Tâi-oân ê khì-hāu

Tâi-oân ê khì-hāu, Pak-hôe-kui-soàⁿ í-pak sī hù-jia̍t-tài kùi-hong khì-hāu, í-lâm sī jia̍t-tài kùi-hong khì-hāu.

Chóng-lūn

Tâi-oân ūi-tī kùi-hong khì-hāu ê hoān-ûi lāi, kùi-hong ê éng-hióng pí sìn-hong ê éng-hióng toā. 5 goe̍h kàu 9 goe̍h sī Tâi-oân ê hā-thiⁿ. Hā-thiⁿ chiân-kî siū-tio̍h se-lâm kùi-hong chhoā-lâi ê sip-tâm koh un-loán ê khì-hāu éng-hióng, lo̍h-bóe chiah siū-tio̍h hù-jia̍t-tài ko-ap ê éng-hióng; che sī iû jia̍t-tài hái-iûⁿ khì-thoân só͘ khòng-chè, ta̍k-kang khì-un tiāⁿ-tiāⁿ ta̍t-tiò 27 chì 35-tō͘, jî-chhiáⁿ sip-tō͘ mā koân. 7 goe̍h ê pêng-kin khì-un ta̍t-tiò 28-tō͘. Hā-thiⁿ tn̂g, tang-thiⁿ siong-tùi khah-té, tang-thiⁿ siū léng khong-khì ê éng-hióng, í Tâi-pak koan-chhek-chām ê un-tō͘ e-tàng hun-chò: tāi-lio̍k léng-khì-thoân, kiông-lia̍t tāi-lio̍k léng-khì-thoân, hân-tiâu ê éng-hióng; ka-siōng Tâi-oân sì-bīn khoân-hái, it-tàn cho-gū lâi-chū kīn-oá Baygal Ô͘ kap Tiong-kok tāi-lio̍k pak-hong hân-liû lâm-hā, mā in-ūi siū-tio̍h hái-iûⁿ loán-liû tiong-hô liáu hân-léng ê khì-un; ka-siōng chúi-khì chó͘-tòng, tì-sú khì-hāu mā pí-kàu un-loán; hām Hoâ-lâm iân-hái tē-khu, sīm-chí sī Hái-lâm-tó pak-pō͘ koh-khah un-loán. Che sī iû tāi-lio̍k khì-thoân só͘ khòng-chè. 1 goe̍h pêng-kin khì-un kài tī 15 chì 21-tō͘ chi-kan, tān-sī tī Ha̍p-hoan-soaⁿ, Gio̍k-san, Soat-san téng-téng soaⁿ-khu tē-tài iu-goân ū kàng-soat ê ki-hōe. In-chhú Tâi-oân hā-thiaⁿ sī se-lâm kùi-hong, tang-thiⁿ sī tang-pak kùi-hong, ū-sî mā ē siū-tio̍h khì-thoân ūi-tì lâi kái-piàn hong-hiòng; pí-lūn hā-thiⁿ 8 goa̍h Thài-pêng-iûⁿ ko-khì-ap só͘ chhoe ê tang-lâm hong; chhiu-thiⁿ ta-sò koh liâng-sóng ê tang-pak hong tī 10 goe̍h chin chia̍p-khoàⁿ.