Teng-ki-chèng

Teng-ki-chèng (登機證) sī chi̍t chióng thê-kiong bîn-iōng hâng-khong sêng-kheh teng-ki chèng-bêng ê phiò-chèng, thong-siông sī tī sêng-kheh pān-lí liáu teng-ki pò-tò chhiú-sio̍k liáu-āu iû hâng-khong kong-si thê-kiong. Tī teng-ki-chèng téng-thâu, chì-chió ē piau-bêng sêng-kheh sèⁿ-miâ, pan-ki hō-bé, tah-ki ji̍t-kî kap sî-kan. It-poaⁿ teng-ki-chèng sī seⁿ chò tn̂g-tiâu-chōng ê kám-jia̍t-chóa, pòe-bīn ū chû-tiâu hō͘ chū-tōng tho̍k-má-ki lâi tha̍k. Chi̍t pō͘-hūn hâng-khong kong-si (te̍k-pia̍t sī liâm-kè hâng-khong kong-si) ūi-tio̍h beh kàng-kē iōng-chóa sêng-pún, kái ēng phó͘-thong chóa lâi lia̍t-ìn teng-ki-chèng, koh ēng jī-chhù-goân tiâu-bé chhú-tāi chû-tiâu, mā kó͘-lē sêng-kheh tī hâng-khong kong-si bāng-chām téng sòaⁿ-téng pò-tò lâi chū-hêng lia̍t-ìn teng-ki-chèng.

Pō͘-hūn hâng-khong kong-si koh kā teng-ki-chèng kiam chò ki-tiûⁿ kùi-pin-sek ê iau-chhiáⁿ-khah, hō͘ thâu-téng-chhng, siong-bū-chhng ia̍h-sī kî-thaⁿ hû-ha̍p chu-keh ê lú-kheh chìn-ji̍p kùi-pin-sek sú-iōng.

To-sò͘ ki-tiûⁿ kap hâng-khong kong-si lóng ū chū-tōng tho̍k-má-ki, lī-piān tī khong-kiô ia̍h-sī teng-ki-mn̂g he̍k-tùi sêng-kheh ê teng-ki-chèng, tông-sî tho̍k-má-ki mā ē kā chu-liāu thoân-sàng khì hâng-khong kong-si ê chu-liāu-khò͘, khak-jīn sêng-kheh kám ū teng-ki iáu-koh ū i-ê hêng-lí kám ū tī hui-ki téng, thê-seng teng-ki ê hāu-lu̍t, mā pī-bián sêng-kheh chiūⁿ m̄-tio̍h hui-ki.