Thó-lūn:Bêng-tī Î-sin

明治維新

明治維新（日語：明治維新；めいじいしん）是十九世紀末期，日本所做的，有資本主義性質的全民西化佮現代化的改革運動，透過這个運動，共上尾一个幕府江戸幕府捒倒，予天皇自身來主持管理國家，改革的範圍，牽涉著中央的官制、法律制度，皇宮體制、身份階級、地方行政、金融、 貿易、產業、經濟、教育、外交佮宗教政策等等。

概略

---

明志維新是啥物時陣開始的有濟濟款講法佇咧，較下的是指日本年號改做明治彼當時，也就是1868年10月23 (舊曆9月初8)，毋過普通講明治維新的時，是指大政奉還、王政復古了後相連紲的改革，若出尾的時間，一般是掠西南戰爭結束(1877年)、內閣制度建立(1885年)、憲法體制成立(1889年)這幾个時間點上蓋濟。　

這段時間的新政府，大部份是共號做"明治政府"、"新政府"抑"維新政府"，嘛有人因為彼內底的問題，共譬相做"藩閥政府"，這款替號是因為新政府裏真濟人是薩摩藩佮長州藩的頭人，主要的問題是指明治政府的手路專制，閣中級以上的官員就真罕任用舊政府的人，權力把握佇一部份的強藩士手裡。

明治維新這个講法是昭和時代了後才變普遍的，若彼當陣的人，對大政奉還佮廢藩置縣的改革，是共叫做"御一新"。

明治維新佇短時間內底就予日本的國家力量嶄然仔提升，會當佮西國相比並，致使亞洲逐國choaⁿ-á共當做是其他改革的典範。

改革的方針

---

明治新政府的改革方針，上基本閣頭一件就是對江戶幕府，也就是徳川幕府共執政全提落來，交佇天皇手裡（大政奉還、王政復古），幕府自按呢行入歷史，閣來就是走揣方式，欲予日本通逐上歐洲佮美國等等的強國，這方面通俱體佇1868年的五箇條御誓文看出來，簡單講，就是透過合議體制、官民一體，來成做一个國家，佮拍破舊權勢，培養佮世界逐國平坐起的才調。

講著欲達成頂懸遮的目標，上捷聽著的口號是"富國強兵”佮"殖産興業"。