Tâi-Ji̍t Hî-gia̍p Hia̍p-tēng

Wikipedia (chū-iû ê pek-kho-choân-su) beh kā lí kóng...

Tâi-Ji̍t Hî-gia̍p Hia̍p-tēng (臺日漁業協議), chèng-sek miâ-chheng hō-chò A-tong Koan-hē Hia̍p-hōe ú Kong-ek Châi-thoân Hoat-jîn Kau-liû Hia̍p-hōe Hî-gia̍p Hia̍p-gī (亞東關係協會與公益財團法人交流協會漁業協議), sī Tâi-oân hām Ji̍t-pún tī 2013 nî 4 goe̍h 10 hō tī Tâi-pak-chhī ê Tâi-pak Pin-koán tiàu-khai tē-17 chhù Tâi-Ji̍t hî-gia̍p hōe-tâm liáu-āu só͘ chhiam-sú ê bûn-kiāⁿ, chiam-tùi siang-hong tī Tiò-hî-tâi lia̍t-sū chiu-ûi têng-thia̍p choan-sio̍k keng-chè hái-he̍k ê hî-gia̍p chok-gia̍p an-pâi ta̍t-sêng hia̍p-gī, pēng bô sia̍p-ki̍p siang-hong tùi chú-khoân ê chú-tiuⁿ. Chit hāng hia̍p-gī tī 5 goe̍h 10 hō seng-hāu. Tâi-oân hong-bīn, iû Gōa-kau-pō͘ só͘-sio̍k A-tong Koan-hē Hia̍p-hōe hōe-tiúⁿ Liāu Liáu-í tam-jīm thoân-tiúⁿ, Gōa-kau-pō͘, Hêng-chèng-īⁿ Hái-gān Sûn-hông-sú, Hêng-chèng-īⁿ Lông-gia̍p Úi-oân-hōe Hî-gia̍p-sú siong-koan jîn-oân chham-ka; Ji̍t-pún hong-bīn, iû Kong-ek Châi-thoân Hoat-jîn Kau-liû Hia̍p-hōe hōe-tiúⁿ Oohashi Mitsuo tam-jīm thoân-tiúⁿ, Ji̍t-pún Gōa-bū Séng, Lông-lîm Chúi-sán Séng só͘-sio̍k Chúi-sán Thiaⁿ, Hái-siōng Pó-an Thiaⁿ siong-koan jîn-oân chhut-se̍k.