2004 nî－2007 nî); Tiong-sìn Keng (2004 nî－2008 nî) (hui chèng-sek); dmedia Pō-liông (2008 nî) (hui chèng-sek); Hiaⁿ-tī Chhiūⁿ (hui chèng-sek); Tiong-sìn Hiaⁿ-tī (2014 nî) (hui chèng-sek); Hù-pang Hān-chiòng (2017 nî－)
Kong-kiōng; kau-thong	Tâi-pak Chia̍t-ūn: ; Tiong-hô Sin-lô͘ Sòaⁿ Sin-chng Chām

Sin-pak Chhī-li̍p Sin-chng Iá-kiû-tiûⁿ, koh hō-chò Sin-chng Thé-io̍k-tiûⁿ Iá-kiû-tiûⁿ, ūi-tī Tâi-oân Sin-pak-chhī Sin-chng-khu Sin-pak-chhī Sin-chng Thé-io̍k Hn̂g-khu lāi-té, kán-chheng Sin-chng Iá-kiû-tiûⁿ, tī 1997 nî lo̍k-sêng, sī Sin-pak-chhī siōng-tiōng-iàu ê iá-kiû-tiûⁿ. Hù-pang Chi̍p-thoân kî-hā ê Hù-pang Io̍k-lo̍k chū 2017 nî khai-sí í-keng tit-tio̍h 10-nî ê keng-êng-khoân, chiâⁿ-chò Tiong-hôa Chit-pāng Hù-pang Hān-chiòng ê chú-tiûⁿ.

Kiû-tiûⁿ Le̍k-sú

Sin-chng Iá-kiû-tiûⁿ tī 1997 nî lo̍k-sêng, sī Tâi-pak-koān (taⁿ Sin-pak-chhī) thâu-chi̍t-ê thang chò chit-pāng pí-sài tē-tiûⁿ ê iá-kiû-tiûⁿ.

Sin-chng Iá-kiû-tiûⁿ tú khí hó ê sî kui-ê kiû-tiûⁿ lāi-té kan-na ū chhit-chheng gō͘-pah se̍k, só͘-í hit-tang-chūn ê Tâi-pak-koān chèng-hú tī 2003 nî 10 goe̍h 5 hō oân-sêng gōa-iá chē-ūi ê chéng-kiàn kang-têng, kā kui-ê iá-kiû-tiûⁿ ê chē-ūi sò͘-liōng cheng-ka kàu chi̍t-bān se̍k, chit-hāng kang-têng mā pau-koat an-chong tōa-êng-bō͘, chiâⁿ-chò Tâi-oân tē-saⁿ-ê ū tōa-êng-bō͘ ê iá-kiû-tiûⁿ. 2005 nî Tâi-pak-koān chèng-hú tī lāi-iá khòaⁿ-tâi téng-koân koh khí 3-lâu khòaⁿ-tâi, hō͘ koan-chiòng-se̍k ê chē-ūi sò͘-liāng hùn-tōa-kàu 12,500 se̍k, tān-sī saⁿ-lâu khòaⁿ-tâi in-ūi siuⁿ-kòe thâu-chêng jî-chhiáⁿ koân-tō͘ mā bô-kàu, ē éng-hióng āu-piah koan-chiòng ê sī-iá, tiāⁿ-tiāⁿ ē kò͘-lâng-oàn. 2013 nî Sè-kài Iá-kiû Keng-tián-sài Chu-keh-sài, 2017 nî Tâi-pak Sè-tāi-ūn ê iá-kiû hāng-bo̍k téng-téng ê kok-chè-sài mā bat tī Sin-chng Iá-kiû-tiûⁿ kí-hêng.

2017 nî 7 goe̍h Hù-pang Io̍k-lo̍k sêng-kong tit-tio̍h Sin-chng Iá-kiû-tiûⁿ it-ti̍t kàu 2027 nî ê keng-êng-khoân. Hù-pang Hān-chiòng léng-tūi Chhòa Sêng-jû piáu-sī Sin-chng Iá-kiû-tiûⁿ ē chiâⁿ-chò Hù-pang Hān-chiòng bī-lâi ê chú-tiûⁿ, keh-nî ê 60-tiûⁿ chú-tiûⁿ sài-sū mā choân-pō͘ an-pâi tī Sin-chng. 2018 nî-thâu Chhòa Sêng-jû piáu-sī ē si̍t-hêng "Choân-HÙ-bú-CHoNG1", tio̍h-sī lāi-iá choân-chú-tiûⁿ. Siāng-sî kiû-tiûⁿ lāi mā-ū chin-chē kái-piàn, pau-hâm ke chng LED tiān-chú kè-hun-pán, lāi-iá khoân-chōng LED, iōng-chhan-khu, tùi Ji̍t-pún ín ji̍p-lâi ê ún-hêng bāng-á téng-téng ê siat-si, it, saⁿ-lúi-chhek ê jia̍t-khu í-á mā choân-pō͘ ōaⁿ-chò ū poe-á-kè ê í-á, lāi-iá pō͘-hūn chē-ūi kái chò pn̄g-toh-í-á (móa-hān-khu), só͘-í koan-chiòng-se̍k sò͘-liōng kiám kah 12,150 se̍k, lāi-iá mā ke siat chiâⁿ-chē tiān-sī lâi choán-pò, piān-só͘ mā choân-pō͘ hoan-sin, khòaⁿ-tâi nn̄g-pêng ê chàn-siaⁿ-thoân bú-tâi mā kái hō͘ khah óa-kīn kiû-bê. Lēng-gōa koh ū heng-kiàn sek-lāi gû-tiâu, sek-lāi táⁿ-kek-khu kah kiû-oân chhan-thiaⁿ, lāi-gōa-iá chháu-po͘-á kah âng-thô͘ mā choân-pō͘ tiông-sin chèng kòe kah hoan-sin, lóng-chóng khai chhiau-kòe 1-ek kho͘.

2024 nî kàu 2025 nî Sin-chng Iá-kiû-tiûⁿ koh chìn-hêng hoan-sin, pau-koat khok-kiàn jia̍t-khu, keng-sin chiàu-bêng hē-thóng, lēng-gōa kài-gōa-khu ê chháu-po͘-á mā kái-chò jîn-kang chháu-po͘-á, sī choân Tâi-oân thâu-chi̍t-ê siāng-sî sú-iōng thian-jiân kah jîn-kang chháu-po͘-á ê iá-kiû-tiûⁿ.

Tiōng-iàu Ji̍t-chí

Chit-pāng thâu-chi̍t-chiàn: 1997 nî 10 goe̍h 19 (chóng-koan-kun-sài), 1998 nî 3 goe̍h 1 hō (lē-hêng-sài)
Bêng-seng-sài: 1998 nî, 1999 nî, 2001 nî, 2004 nî, 2006 nî, 2012 nî, 2016 nî, 2019 nî
Kùi-āu-sài: 2007 nî, 2018 nî
Chóng-koan-kun-sài: 1997 nî, 1998 nî, 1999 nî, 2001 nî, 2002 nî, 2004 nî, 2006 nî, 2008 nî, 2009 nî, 2010 nî, 2013 nî, 2014 nî, 2015 nî

Kau-thong Chu-sìn

Kong-chhia

Sin-chng Iá-kiû-tiûⁿ Chām: 299, 299 khu-kan-chhia (Sam-tiông Kheh-ūn, Tōa-to͘-hōe Kheh-ūn), 99, Nâ 18 (Siú-to͘ Kheh-ūn, Tâi-pak Kheh-ūn), 805 (Tâi-pak Kheh-ūn, Sam-tiông Kheh-ūn), 616, 820 (Tiong-heng Bá-suh), lo̍h-chhia liáu-āu tio̍h ē-sái khòaⁿ-tio̍h kiû-tiûⁿ.
Sin-thài Kok-tiong Lâm-chām: 615, 783, 786, 859, 1209 (Sam-tiông Kheh-ūn), 618 (Siú-to͘ Kheh-ūn), 845 (Siú-to͘ Kheh-ūn, Tâi-pak Kheh-ūn)
Sin-chng Thé-io̍k-koán It-chām: 257 (Tāi-iú Bá-suh)
Chia̍t-ūn Sin-chng Chām: 111^{[chù 1]}, 513, 635, 635 Hù-sòaⁿ, 636, 637, 638, 639, 810 (Sam-tiông Kheh-ūn), 235, 663, 802, 885, Nâ 2 (Siú-to͘ Kheh-ūn), 797, 799, 800, 801 (Chí-lâm Kheh-ūn), 1803 (Kok-kong Kheh-ūn), 9102 (Sam-tiông Kheh-ūn, Thô-hn̂g Kheh-ūn)

Kau-thong-chhia

Pang-lâm Soàⁿ Sin-po͘ Chām kàu Sin-chng Iá-kiû-tiûⁿ.

Tâi-pak Chia̍t-ūn

Tiong-hô Sin-lô͘ Sòaⁿ Sin-chng Chām lo̍h-chhia, tùi it-hō chhut-kháu chhut-chām liáu-āu, ti̍t-ti̍t-kiâⁿ kàu Tiong-hôa Kong-hn̂g lō͘-kháu (chha-put-to 4-hun-cheng) tò-oat, kàu Kong-hn̂g Hô-heng lō͘-kháu chiàⁿ-oat (5-hun-cheng), koh kiâⁿ 1-hun-cheng tio̍h ē-sái kàu--ah.