Tō-ka

Wikipedia (chū-iû ê pek-kho-choân-su) beh kā lí kóng...
(Tùi Tō-ka su-sióng choán--lâi)

Tō-ka (道家), he̍k-chiá Ló-Chong su-sióng (老莊思想), sī Tiong-kok Chu-chú Pek-ka lāi tiōng-iàu ê su-sióng ha̍k-phài chi-it, tī Chhun-chhiu Chiàn-kok sî-tāi í Ló-chú kap Chong-chú chò tāi-piáu. Se Hàn chho͘-kî, Hàn Bûn-tè kap Hàn Kéng-tè í Tō-ka su-sióng tī-lí kok-ka, hō͘ jîn-bîn thang ùi Chîn-tiâu ê khok-chèng tiong hiu-ióng-seng-sek, le̍k-sú-siōng hō-chò Bûn-Kéng chi tì. Lo̍h-bóe, Jû-ka ha̍k-chiá Táng Tiōng-su hiòng Hàn Bú-tè thê-chhiòng "to̍k chun Jû-su̍t" (獨尊儒術) ê chèng-chhek, Tō-ka chiông-chhú chiâⁿ-chò hui-chú-liû ê su-sióng. Sòng-tiâu í-āu, Chu-chú-ha̍k heng-khí, to̍k-li̍p ê Tō-ka su-sióng ki-pún-siōng í-keng bô-chûn-chāi ah.

Tō-ka sui-jiân bô khì hō͘ koaⁿ-hong chhái-la̍p, tān-sī iu-goân kè-sio̍k tī Tiong-kok kó͘-chá su-sióng ê hoat-tián tiong, pān-ián tio̍h tiōng-iàu ê kak-sek. Gūi-Chìn hiân-ha̍k kap Sòng-Bêng lí-ha̍k lóng ke-kiám iông-ha̍p tio̍h Tō-ka su-sióng. Hu̍t-kàu thoân-ji̍p Tiong-kok liáu-āu, Siân-chong ê hoat-tián mā siū-tio̍h Tō-ka ê éng-hióng kap khé-hoat.