Ko Chài-chiok

Ko Chài-chiok

Ko Chài-chiok (高再祝; 1887 nî 11 goe̍h 15 ji̍t – 1936 nî 10 goe̍h 31 ji̍t) sī Tâi-oân ê i-su kiam Tiúⁿ-ló-kàu-hōe tiúⁿ-ló. I sī Tâi-lâm chhut-sì--ê, tè-bé tī Kong-san khai-gia̍p chò i-seng, kiam tī Kong-san Kàu-hōe ho̍k-bū.

Lâi-le̍k

Ko Chài-chiok sī 1887 nî 11 goe̍h 15 tī Tâi-lâm chhut-sì--ê, i-ê lāu-pē sī Ko Tióng, Tâi-oân Tiúⁿ-ló Kàu-hōe ê chho͘-tāi thoân-tō-su; lāu-bú sī Chu Eng; in lóng-chóng ū 5-ê hāu-seⁿ kap 3-ê cha-bó͘-kiáⁿ.

Ko--sī tī 1904 nî 3 goe̍h tùi Tiúⁿ-ló-kàu Tiong-ha̍k chut-gia̍p. 1909 nî, koh tùi Tâi-oân Chóng-tok-hú I-ha̍k-hāu chut-gia̍p, liáu-āu ji̍p Tâi-lâm Pēⁿ-īⁿ chò chi̍t tang e khang-khòe.

1910 nî 4 goe̍h, Ko Chài-chiok kòe Kong-san khai-gia̍p i-seng-koán Kiàn-an I-īⁿ. Tī Kong-san ê sî, i chio Lâm-chú Kàu-hōe ê lâng oān-chō͘, tī kâng nî 12 goe̍h khai-siat liáu Kong-san Kàu-hōe.

1911 nî 4 goe̍h 21, i kap Khó͘ Bí kiat-hun. 1913 nî 6 goe̍h, Ko--sī hông kéng chò kàu-hōe ê tiúⁿ-ló.

Ko Chài-chiok tùi Tiúⁿ-ló-kàu Tiong-ha̍k kiam Lú-ha̍k, Sin-lâu Pēⁿ-īⁿ, Sèng-kiat kàu-hōe, Ji̍t-pún Chhiah-si̍p-jī-siā Chāi-hiong Kun-jîn-hōe téng kong-kiōng thoân-thé lóng ū leh kià-hū. 1928 nî 2 goe̍h 21, i siū Chóng-tok-hú Siā-hōe sū-gia̍p kong-lô-chiá ê piáu-chiong.

Chham-chiàu

• Kong-san Kàu-hōe (1937 nî 1 goe̍h). "Kò͘ Ko Chài-chiok Tiúⁿ-ló ê Sió-toān". Tâi-oân Kàu-hōe Kong-pò (622). 

Chham-khòaⁿ

• Ko Tióng