Koan-kong
Wikipedia (chū-iû ê pek-kho-choân-su) beh kā lí kóng...
Koan-kong sī kóng lâng khì lú-hêng chò gē-niū, mā-sī chí ho̍k-bū chiah-ê lâng ê hit-ê sán-gia̍p.
[siu-kái] Lú-hêng chò gē-niū
Khì koan-kong ê lâng, hiān-chhú-sî mā tiāⁿ hông kiò-chò koan-kong-kheh. Nā chiâⁿ chē lâng khì koan-kong ê só·-chāi, tō-sī koan-kong-khu, ia̍h-sī bêng-sèng.
Ē-kha sī lâng ūi-sím-mi̍h beh lú-hêng chò gē-niū ê lí-iû:
- Ū koá lâng lú-hêng sī beh o̍h 1-ê siâⁿ-chhī he̍k-sī kok-ka ê le̍k-sú, liáu-kái khiā tī hia ê jîn-bîn kap in ê chó·-sian.
- Toà tī koâⁿ ê só·-chāi ê lâng ē siūⁿ-beh khì khah ū ji̍t-thaû ê só·-chāi hioh-khùn. Chin chē toà pak-au-chiu ê lâng ē khì Se-pan-gâ, Italia, Hi-lia̍p kap Türkiye pha̍k-ji̍t.
- Ū-ê lâng ē khì lú-hêng, lâi chò in tī khiā-khí ê só·-chāi bô-hoat-tō· chò ê tāi-chì. Chhin-chhiūⁿ Sūi-se kap Tang-kok tō ū chiâⁿ chē chhu-seh ê tē-tiûⁿ, hō· ka-tī khiā-ke hit-tah bô soaⁿ ê lâng mā ū thang khì chhu-seh.
- Ū sî-chūn lâng ē khì pa̍t siâⁿ-chhī ia̍h kok-ka khì chhoē pêng-iú ia̍h chhin-chiâⁿ.
- Koh ū lâng kan-taⁿ sī beh khoàⁿ bô-kâng ê kong-kéng.
[siu-kái] Koan-kong-gia̍p
Kap koan-kong ū tī-tāi ê sán-gia̍p ē-tàng hun-chò chin chē pō·-hūn, pí-lūn-kóng:
- Kau-thong, chhin-chhiūⁿ hui-hêng-ki, thih-ki-lō· (hoé-chhia) kap chûn.
- Toà ê só·-chāi, chhin-chhiūⁿ ho·-thé-luh, tah-iâⁿ ê tē-tiûⁿ téng-téng.
- Lim-chia̍h, chhin-chhiūⁿ chhan-thiaⁿ, ka-pi-thiaⁿ téng-téng.
