Pang-chān:Ho͘-im ê chāi-tē-hòa piáu-kì

Wikipedia (chū-iû ê pek-kho-choân-su) beh kā lí kóng...

Pún Wikipedia ū ín chin chē gōa-gí-jī, hia-ê jī-sû bô keng-kòe Tâi-gí-hòa, to̍h ti̍t-chiap chioh-ji̍p lán ê bûn-chiuⁿ sú-iōng. Ūi tio̍h chīn-liōng hō͘ bûn-chiuⁿ ē-tàng goân-choân tha̍k-chhut Tâi-gí-im, ē-tàng lēng-gōa tī gōa-gí-jī āu-piah, kun-kù goân-gí ho͘-im, chiàu lán chāi-lâi ê im-chat kì óa-kīn ê ho͘-im.

Che tiō ná-chhiūⁿ it-poaⁿ Tâi-gí ê gōa-lâi-gí kāng-khoán, chóng-sī in-ūi bô si̍t-chè tī sè-sio̍k hō͘-lâng ēng--kòe, he̍k-chiá sī bô chham-chiàu ê lâi-goân, khah bô sek-ha̍p siat chò tê-bo̍k, kan-ta sǹg sī kiàn-gī ê ho͘-im niā-niā.

Lâng-miâ kap tē-hō-miâ, in-ūi sò͘-liōng bû-hān, bô hoat-tō͘ chin-chiàⁿ chhòng chhut kui cho͘ ê chāi-lâi-hòa hō-miâ, mā khah ha̍h chit khoán chhiú-lō͘.

Chiàu goân-gí ho͘-im lâi tàu Tâi-gí-hòa ho͘-im. (ná Ji̍t-gí gōa-lâi-gí ê goân-im-chú-gī), hong-sek siōng-bô ū nn̄g chióng khó-lêng:

  1. Ēng Hō-ló-ōe pêng-siông-sî to̍h ū leh ēng ê im-chat;
  2. Ēng sui-bóng m̄-sī pún-pún tī Hō-ló-ōe teh ēng, m̄-koh oan-á ha̍h Pe̍h-ōe-jī kui-chek ê im-chat.