Má-hân

Má-hân (Hàn-jī: 馬韓; Gān-bûn: 마한) sī chi̍t ê chûn-chāi tī Tiâu-sián Poàn-tó se-lâm-pō͘ ê kó͘-chá pō͘-lo̍k liân-bêng kok-ka, hām Sîn-hân kap Piān-hân ha̍p-chheng Sam-hân. Kin-kì kì-chài, Má-hân ūi-tī Sam-hân ê se-pō͘, iû 54-ê kok-ka kiōng-tông cho͘-sêng. Má-hân ê pak-pêng hām Hàn-sù-kūn ê Lo̍k-lōng-kūn sio-chiap. Má-hân sī Sam-hân lāi siōng-kiông ê kok-ka, hō͘ Sam-hân kiōng-tông ióng-tài chiâⁿ-chò "Sîn-ông" (辰王), tēng-tō͘ Bo̍k-chi-kok (目支國), thóng-léng kui-ê Sam-hân. Má-hân lo̍h-bóe tī 4 sè-kí ê sî-chūn hō͘ lâm-hā poàn-tó ê Pek-chè siat-bia̍t.