Thó-lūn:Thiaⁿ-soeh

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋

《聽說》(《Hear Me》)是2009年翕的台灣電影。是由台灣的導演鄭芬芬佮演員彭于晏陳意涵陳妍希合作所翕出來的台灣電影。這片電影是台北市文化局資助的,題材佮2009台北聽障奧運有關係,電影佇2009年8月28號佇台灣發表。

劇情[kái goân-sú-bé]

秧秧(陳意涵演)定定佇游泳池邊仔替參加聽障奧運的阿姊小朋(陳妍希演)加油,全心全意想欲完成阿姊的理想。天闊(彭于晏演)佇一工送便當來游泳池,拄仔好去看著秧秧佮小朋用手佇講話,所以伊就過去共怹開講,伊足佮意秧秧。甚至趁送犁田的秧秧去病院的時陣共伊討MSN。

厝內開燒臘店的天闊為著欲製造兩人見面的機會,所以攏會佇賣便當了後特別留一个予秧秧,甚至家己煮湯、加料製作「愛心便當」予秧秧。秧秧誠感動,所以就講以後若是有趁錢就會提來還伊。秧秧是一个人體藝術的街頭藝人,天闊等徦秧秧表演結束了後仝齊去寧夏夜市食飯,兩人煞因為付錢時陣的誤會來冤家。小朋家己佇厝,佇睏的時陣無發現著樓頂佇火燒厝,因為按呢伊的嚨喉著傷,後來就去予人送去病院。嘛因為按呢伊有可能會失去參加聽障奧運的資格。秧秧因為這件代誌感覺足對不住怹阿姊,所以就決定無愛擱佮天闊聯絡。

天闊想欲來挽回秧秧對伊的感情,所以就想辦法來欲予秧秧歡喜,送伊玻璃水鳥的豬公,甚至來共家己扮做樹仔佇秧秧怹兜門跤口等待秧秧,但是秧秧抑是無愛共睬。小朋因為去予人取消資格,所以就走去啉燒酒,啉徦足暗才轉來。秧秧因為按呢感覺足歹勢。小朋共秧秧講伊無應該擱繼續為著伊來走傱,應該愛去逐伊家己的理想。後來秧秧恬恬佇燒臘店共錢留落來還予天闊,天闊問怹爸母敢會使接受伊佮一个聽袂著的人交往。佇爸母的答應之下,天闊馬上就去揣秧秧來講出伊的心意。

天闊佇游泳池,尻脊骿對咧聽袂著的秧秧家己佇練習表白,講欲來邀請伊來厝內予伊工課做。第二工,天闊帶秧秧來佮伊爸母見面,怹爸母就佇事先攢好的紙板仔上寫字佮秧秧溝通。才拄欲問講秧秧有願意來嫁予天闊的時陣,秧秧突然開喙講「我願意」。逐家聽了攏去予伊驚著,才知影秧秧毋是聽障,有按呢的誤會是因為秧秧當初共天闊當做嘛是聽袂著的人,所以兩人之前談了一段聽袂著的戀愛。

連去外口[kái goân-sú-bé]