Thó-lūn:Kok-chè chhiūⁿ-kî

國際武棋

Staunton款式的棋盤、棋子，佮計時的專用時鐘。

佇Magyar國首都Budapest的一个公園行棋。

國際武棋是一種兩人蹛枋仔頂奕的抽象策略遊戲，目的是欲掠(checkmate)對手的王，國際武棋是世界上濟人奕的枋仔遊戲(board game)，有單純咧奕tshit迌的嘛有踮俱樂部、鬥賽會(tournament)正式拚輸贏的，嘛會當經過網路、郵便、抑電子批比賽。

親像國際武棋的遊戲通世界有濟濟種款式，包括中國象棋（武棋）、日本將棋（日語：将棋）、韓國將棋(장기)、泰國的 makruk，這篇文章描寫的版本嘛號FIDE Chess、西洋棋。

國際武棋抑有人講是一種藝術、科學、用腦的武術，抑體育運動(sport)，嘛有鼓推奕武棋的人宣傳講有提升腦力的路用。

奕法

---

未曾交戰的局勢。

國際武棋佇一塊四角枋仔頂懸奕，枋仔面（棋盤）畫8逝×8欄，攏總分64格，格仔有烏有白，兩種交輪，Chhím交戰的時陣，一爿有16子：8子兵、2子馬、2子象、2子車、1子后、1子王，一子徛一格，一格干焦會使有一子，隨款棋子有伊特殊的行法（方向佮遠近），逐子就會當占對手任何一子的位（相刣），共伊取代（食子）。

一人扞白子爿，一人扞烏子，白子爿定著行代先，王直接予敵人的棋子迫脅的情形號做"將軍"(check)，予人將軍的彼爿定著隨保護王的安全，伊會當閃、閘、抑是共攻擊的棋子刣掉，無伊的法的時，就號做"將死"(checkmate)，表示輸，未將死前退出(resign)等於認輸，有一寡情形會造成和局(draw):棋盤頂無夠棋子通掠王，抑是仝局棋勢(position)重複三變，抑是行50步攏無將軍嘛無食子，抑是兩爿約定結束（號做協議和局/draw by agreemetnt).逼和(stalemate)是一種特殊的和局，王無予人將軍，siâng彼時抑無合法的步通行。

行法

---

馬行L形(2 × 1)。

逐棋子有特殊的行法，佇國際武棋，干焦馬會用得"跳過"棋子，其他攏著順空格徙位，子一步行幾仔格的時，袂使得改方向，車(rook)行橫的抑直的，無限幾格，象（佇西方號做主教）行斜的，無限格，雙爿有一對象行無仝色的，后(queen)的行法是車佮象合做伙（橫、直、斜），王(kiong)親像后，精差一步限一格爾爾，唯一的例外是當當王佮車相換位（王車相換位/castling)的時，就做一下行兩格，馬行L形的（先行兩格才閣斡正爿抑倒爿一格），干焦馬會使得跳過有徛棋子的位，馬行一步就換無仝色的格仔。

兵仔是唯一行法佮食法無仝的棋子，怹一般是一步向前行一格，頭前格定著無鎮，嘛毋准行翻頭，怹食頭前位的邊仔格的敵人，會使講是斜線爿的格仔，若準兵子原在佇本位（未振動著）閣頭前兩格攏無鎮位，就會當一步徙兩格，按呢行到敵爿邊仔的兵仔，對方會使得共食去，然後占伊"尻脊後"彼位（號做"（食）經過的"/capture en passant)；這袂輸干焦行一格若定，行到對面壁（第8逝)的兵仔定著升等變王抑兵以外的棋子（常在是揀后）。

策略佮戰術

---

現代的國際武棋強調追求位置(position)的優勢，通製造贏面，這包括緊按怎棋子踮有利的位置，予怹控制較濟關鍵的格仔，抑是較有徙位的空間自由，閣會當限制對手的選擇，欲共優勢轉做勝利，定著需要棋手計算棋步的後果，戰術的實行會當予棋手完成短期的目標，包括攻擊對手的王，防禦家己的王，消滅對手的兵力，設陷窟來艱礙步局等等。

兵力的濟少會算得：現代的算法建議后有九分，車五分，象/馬三分，兵一分，王的價值是無限的，這表示棋手凡勢願意犧牲伊的后來換一子車、一子馬，佮一子兵，總是，逐子的價值和一局棋的時空有關係，需要考慮著棋盤頂的兵力的幾何組合佮棋子佇規个長期策略裡抑短期戰術裡的角色。

開局、中局、尾局

棋手慣勢共一局棋的發展分做三坎站來分析，對原始位置開始行的前10外步號做"開局"，有數十種開局有特別號名，親像西班牙開局、西西里亞防禦，開局的目的是欲布局，特別是控制棋盤的中心地帶，保護王的安全，安插兵力蹛理想的位仔，建設堅壯的兵形(pawn structure)。

標準開局的棋步行煞就隨接"中局"，棋手會備辦棋子發動攻擊，加強防禦，抑是弱化對手的局勢，定定有相食棋子的情形，中局佮紲接的尾局之間無明顯的分界。

到甲大份的棋子相食落袋的坎站，就號做"尾局"，一般已經無夠兵力通直接攻擊敵王，遊戲的目標變成捒一子兵子到第八逝，予伊升等，一般是變后，仝時陣oan-ná預防對手捒兵升等，代先順利升等的彼爿一般穩贏。