Tōa-pêⁿ-nâ

Tōa-pêⁿ-nâ (大坪林) sī Tâi-oân Sin-pak-chhī Sin-tiàm-khu ē-té ê tē-hng, óa tī Kéng-bí-khe lâm kîⁿ. Pún tē-khu lāi-bīn ū Tâi-pak Chia̍t-ūn ê Tōa-pêⁿ-nâ-chām.

Tē-lí

Tōa-pêⁿ-nâ ê tang-lâm-pêng sī Chio̍h-tēng soaⁿ kûn, lēng-gōa saⁿ pêng sī Sin-tiàm-khe kap Kéng-bí-khe hô-chhoan-tē. Pún tē-hng pún-sin sī chi̍t-ê sió khóa ū 10 kong-chhiò chó-iū khí-lo̍h ê pêⁿ-po͘ tē-hêng.

Le̍k-sú

1753 nî, Tōa-pêⁿ-nâ gia̍p-chú Siau Biāu-heng (蕭妙興) thê-kiong só͘-chāi hō͘ Koeh Sek-liû (郭錫瑠) chhōa-thâu ê khún-hō͘ khui-chùn, 1760 nî-tāi goân-sêng.

Ji̍t-pún sî-tāi āu-kî pún tē-hng sī siat chò Sin-tiàm-ke ē-té ê tōa-jī, nā chiàu 1935 nî ê thóng-kè, ū jîn-kháu 7145 lâng. Hit-tong-sî ē tōa-jī ē-té, pau-koat Sin-tiàm, Chhit-tiuⁿ (七張), Pó-táu-chhù (寶斗厝), Jī-cha̍p-tiuⁿ, Cha̍p-jī-tiuⁿ, Cha̍p-sì-tiuⁿ téng sió-jī (小字).

Liân-kiat

• Google (2017-01-13). "大坪林" (Map). Google Maps. Google. 2017-01-13 khòaⁿ--ê.