Yamaguti Kinzi
Yamaguti Kinzi (山口謹爾; 1883 nî 4 goe̍h 17 ji̍t – 1931 nî 1 goe̍h 27 ji̍t[1]) sī Tâi-oân ê i-ha̍k-chiá, te̍k-pia̍t choan-bûn tī chôa-to̍k ê tiòng-to̍k kiam hiat-chheng gián-kiù.[2]
Lâi-le̍k[siu-kái | kái goân-sí-bé]
I sī Nagasaki koān chhut-sin--ê, 1904 nî tùi Nagasaki I-ha̍k Choan-bûn Ha̍k-hāu chut-gia̍p, āu--lâi chò lio̍k-kun kun-i. Lî-khui kun-tūi liáu-āu, tī Nagasaki chò i-choan kiam sè-kún kiám-cha-só͘ ê cho͘-chhiú. 1913 nî 7 goe̍h 5 ji̍t, i khai-sí chò Tâi-oân Chóng-tok-hú Gián-kiù-só͘ (1921 nî kái Tiong-iong Gián-kiù-só͘) ê ki-su. 1922 nî 10 goe̍h i kòe Au-chiu chò gián-kiù, 1923 nî tit tio̍h i-ha̍k phok-sū ha̍k-ūi.[1]
Tû-liáu i-ha̍k sū-gia̍p, i ia̍h pat ōe Se-iûⁿ-ōe Chēng-bu̍t (靜物) ji̍p-soán tē-1-hôe[3] ê Tâi-oân Bí-su̍t Tián-lám-hōe.[2]