Tourette chèng-hāu-kûn

Wikipedia (chū-iû ê pek-kho-choân-su) beh kā lí kóng...
Thiàu khì: Se̍h chāmchhiau-chhoē

Tourette chèng-hāu-kûn (Hôa-gí: 妥瑞氏症; Eng-gí: Tourette('s) syndrome, Tourette Spectrum (TS), Tourette's disorder, he̍k Gilles de la Tourette syndrome) sī 1-chióng sîn-keng-ha̍k he̍k sîn-keng-hòa-ha̍k ê chiàng-gāi-pēⁿ-chèng (disorder), sī í hoat-hiān-chiá Georges Gilles de la Tourette ê miâ lâi hō--ê.

Chit-ê pēⁿ ê te̍k-cheng sī tics, 1-chióng tiông-ho̍k hoat-seng, bô-hoat-tō· khòng-chè, khoài-sok, hu̍t-jiân ê tōng-chok he̍k hoat-chhut siaⁿ-im. Chèng-chōng pau-koah kúi-á-chióng ê tōng-chok tics kap 1-ê he̍k chē-ê siaⁿ-im ê tics. Chia-ê tics tī pēⁿ tiong ū-sî m̄-koh bô-tiāⁿ kāng-sî ē hoat-seng; khah chia̍p--ê, múi-1-kang hoat-seng tics kúi-á-pái, he̍k-chiá-sī khah kú--ê, kúi-á-tang ê sî-kan lāi ū-tang-sî--á hoat-seng ū-tang-sî--á koh hó-hó; tics hoat-seng ê ūi-tì, chióng-lūi, pîn-lu̍t kap chhù-sò· ū chiu-kî-sèng ê piàn-hòa, jî-chhiáⁿ hoat-chok ê kiông-tō· ê tau̍h-tau̍h-á cheng-ka koh tau̍h-tau̍h-á kiám-chió; ta̍k-pái hoat-chok chi-kan chèng-chōng ē siau-sit kúi-lé-pài he̍k kúi-kó·-go̍eh; hoat-pēⁿ tī 18-hòe chìn-chêng, tiāⁿ-tī 5~8 hòe chhut-hiān.

Siaⁿ-im hêng ê tics nā-kā hun-lūi, ū echolalia (chhīⁿ-kông teh tiông-ho̍k pa̍t-lâng tú kóng--kòe ê ōe-gí), palilalia (kiông-pek ka-tī kóng ka-tī tú kóng--ê ōe-gí), lexilalia (bô-thang chó·-chí tiông-ho̍k kóng tú khòaⁿ/tha̍k--kòe ê gí-sû), kap siāng-gâu ín-khí gī-lūn ê coprolalia (chū-hoat-sèng lâi kóng chhut siā-hōe kìm-kī ê ōe-gí, hó-pí-kóng óe-siat ê ōe-gí kap jîn-chéng he̍k chéng-cho̍k ê khî-sī ōe-gí). Iah-m̄-koh mā-ū chiâⁿ-chē siaⁿ-im ê tics sī tī chia-ê í ōe-gí tiông-ho̍k chò kin-kù ê hun-lūi í-gōa--ê, hó-pí sī jīn-hô té-té ê siaⁿ-im, chhan-chhiūⁿ chheng nâ-âu, ka-sàu, hiⁿ-hiⁿ-haiⁿ-haiⁿ, hâⁿ-hâⁿ-hńg-hńg ê siaⁿ.

Tōng-chok hêng ê tics ū nih-ba̍k-chiu, chhèng-phiⁿ-á, chhùi-kak chhoah-tōng, tìm-thâu, iô-thâu, niú-khiau ê bīn-pō· piáu-chêng, sin-khu ngia̍uh-ngia̍uh-tāng, he̍k chò-chhut siat-thái ê tōng-chok.

Tī choan-sim chò tāi-chì he̍k tōa-khùn ê sî, tics tiāⁿ-ē toán-chiām siau-sit. Khoân-kéng in-sò· m̄-sī i -ê pēⁿ-in, m̄-koh ap-le̍k, bô-liâu, ià-lán, kap kín-tiuⁿ ē-tit ka-tāng tics ê hoat-seng pîn-lu̍t kap kiông-tō·. Saⁿ-siâng chì sì-sêng ê hōan-chiá tióng-tōa í-āu tics ē siau-sit, saⁿ-siâng ē bêng-hián kiám-chió, kî-thaⁿ saⁿ-hun-chi-it kàu sêng-jîn ia̍h-koh kāng-khoán. Chit-ê pēⁿ bōe tì-sú tì-lêng thòe-hòa, m̄-koh tiāⁿ-ē kan-jiáu tha̍k-chheh, siá-jī, siōng-khò bōe choan-sim, tì-sú sêng-chek thòe-pō·. Mā tiāⁿ-tiāⁿ ha̍p-pèng ū kî-thaⁿ ê bûn-tê, chhin-chhiūⁿ khòe-tōng-chèng, kiông-pek-chèng, iu-ut-chèng.

Io̍h-bu̍t tī-liâu chú-iāu sī sú-siōng topamine kiat-khàng-che, tùi 70-pha kàu 80-pha ê pēⁿ-tông ū-hāu. Su-jiân ū saⁿ-hun-chi-it ê hoān-chiá tōa-hàn liáu-āu chèng-chōng bōe-hó, m̄-koh in ē-hiáu siu-sì am-khàm katī ê chèng-chōng.