Sin Pang-kiô Chhia-chām Te̍k-tēng Choan-iōng-khu
Sin Pang-kiô Chhia-chām Te̍k-tēng Choan-iōng-khu (新板橋車站特定專用區) sī tī Tâi-oân Sin-pak-chhī Pang-kiô-khu ê chi̍t ê kok-ka tiōng-tiám kiàn-siat kè-ōe khu-he̍k, it-poaⁿ kán-chheng Sin-pán Te̍k-khu (新板特區) ia̍h Sin-chām Te̍k-khu (新站特區), khu-he̍k lāi ū choân Tâi-oân tē-it ê sêng-hêng ê sì-thih kiōng-kò͘ (Ko-thih, Tâi-thih, Chia̍t-ūn, kap Kheh-ūn) chhia-chām, bān-pêⁿ to͘-hōe kong-hn̂g kap tōa-hêng kóng-tiûⁿ, Sin-pak-chhī Chèng-hú kok kio̍k-chhù kap tiong-iong chèng-hú hat-hā ê Hêng-chèng-īⁿ Kim-iông Kàm-tok Koán-lí Úi-oân-hōe, Tì-hūi Châi-sán Hoat-īⁿ, Kau-thong-pō͘ Thih-tō-kio̍k téng pō͘-hōe chìn-chù tī chia; khu-lāi mā ū chē keng ho̍k-ha̍p-sek kò͘-bu̍t tiong-sim kap siong-tiûⁿ iáⁿ-siâⁿ, bī-lâi koh ū Tōa Tâi-pak Sin Kio̍k-īⁿ, hōe-tián tiong-sim kap koan-kong pn̄g-tiàm ê kui-ōe. Pang-kiô-khu pī tēng-gī chò Sin-pak-chhī ia̍h Tâi-pak to͘-hōe-khu sai-pêng (Tām-chúi-hô sai-hōaⁿ) ê chú-iàu to͘-sim siâⁿ-chhī kap kau-thong chhu-liú, ah Sin-pán Te̍k-khu sī siong-gia̍p he̍k-sim, bo̍k-chiân iu-goân teh chhî-sio̍k hoat-tián lâi khok-tāi hoān-ûi ê chhu-sè.