Tè-kok Seng-bēng Hōe-siā Kū-hā
Tè-kok Seng-bēng Hōe-siā Kū-hā (帝國生命會社舊廈) sī Tâi-oân Tâi-pak-chhī ê ti̍t-hat chhī-tēng kó͘-chek, khí tī Tâi-pak-chhī Tiong-chèng-khu Phok-ài-lō͘ kap Pó-khèng-lō͘ oat-kak-á, óa Chóng-thóng-hú, chū-chí sī Tâi-pak-chhī Tiong-chèng-khu Phok-ài-lō͘ 162 hō.
Tè-kok Seng-bēng Hōe-siā Kū-hā tī 1910 nî chho͘-kiàn, goân-té sī Ji̍t-pún Tè-kok Seng-bēng Pó-hiám (Tiau-ji̍t Seng-bēng Pó-hiám ê chiân-sin) Tâi-pak Chi-tiàm ê pān-kong tōa-lâu. Tú khí hó ê sî-chūn ū tiong-iong chiam-thah ê hêng-sek; m̄-koh chho͘-kiàn oân-sêng liáu-āu cho-siū hiā-hāi, 1936 nî iû Tek-tiong Kang-bū-tiàm kái-kiàn, kā chiam-thah the̍h-tiāu, tī 1937 nî 6 goe̍h lo̍h-sêng. Jī-chhù tāi-chiàn liáu-āu, Tè-kok Seng-bēng Hōe-siā Kū-hā choán hō͘ Tiong-hôa Bîn-kok Gōa-kau-pō͘ kap Tâi-oân Gîn-hâng téng ki-koan sú-iōng. Che sī 1930 nî-tāi ê pān-kong kiàn-tio̍k-bu̍t ê tāi-piáu.
1998 nî 5 goe̍h 4 hō, Tâi-pak-chhī Chèng-hú Bîn-chèng-kio̍k hoat-pò͘ Hú-bîn-sam-jī Tē-8702427101 hō kong-kò, kā Tè-kok Seng-bēng Hōe-siā Kū-hā tēng chò "ti̍t-hat chhī-tēng kó͘-chek". Bo̍k-chiân Tè-kok Seng-bēng Hōe-siā Kū-hā ê sán-khoân sio̍k-î Tâi-oân Gîn-hâng, chit-má iû Tâi-oân Gîn-hâng Bûn-bu̍t-koán kap Tâi-oân Gîn-hâng Kok-chè-pō͘ ha̍p-iōng.