Thó-lūn:Tiān-náu

Wikipedia (chū-iû ê pek-kho-choân-su) beh kā lí kóng...
(Tùi 電腦 choán--lâi)
跳至導覽 跳至搜尋

電腦[kái goân-sú-bé]

電腦抑是叫計算機,是一台按照指令(程式)操作資料的機器。 大概佇1940年到1945年時,第一台有親像現代電腦的產品才發表,雖然進前已經有一寡仔概念性的產品。彼時陣的電腦真大隻,櫼甲一間大房間滿滿,食的電是現代個人電腦的幾百倍,現代的電腦因為有積體電路,毋才會當變細隻,功能嘛增加幾百萬倍。這馬,簡單的電腦會使囥入手錶,吃的電用手錶的電池就會使。講著電腦,大家想著就是個人電腦,其實上普遍使用的是嵌入式電腦,彼是用來控制其它的物件,誠濟的就是佇機械內底,譬喻講佇戰鬥飛行機、工業機器人、電子翕相機、囡仔耍物。

因為電腦有法度保存資料而且執行指令(專業用語叫:程式),使得電腦功能多變,這嘛是伊佮計算機的分別。這有數學家特別提出"邱池-杜林論題"(Church-Turing thesis)來說明,只要一台細隻電腦做會到的,那按呢其它電腦,對個人電腦到超級電腦嘛做會到,只要有時間佮保存資料的空間。

電腦的歷史[kái goân-sú-bé]


佗一台機器是上早的電腦實在真歹講,因為電腦伊的英文Computer以前的意義是隨著時代來演變,本來是講專門負責算數的人,伊手頭有一寡計算器來輔助,這款人予人叫做計算者。

現代電腦的開始是因為兩項技術:自動計算佮可程式化。

早期的計算物件譬喻講有算盤計算尺星盤(astrolabe)、安提基特拉機器(Antikythera mechanism),希臘人Hero of Alexandria設計了一个機器化的戲院,用索仔、拍結參齒輪會使連演十分鐘,這種啥物時陣愛用啥物方法來做,就是程式化的本質。

1206年由阿拉伯人Al-Jazari發明的天文鐘會使講是誠早的類比式電腦,這台會使顯示黃道帶日頭月娘的軌道,有針會振動一个自動門每點鐘來拍開,有五个娛樂機器人會表演音樂,彼是靠著連桿、突輪、水輪的連動,而且隨著日頭出來佮落山時間的改變,日時佮暗時的長度會使逐工來重新設定。

十五世紀了後,歐洲人佇機器參數學有新的發明,佇彼當時,遐濟台由歐洲人工程師做的機械計算機中,德國人Wilhelm Schickard佇1623年的機械計算機算是頭一台起步,但是無一台符合現代電腦的定義,攏無法度程式化。

1801年,法國人Joseph Marie Jacquard對織布機有了改進,伊用拍空的紙卡片來設定織布機,予伊自動來織出複雜的花樣。Jacquard的織布機是電腦發展重要的一步,因為使用拍空卡片設定織布花樣,雖然有所限制,但這是一種程式化。

頭一台有自動計算佮程式化的電腦佇1837年,英國人Charles Babbage是頭一個人,有概念並且設計會當完全程式化的機械式電腦,Charles Babbage叫伊分析機(Analytical Engine),但是因為經費佮無法堅持落去設計,Babbage實際上並無完成分析機。

1890年的美國人口普查,是頭一个大量使用拍空卡片來自動處理資料,是由美國CTR(Computing Tabulating Recording Corporation)公司的Herman Hollerith設計的製表機器,CTR公司是後來的IBM公司。到19世紀尾,一寡仔技術的出現,譬喻拍空卡片、邏輯代數、電離子真空管電報機,確實使電腦來開始實現。

佇20世紀前半段,真濟科學計算主要倚靠類比電腦,彼是依照欲算的問題,設計機械式佮電子模型來做計算的基礎,但是遮的類比電腦無法程式化,而且佮現代電腦來比,多功能變化參精度攏欠缺。

1940年代早期,部分數位電腦的特徵
產品 頭次運作 數位系統 運算機制 程式方式 Turing 完整性
Zuse Z3]] (德國) 1941年5月 二進位 電子機械 程式由拍空底片控制
Atanasoff–Berry Computer (美國) 1942年 二進位 電子 無法程式—單一目標 毋是
Colossus Mark 1 (英國) 1944年2月 二進位 電子 程式由連接線佮開關控制 毋是
Harvard Mark I – IBM ASCC (美國) 1944年5月 十進位 電子機械 程式由有24道的拍空紙帶控制 (但無法依條件分派) 毋是
Colossus Mark 2 (英國) 1944年6月 二進位 電子 程式由連接線佮開關控制 毋是
ENIAC (美國) 1946年7月 十進位 電子 程式由連接線佮開關控制
Manchester Small-Scale Experimental Machine (英國) 1948年6月 二進位 電子 預存佇Williams管的程式
Modified ENIAC (美國) 1948年9月 十進位 電子 程式由連接線佮開關控制另外加簡單的預存公式表
EDSAC (英國) 1949年5月 二進位 電子 預存佇水銀記憶體的程式
Manchester Mark 1 (英國) 1949年10月 二進位 電子 預存佇Williams管佮磁鼓的程式
CSIRAC (澳大利亞) 1949年11月 二進位 電子 預存佇水銀記憶體的程式

功能更加好而且變通的計算裝置,相連紲佇1930年代到1940年代來組裝,漸漸加入現代電腦才有的特色,使用數位電子(主要由Claude Shannon佇1937年來發明)佮更加變通程式化是重要的進展,但是真歹講誰是頭一台數位電腦,注目的成就包括:

  • Konrad Zuse的電子機械“Z機械”,Z3(1941年)是頭一台使用二位元算術,包括符點算術以及一種程式化的方法,佇1998年予人證明有Turing 完整性,所以會使講是頭一台運作的電腦。
  • 無程式化的Atanasoff–Berry Computer(1941年),使用真空管、二進位、電容記憶體。
  • 英國神祕的 Colossus computers(1943年),有限度的程式化能力,但說明講伊使用上萬的真空管,會使合理程度來重新程式,這台是用來破解二次大戰時德國的軍事密碼。
  • Harvard Mark I(1944年),一台大隻的電子機械電腦,有限度的程式化能力。
  • 美國軍方的彈道研究實驗室的ENIAC(1946年),使用十進位算術,有人講是頭一台毋是特用功能的電子電腦(自1941年的 Konrad Zuse的 Z3,用電磁代替了電子),起先因為ENIAC構造就無變通,實際上愛重寫才會當變伊的程式。

ENIAC的發展者認知機器的缺點,所以發展更加變通佮講究的設計,就是叫“預存程式構造“抑是“Von Neumann構造“。這種設計方式是由 John von Neumann提出,佇1945年的正式的報告First Draft of a Report on the EDVAC,仝時期,有真濟的專案發展電腦用預存程式方式,第一個完成是佇英國,頭一个展示運作的是Manchester小型實驗機器,是頭一個實作預存程式的設計,ESDAC佇一年後嘛完成,無落久了後,EDVAC嘛完成,不過閣另外兩年猶無法規日使用。

強欲,所有現代電腦攏有使用預存程式構造的方式,使預存程式變做電腦的一項特徵,雖然對1940年代後的頭一台電子、非特別用途的電子電腦了後,電腦的技術變咧很緊,但是大部分猶是使用von Neumann構造 。

1950年代電腦使用真空管做電子零件,到1960年代已大量予電晶體來取代,因為閣較細、較緊、較俗、食電較少而且可靠,1953年,頭一台電晶體電腦佇英國Manchester大學發表。佇1970年代,積體電路技術以及產生的微處理器,闢如Intel 4004,大大縮小電腦的寸尺、成本,而且速度更加緊佮可靠,到1980年代,電腦已經有夠細而且俗,會使取代家用電產品內底的簡單機械控制,闢如講洗衫機,同樣佇1980年代,會使看著家用電腦佮現在真普遍的個人電腦,因為網際網路Internet的發展,厝內有個人電腦已經佮有電視、電話是仝款普遍。

依技術的眼光看,現代的智慧型手機是完全程式化的電腦,也許2009年了後,伊嘛是親像電腦這陣仝款普遍。

預存程式構造[kái goân-sú-bé]


現代電腦佮別款機械無仝的所在就是伊會當來程式,也就是講會使予電腦指令(程式),電腦會先保存起來,並且佇某一个時間來執行運作。

大部分的情形,電腦指令是簡單的:加一个數字、徙囥資料的所在、送一个訊息予另外裝置等等,遮的指令由電腦記憶體讀出了後,普通按照當初保存順序來執行,但是嘛有特別指令、會叫電腦跳前抑是跳後,先去執行別位的指令,這種叫做跳躍指令(抑是分歧),而且跳躍指令,有的是照別位的計算結果,抑是因為外部事件,才判斷欲跳去佗部分,所以無仝的部分有可能被執行,真濟電腦提供子程式,彼會記得跳躍指令是對佗位來,嘛會使用另外的指令回轉而且執行下一个指令。

程式執行親像讀一本冊,人看冊時是一行一字照咧讀,但嘛會跳轉去頭前看,抑是跳過無興趣的所在,仝款矣,電腦嘛會跳倒轉而且重做指令,一直到符合結束的條件,這叫做電腦的控制流,電腦會重做指令,免人落去干涉。

來對比看,人會使用計算器,揤幾下就會使做簡單的算術,但若是欲1到1000加起來,就要揤千幾下而且厚差錯,換別種方法,電腦會使程式幾个指令就做會到,譬喻:

           mov      #0,sum        ; set sum to 0
           mov      #1,num        ; set num to 1
loop:   add       num,sum     ; add num to sum
           add       #1,num        ; add 1 to num
           cmp      num,#1000  ; compare num to 1000
           ble        loop             ; if num <= 1000, go back to 'loop'
           halt                           ; end of program. stop running

只要執行面頂的程式,電腦就會一直做加法動作,免人落去干涉,難得錯誤而且若是用現代電腦,免甲百萬分之一秒。 毋過電腦袂家己思考,伊只會依照程式指式來算問題,一個聰明的人面對頂頭的問題,會使直接用公式代入

簡單幾步嘛有正確的答案(500,500),所以講面頂的電腦程式,用一遍閣一遍加法的例,是無考慮愛有效率佮其它方案的寫法。

程式[kái goân-sú-bé]

實際上,文書處理器抑是網頁瀏覽器內底的一支電腦程式,會使對幾條指令到百萬條,現代的電腦會使一秒鐘內執行十幾億的指令,規年迵天運作閣罕咧錯誤,但大支的電腦程式是合幾若的百萬條指令,這是可能愛程式設計師用幾若年的時間落去寫,所以,規支程式講攏無錯誤嘛無啥可能。

電腦程式內底的錯誤有人直接叫伊做臭蟲(Bug),這支臭蟲可能開始執行了後對程式的功能並無影響,抑是無啥感覺的影響,但是有幾寡情況是會予程式停起來(hang),對任何輸入動作攏無反應,譬喻手揤滑鼠、鍵盤,嘛有連系統規个當機(Fail or Crash),猶有情況是有人寫一段exploit程式來故意引起,會予電腦無通正常運作。其實臭蟲並毋是電腦的過失,因為電腦只是照指令執行,臭蟲其實是程式設計者寫的錯誤,抑是佇程式設計起先的疏失。

佇大部分的電腦,指令是用機械碼的方式存起來,頭前是一个號碼數字(代表運算元),譬喻講加法的運算元是一个號碼,乘法的運算元是另外一个號碼,簡單的電腦只有幾个矣的指令,較複雜的電腦有百幾个,逐个隴有一个號碼,因為電腦會使保存數字,所以就變做會使保存指令,這就是指出一个重要的事實,規支程式會使用一堆數字來表示,而且用這一堆的數字來操作電腦的資料(資料嘛用數字來表示),電腦的預存程式用數字表示的基本觀念是von Neumann提出的要點。部分的電腦作法是將程式保存佇記憶體,有全部保存嘛有部分保存,甲伊欲運算的資料分開囥,這種是Harvard Mark I電腦的Harvard構造,現代von Neumann式電腦的設計,嘛有一寡仔用著Harvard構造的特點,譬喻講中央處理器(CPU)的快取(caches)。

早期確實有袂少電腦用一堆號碼數字(號做機械語言)寫程式,但實際上按呢寫會真煩佮無聊,尤其是複雜的程式,後來就用簡單英語字來代替嘛較好記,譬喻ADD(加)、 SUB(減)、 MULT(乘) or JUMP(跳),這種記持方法叫做組合語言(assembly language),共人寫出來的組合語言轉換做電腦捌的機械語言,彼種物件叫組合器(assembler)。機械語言佮組合語言(這兩種是較下階級程式語言)一般有家己適用的電腦,譬喻講ARM構造的電腦(PDA、囥手的影音耍物),就無法了解Intel Pentium抑是AMD Athlon 64寫佇個人電腦的機械語言。

雖然組合語言比機械語言較簡單,但是若欲寫大支的程式,嘛是歹寫閣有可能寫毋著,所以較複雜就用概論式描寫的高階級語言來寫,這較適合程式設計師的方便,順紲減少設計者的錯誤。高階級語言愛用另外一个程式來編寫做機械語言,這項物件叫做編譯器(Compiler),因為高階級程式語言比組合語言較簡單來描寫,所以有可能用無仝的編譯器來翻仝支高階級程式,嘛會使翻成無仝形式的電腦機械語言,啊這一个影音耍物內底的程式,嘛會使用佇各種形式的個人電腦、終端機。一般概稱電腦內底各種的程式叫做軟體,開發大型系統的工課,愛付出真大的腦力。照歷史的經驗,發展一个系統愛會用的、閣愛可靠、閣愛合計劃參預算是一个大挑戰,軟體工程就是為了專門處理這个問題。

舉例[kái goân-sú-bé]

準講一台電腦欲用去管十字路口的青紅燈,電腦有下跤五个指令

開(路名,燈火色) 甲佗一條路,佗一色燈火切光

關(路名,燈火色) 甲佗一條路,佗一色燈火切掉

等(秒) 等待幾秒

開始 開始程式

重來 叫電腦重來佗部份的程式

程式說明頭前用//,譬喻路名是中山路(Tiongsan)佮忠孝路(Tionghau),配合外國物程式指令部份愛用英語寫

   START
   
   //通行中山路
   OFF(Tiongsan, Red)
   ON(Tiongsan, Green)
   WAIT(60 seconds)
   
   //停止中山路
   OFF(Tiongsan, Green)
   ON(Tiongsan, Yellow)
   WAIT(3 seconds)
   OFF(Tiongsan, Yellow)
   ON(Tiongsan, Red)
   
   //通行忠孝路
   OFF(Tionghau, Red)
   ON(Tionghau, Green)
   WAIT(60 seconds)
   
   //停止忠孝路
   OFF(Tionghau, Green)
   ON(Tionghau, Yellow)
   WAIT(3 seconds)
   OFF(Tionghau, Yellow)
   ON(Tionghau, Red)
   
   //叫電腦連紲重做程式
   REPEAT ALL

用遮的指令,電腦就會予兩爿青紅燈照紅、青、黃連紲落去著。

若是有一个簡單的on/off開關連著電腦,欲用來佇維修時予青紅燈干焦爍紅燈,那按呢程式就會使寫作:

   START
   
   IF Switch == OFF then: //正常燈火運作
   {
    //通行中山路
   OFF(Tiongsan, Red)
   ON(Tiongsan, Green)
   WAIT(60 seconds)
   
   //停止中山路
   OFF(Tiongsan, Green)
   ON(Tiongsan, Yellow)
   WAIT(3 seconds)
   OFF(Tiongsan, Yellow)
   ON(Tiongsan, Red)
   
   //通行忠孝路
   OFF(Tionghau, Red)
   ON(Tionghau, Green)
   WAIT(60 seconds)
   
   //停止忠孝路
   OFF(Tionghau, Green)
   ON(Tionghau, Yellow)
   WAIT(3 seconds)
   OFF(Tionghau, Yellow)
   ON(Tionghau, Red)
   
   
   //叫電腦連紲重做本段指令
   REPEAT THIS SECTION
   }
   
   IF Switch == ON THEN: //維修狀況
   {
   //紅燈切光而且等1秒鐘
   ON(Tiongsan, Red)
   ON(Tionghau, Red)
   WAIT(1 second)
   
   //紅燈切掉而且等1秒鐘
   OFF(Tiongsan, Red)
   OFF(Tionghau, Red)
   WAIT(1 second)
   
   //叫電腦連紲重做本段指令
   REPEAT THIS SECTION
   }

用這款方式,若是開關是開矣,程式只會執行爍紅燈的指令。若是開關是關矣,程式就會執行一般狀況的指令。這兩支程式舉例是電腦程式有關青紅燈的大概寫法,任何有經驗的設計者會使指出誠濟軟體臭蟲,闢喻講程式並無確定青燈已經化去就去切紅燈予爍,但是若要除掉所有的可能的臭蟲,會予程式變誠長佮複雜,對一般讀者是真歹看,遮的舉例只是展覽電腦程式生做按怎。

電腦按怎行[kái goân-sú-bé]


一般的電腦有四大塊:算術佮邏輯單元、控制單元、記憶體、輸入/輸出裝置(有用英語簡單寫做I/O),單元之間用匯流排(bus)相接,匯流排本身是用規排電線敆做伙做的。

控制單元、算術佮邏輯單元、暫存器以及基本輸出入合稱叫中央處理單元(CPU),早期CPU是由真濟零件組起來的,到1970年代中期時CPU會使用單一个集體電路來造;叫微處理器。

控制單元[kái goân-sú-bé]

控制單元(也叫控制系統抑是中央控制器)指揮電腦的各項零件,伊讀出一个一个程式指令,而且翻譯(解碼)變做一堆控制信號,來操作電腦其他部份,佇先進電腦的控制系統會使改變部份指令的前後,來改進效能。

所有的CPU攏有一个重要零件,就是程式計數器,一塊特別的記憶體(暫存器),來記下一步指令欲對佗位讀出來。

控制系統的運作親像下跤所寫(請注意這是一个簡單的說明,而且有的CPU會幾若步做陣做抑是排列無仝)

  1. 照程式計數器指定的記憶體讀出後一个指令
  2. 解開指令的數字號碼,轉做一堆予其他系統的命令抑是信號
  3. 程式計數器進下一步,指向後一个指令
  4. 對記憶體(抑是輸入裝置)讀出指令欲要的資料;指令編碼有留資料囥的所在
  5. 提供資料予ALU抑是暫存器
  6. 若是指令需要ALU抑是特別硬體去完成,若按呢就操作硬體去完成運作
  7. 共ALU的結果寫去記憶體抑是暫存器抑是輸出裝置
  8. 跳去第一步

因為程式計數器抑是一堆記憶體,伊會使乎ALU計算結果來改變,若加100到程式計數器,就會予後一個指令欲讀的所在變閣較遠,改變程式計數器就是一般“跳位”(jumps)指令,猶有“連環”(loops)程式會重做指令,以及條件指令的執行(這兩個是控制程式流向的例)。

為著控制單元本身家己運作的順序, 這愛一支電腦程式來處理,其實一寡仔複雜的CPU設計,猶有另外一台細支電腦(微順序器(microsequencer)),會走一支程式來處理遮的代誌。

算術佮邏輯單元(ALU)[kái goân-sú-bé]

ALU是用來做兩類的工課:算術佮邏輯

一个ALU可能只會使做加、減算術,抑是閣有乘法、除法、三角函數以及平方根,也有ALU只會當處理整數無啥精度,雖然別个有用浮點來代表實數。其實任何一台電腦,會使將複雜的運算用程式化做簡單的基本步,伊按呢就有法度做,所以任何電腦會使用程式做任何算術,只是愛用較濟時間去化解ALU無支援的運算。另外ALU嘛會使比較數字大細抑是平平,甲共結果送回,就是傳回一個是“真”抑是“假”的布林值(boolean value),譬如比較:64比65大?

邏輯運算包括布林邏輯:AND、OR、XOR以及NOT,遮對複雜的條件指令佮處理布林邏輯真有用。

超大支電腦有的有幾若个ALU,所以會使仝時間處理幾若个指令。圖型處理器以及電腦有SIMD(單指令多資料)佮MIMD(多指令多資料)功能的,一般是有幾若粒ALU,遮會使處理圖型的向量佮矩陣。

記憶體[kái goân-sú-bé]

電腦的記憶體會使看做一堆的格仔(cell),伊會使匟入(寫)佮提出(讀),逐个格仔有一个數字做地址,所以電腦會使命令“共數字123囥去地址1357的格仔”抑是“ 共1357格仔的數字佮2468格仔的數字相加了匟入1595格仔”。記憶體的資料實際上會使代表萬項物,批、數字甚至電腦指令本身,因為CPU本身並無分資料的類別,這愛由軟體來看記憶體一堆數字的意義。

佇大部分的現代電腦,逐个記憶體格仔是會使囥八个二進位數字(這叫位元(byte)),一个位元就會使代表256个無仝的數字;0到255抑是-128到+127,為對囥大數字就要用幾个位元(一般是二个、四个、八个),若是欲囥負的數字,一般是用二補數記法,當然別種方式嘛會使,只是外口罕看。電腦會使囥各種資料,只要伊會使用數字的方式。現代電腦有十億抑上兆位元的記憶體。

CPU有一塊特別的記憶體格仔,彼叫做暫存器,會使予讀佮寫的動作比主要記憶體較緊。愛看CPU的款式,暫存器配兩个到一百个不一定,有暫存器會使減少逐回愛去主要記憶體讀資料,所以用佇資料不時愛提來用的所在,減少去讀主要記憶體資料(讀記憶體會比ALU佮控制單元慢)會大大增加電腦的速度。

電腦主要記憶體有分兩大種:隨機存取記憶體(random access memory,RAM)佮干焦讀記憶體(read-only memory ,ROM),CPU會使任何時間去RAM彼讀出抑寫入,但是ROM有先保存資料佮程式,而且袂使改變,所以CPU只會使對彼讀出,ROM一般是用來匟電腦開機了後啟動的指令,電腦關掉時ROM本來的資料猶會保存,但是RAM就會無去,佇PC,ROM囥一段特別的程式叫"基本輸出輸入系統"(英語簡稱BIOS(Basic Input/Output System)),逐回開機時,伊會安排電腦的作業系統對硬碟(Hard Disk)讀去RAM。佇崁入式電腦一般並無硬碟,程式攏囥佇ROM。軟體囥佇ROM內底,遮一般叫做韌體,因為較像硬體無像軟體,有一種快閃記憶體(flash memory)伊歹分是ROM抑是RAM,關機時資料會保存閣會使重新寫入資料落去(親像RAM),但是快閃記憶體速度較慢,只用佇速度無啥物要求的系統。

佇較複雜的電腦有RAM快取記憶體,伊的速度比暫存器(register)慢,但是比主記憶體緊,這種設計是為了予不時用著的資料自動徙入快取(cache)記憶體;遮一般無需要程式時愛去處理。

輸入/輸出系統(I/O)[kái goân-sú-bé]

電腦透過I/O甲外界交換資料,提供電腦輸入抑是輸出的物件叫週邊設備(peripherals),一台個人電腦伊的週邊設備包括輸入用的鍵盤佮滑鼠,輸出用的顯示器佮印表機。硬碟、軟碟佮光碟是輸入兼輸出的物件,另外電腦網路嘛是一種I/O的型式。

I/O設備有時會比伊接的電腦較複雜,一个繪圖處理器單元佮一台細支電腦比起來,為著顯示三度空間的圖,伊有50倍以上 計算能力。

多工(Multitasking)[kái goân-sú-bé]

電腦會使看做干焦走(running)一支大程式(存佇主記憶體內),但一寡系統是需要做伙走濟支的程式,這會使靠多工技術予電腦快速輪流切換程式。

方法是靠一个信號來定期拍斷電腦執行中的程式,用另外的來代替,只要記著斷去的所在,等咧就會使繼續做。仝時陣咧走濟支程式,一秒鐘內就有真濟拍斷的信號,因為現代電腦執行的速度超過人的感覺,雖然任何時間干焦一支程式咧走,但是看起來親像攏咧走,這種多工的方法叫做“時間共有”,因為每一支程式只是佔部份的時間。

會用時間共有的做法予較濟人來使用仝台電腦,是因為俗電腦的時代猶未到。

表面上,多工佇電腦中切換程式,這會了時,會比直接走幾若支程式較慢,但是大部份的程式,會有等待輸入/輸出設備的時間,假使程式咧等使用者揤滑鼠抑是鍵盤,這段是袂佔用著系統時間,一直到有動作發生,所以佇彼段時間,就有真濟的別支程式來執行,沒浪費著時間。

多處理(Multiprocessing)[kái goân-sú-bé]

幾寡電腦會將工作分予一粒抑是幾粒CPU來做,以前這是親像超級電腦、大型主機、伺服器(server)的大隻電腦才有,但是現在佇個人電腦、筆記型電腦(laptop computer)有多處理以及多核心((multi core)一塊積體電路有濟粒CPU)的愈來愈濟。

超級電腦一般有較特別的構造,這甲一般普用型的基本電腦無仝,(人因)有幾百粒的CPU,訂做成會當高速連接、特別計算的硬體,這種設計是為了特別的工作,予大支程式會當一擺使用大部份的資源,超級電腦一般會用佇大量的模擬(simulation)、圖型描畫(graphics rendering)、暗碼(cryptography)應用以及難並行(embarrassingly parallel)工作。

網路佮網際網路(internet)[kái goân-sú-bé]

佇1950年代,電腦就用來協同各地的資料,美國軍隊的SAGE系統是頭一个例,伊領頭後來足濟的特別性商業系統,親像Sabe。

佇1970年代,美國研究室的電腦工程師開始用通信的技術來連接電腦,首先是ARPA(現在叫國防高等研究計畫局(DARPA))發展出高等研究計畫署網路,簡稱阿帕網(ARPANET),有彼的技術才予網路慢慢發展散出。

慢慢仔,網路對學術佮軍隊部門散出去,變成了網際網路,這改變電腦的自然範圍,電腦作業系統佮應用系統予人改寫,會使透過網路使用別台電腦資源, 親像週邊設備、資訊等等,如同是個人電腦的延長,起初,遮的設備只佇高等技術部門使用,到1990年代應用的展開,親像電子批(e-mail)佮全球網路(World Wide Web),結合乙太網(Ethernet)、非對稱數位用戶線路(ADSL)等等俗甲緊的網路技術,網路是變甲真普遍。實際上電腦上網路是真好看著,大部份的個人電腦,一般就黏去網路接資料佮通訊,佇無線網路,時常用著手機的網路,這表示,網路化已經走到真普遍的行動網路環境。