Wikipedia:漢字兮用字規範

即頁未來會徙去Wikipedia hàn-jī:Hàn-jī ê iōng-jī kui-hoān

佇Holopedia，漢字兮用字規範是「本字」優先（毋過音佮義毋通傷僫臆），然後「借音」，落尾才是「訓用」。比論講 chhân、lâng、--ê，咱遮應該寫做「塍」、「儂」、「兮」，毋寫做「田」、「人」、「的」，用漢字去區別讀音。只是如果「本字」罕得用，伊兮發音予儂臆無，抑是出現歹讀兮字詞，建議用{{ruby}}來標發音，予儂知影按怎讀。其他部份參考教育部台灣閩南語常用詞辭典兮建議漢字。

和台灣教育部無仝兮用字

Chit-ūi tng-teh thó-lūn tiong, pēng m̄-sī beh che-tēng chhut chi̍t-thó choan-chè ê kui-tēng, chí-sī beh chéng-lí chhut chi̍t-thó ha̍p-lí ê iōng-jī, hō͘ tha̍k-chiá kap chok-chiá ū chi̍t-ê chham-khó. Bī-lâi chia-ê mi̍h-kiāⁿ lóng ē siá ji̍p-khì Hokkien Dictionary of Holopedia ê ia̍h-bīn lāi, hō͘ m̄-bat ê lâng khì ha̍k-si̍p, chham-khó kap pí-kàu. Chí-iàu ū khó-khò ê lâi-goân lâi chi-chhî hit-ê iōng-jī, mā hō͘ lâng sa-ū, lóng ē-sái siá tī chia; ah chòe-āu beh ēng tó-chi̍t jī, lóng sī chāi-lâng ê chū-iû.

即位當咧討論中，並毋是欲制定出一套專制兮規定，只是欲整理出一套合理兮用字，予讀者佮作者有一个參考。未來遮兮物件攏會寫入去《Hokkien Dictionary of Holopedia》兮頁面內，予毋捌兮儂去學習、參考佮比較。只要有可靠兮來源來支持彼个用字，嘛予儂捎 (sa)有，攏會使寫佇遮；啊最後欲用佗一字，攏是在儂兮自由。

beh

• 卜（beh/boeh/berh）：台灣教育部用訓讀兮「欲」，表達欲求、未來做兮動作、如果兮意思（如：欲這、欲行、若欲）。毋過「卜」因為受到福州話兮影響，嘛是佇較早南管出現的「借音字」，但是卜兮發音（文：pok、白：poh）佮今日兮 beh 已經差袂少矣。另外，「卜」佇古文也有就成兮「選擇」兮意思。
• 發 （beh/boeh/berh）：杜佳倫認為，比較「卜」ê古音佮 "beh"，因為無合歷史發音演變規則，應該毋是同源字。毋過「發」這字合歷史音變原則，而且可能對「起行」兮意思演變做「將 beh」抑是「愛」兮意思，所以主張 beh 兮字源是「發」。但是發已經有「發芽」、「出發」等意思，可能會予讀者增加區別字義个困難。

chit

• 即（chit）：「即」（chek）兮白話音，做「指稱代詞」用，比論講「即个」。教育部採用「這」即字，不過對應「che」佮「chit」即兩个音；佇《廈門音新字典》內是「即」讀「chit」佮「這」讀「che」，分工清楚，咱嘛照按呢來寫。

chiah (jû:chiah hó)

• 正 (chiah)：台灣教育部用才，毋過是訓用字，本字應該是正（比較客語：cangˇ、潮汕方言：chiàⁿ），毋過發音已經有差異。
• 即(chiah)：子力切，佮食 (tsiah)仝為職韻，其變音規則可能佮泉州腔个職韻-iak有關，佇《廈門音新字典》有收錄，佇真濟歌仔冊內嘛有使用。

ê (jû: hó--ê)

• 个（--ê）：予人掠做是本字，吳語版本嘛是用即字，毋過佮做數量詞兮「ê」（个）無法度區別。
• 兮（--ê）：台灣教育部用「的」，不過即字誠實是讀「tek」。「个」即字兮使用較早兮款，但是有可能造成解讀兮誤會。佇台灣，有真濟作家用即字做所有格兮用字，包含黃勁連兮《偓促兮城市》、《蕃薯兮歌》、周定邦兮《起厝兮工儂》、范勝雄兮《咱兮土地咱兮人》等等。所以咱遮採用「兮」（hê）即字借音，即字罕得用，是真好兮選項。
• 丌/亓/其（--ê）：台灣教育部用「的」，不過仝款，即字誠實是讀「tek」。佇《廈門音新字典》內有收錄「丌」、「亓」佮「其」即三字，攏仝款兮意思，就是所有格兮用字。閩東語版本兮漢字文章是採用「其」即字兮款。這嘛是咱會當考慮兮用字。毋過丌、亓比「兮」較罕得用；其另外有「伊」、「伊兮 (--ê)」兮意思，可能會有濟意義兮困擾。

kàu

• 遘

lâng

• 儂（lâng）：台灣教育部用「人」，不過伊也承認「儂」應該正 (chiah)是本字，吳語、閩東語版本嘛用著即字，所以咱遮就採用「儂」兮寫法。

lí

• 汝（lí/lír/lú）：台灣教育部用「你」，毋過這是替用字。《廣韻》無「你」即个字，鄭張尚芳《上古音系》認為「你」是爾、汝音變。。用「爾」會有一寡問題：
  • 代詞 lí 有三款發音，爾 (ní/jíⁿ) 無這種方言音變化，若卜推論爾是本字，會無好解說。
  • 有「而已 (jî-í)」兮意思，意義較無好區別。
  • 筆劃較濟，無好寫。

另外中古漢語中，佮「汝」發音足成 (sêng)閣仝韻母个「女」，毋但文言音相𫝛 (siâng)（攏有jú/lú），白話音兮「女」方言音變化佮方言分佈也佮「lí」足成。。共 lí 掠做是「汝」的白話音，較好說明語音兮差異。

另外「汝」是性別中立 (Gender neutrality) 兮代名詞，無英語 his/her 抑是台灣華語「你（妳）」兮問題，適合指示濟種性別以及性別認同為中性抑是無性兮儂來使用。

teh (jû: tī-teh)

• 的（teh/leh）：《廈門音新字典》掠準 teh 是「的」（tek）兮白話音，做「動詞前綴」抑是「副詞後綴」用，比論講「的行」、「的講」佮「的掃」等等。台灣教育部採用「咧」，會出現參讀做「leh」兮「語尾助詞」濫的用，所以佇咱遮即兩字分工。毋過劉建仁認為的兮中古發音兮韻母，無可能對到 -eh，按呢用誠可疑。而且「的」音佮義攏無合 teh。
• 適（teh/leh）：佇《廈荷大辭典》、《廈門音新字典》內，「適」即字文言音有佮 teh 足成兮 tek，佇《廈荷大辭典》內閣直接提來寫 teh 兮音，而且伊佇漢文內誠實有「拄仔好」兮意思，毋過劉建仁認為的（適兮中古漢語仝音詞）兮中古發音兮韻母，無可能對到現在兮 -eh，按呢用誠可疑。
• 在 (teh/leh)：劉建仁主張在兮中古音 *dzɒi（王力兮擬音）中，聲母「從」(dz)通變做 t-，韻母（咍 (hai)一等開） (ɒi) 對應甲白話音有可能是 -e，閣經過聲調兮特殊變化，正 (chiàⁿ)會變做「teh」。毋過因為在通常人攏讀「chāi」，讀做 teh 袂慣勢，而且可能兮予華語兮仝義詞「在」勾著。

kap/kah

• 及(kap/kah):台灣教育部建議用字是佮。及：其立切，佮十 (Chap)丶澀 (Siap)、粒 (Liap)、汁 (Chiap)、圾 (Sap)仝為緝韻，佮與同義為連接詞。 及另有「到達」之意，有時會共到 (Kàu)讀做 kah，可能嘛有所關係。

kan-na(ta)

• 僅單(kán-tann):台灣教育部建議用字是干焦，異用字有干單。僅：渠遴切，佮貧 (pân)、陳 (Tân)、鱗 (lân)、閩 (bân)兮韻部仝為眞，佮單仝款攏是獨獨、干焦兮意思。

pháinn

• 敗（pháinn）：台灣教育部建議用字是歹。佇客語內面，對儂失禮嘛是講「phainn-se」，毋過是寫作「敗勢 (pǎi-se)」，所以閩南語歹 (pháinn)這字“有可能”源自客家話兮敗 (pǎi)。

o-ló

• 婀娜（o-ló）：台灣教育部建議用字是呵咾。娜：如可切，本為上聲，婀娜一詞照文音讀本底着是o-ló。