Thó-lūn:Doraemon

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋

機器貓小叮噹[kái goân-sú-bé]

機器貓小叮噹的產品

機器貓小叮噹華語:"多啦A夢"抑是"機器貓小叮噹")是一套日本báng-gah的冊名(日語:ドラえもん),小叮噹是其中一个跤數的名,故事的靈魂人物是一隻對未來轉來到現代的機器貓,伊的目的是欲共無路用的大雄鬥相共,予伊有機會出頭天,伊的後代才袂予伊牽拖著。

歷史[kái goân-sú-bé]


小叮噹原來的創作者是藤子不二雄(Huziko Huzio),上頭(1969)佇小學館的báng-gah雜誌連載,後來試改做電視báng-gah影集,1973年放送一站仔,毋過無特別受歡迎,到甲1978年才閣有朝日電視臺(テレビ朝日)重新製作新齣頭,今才佇日本大大時行起來,自1980年開始逐年出一片báng-gah電影,檢采因為時間較冗,電影的故事定定安排怹去怪奇、危險的所在冒險。

小叮噹約略佇1970年代尾期抑是80年代初期引入臺灣,佇遐特別受著國校仔學生囡仔佮意。

藤子不二雄過身了後(1996),換荻原伸一岡田康則繼續創作。

小叮噹得著第一屆(1997)的手塚治虫(Tezuka Osamu)文化賞的Báng-gah大獎。

故事人物[kái goân-sú-bé]


每一集的小叮噹會使講綴一个一定的樣行,故事的動機對主角大雄開始,伊自來荏懶閣無志氣,體育抑好、功課抑好,攏真頇顢,伊嘛不時予伊的同學技安、阿福欺負,所以講,大雄真捷去共小叮噹訴悲哀,央伊想辦法幫伊報愁抑是行撇步,小叮噹有一个新奇的"四度空間橐袋仔",內底貯足濟22世紀的未來家私抑是其他的物仔,雖罔有小叮噹好意共鬥相共,大雄見擺就毋知好收煞,致著伊的下場總是較慘。

其他的人物閣有宜靜,一个gâu讀冊,興洗身軀的查某囡仔,嘛是大雄佮意的人,技安是厝邊的鱸鰻(伊的日語原名"Zyaian"成英語giant("巨人")的音),火氣大,啊阿福是一个興展怹兜好額的阿舍。

每一篇故事攏有小叮噹提一項新家私出來,遮的家私是日常生活的物件,精差有人袂得按算的新奇作用,像講怹有一个交通工具號做takekoputa (タケコプター, "竹仔copter"),這袂輸一般囡仔𨑨迌的細个直升槳仔,啊毋過只要共戴佇頭殼頂,就會當載人四界飛。

小叮噹的日語原名來自伊愛食的,ドラ焼き (dorayaki)。

人名對照[kái goân-sú-bé]


臺灣版的小叮噹捌改名,今號做"多啦A夢",日本的名嘛綴咧改:

本名 新名 日本名
大雄 大雄 野比のび太
小叮噹 多啦A夢 ドラえもん
宜靜 靜香 源静香
技安 胖虎 剛田武 (小名 ジャイアン)
阿福 小夫 骨川スネ夫

總是,猶原袂少痟這的人慣勢舊名。

文化siōng-cheng[kái goân-sú-bé]


時代雜誌(亞洲版)的網站佇2004年提名小叮噹做"亞洲的英雄"之一,怹評論講:"...會使講日本所有的文化外銷品,無一个像這隻22世紀的貓,遐爾仔溫暖,有袂輸朋友的吸引力,兼有怪戇的人性..."

外部連結[kái goân-sú-bé]