Kó͘-chhoe
Kó͘-chhoe sī 1 chióng chú-iàu ēng tī Se-kok kó͘-tián im-ga̍k kap jazz--ni̍h ê kim-sio̍k koán-ga̍k-khì. Chit-khoán ga̍k-khì lāi-té siōng sù-siông khoàⁿ--ê sī Bb kó͘-chhoe, chit-khoán kó͘-chhoe nā pûn C chit-ê im, ē tú-hó sī piau-chún im-kuân ê Bb, só͘-í ū chit-ê miâ.
Kó͘-chhoe ê siaⁿ, sī khò pûn ê lâng tùi kó͘-chhoe-chhùi pûn-hong hoat "pu" ê siaⁿ, thàu-koè ga̍k-khì pún-sin ê kiōng-bêng thoân tò--chhut-lâi lâi ū--ê. Bô-kāng khoán-sek ê kó͘-chhoe kò͘-chō mā koh-iūⁿ, ū jí bô jí, toā ki sè ki, ū chhun-kiu siat-kè bô chhun-kiu siat-kè téng-téng, lán kí Bb kó͘-chhoe chò-lē, i ê téng-koân tō ū 3 ê jí, hō͘ pûn ê lâng thang chhi̍h, chò khòng-chè im-koân ê lō͘-iōng.
Le̍k-sú
[siu-kái | kái goân-sí-bé]Bo̍k-chêng siōng chá ê kó͘-chhoe siōng-bô sī tī se-goân-chêng 1500 nî, chhin-chhiūⁿ tī Tutankhamun ê bōng-á-po͘ lāi-té chhē-tio̍h ê chheⁿ-tâng kap gîn ê kó͘-chhoe, koh ū Skandinavia Poàn-tó ê chheⁿ-tâng Lur kó͘-chhoe, kap Tiong-kok ê kim-sio̍k kó͘-chhoe. Se-goân-chêng 3000 nî Tiong A-chiu ê Amu Darya Hô bûn-hòa ê kó͘-chhoe sī kō͘ chi̍t tè kim-sio̍k chò--ê, tiong-ng ū phok chi̍t tè--khí-lâi, sī ki-su̍t ê tu̍t-phòa.
Tī Sèng-chheh tang-tiong, saⁿ-chheng tang chêng Só͘-lô-bûn tī-teh kiàn-li̍p sèng-tiān ê sî bat sú-iōng-kòe iûⁿ-kak chò ê Shofar kó͘-chhoe kap kim-sio̍k ê Hatzotzeroth. Chiàu Kū-iok Sèng-chheh lāi-té kóng--ê, Í-sek-lia̍t-lâng tī Iâ-lī-ko-siâⁿ sì-kho͘-ûi-á se̍h la̍k kang, tī tē-chhit kang pûn chia-ê ga̍k-khì liáu-āu, Iâ-lī-ko-siâⁿ ê siâⁿ-piah tio̍h tò--ah; kàu taⁿ chi̍t-kóa chong-kàu oa̍h-tāng mā sī koh ē sú-iōng.
Salpinx kó͘-chhoe sī chhāi ti̍t--ê chheⁿ-tâng kó͘-chhoe, tn̂g-tō͘ ū 52.8 chhùn (1,600 mm), bat tī siōng chá ê Olympic pí-sài sú-iōng-kòe.
Kó͘-chhoe ê ga̍k-khek
[siu-kái | kái goân-sí-bé]Tī Se-kok kó͘-tián im-ga̍k--ni̍h, ū ūi kó͘-chhoe siá ê to̍k-chàu-khek, kau-hiáng-khek mā tiāⁿ ēng kó͘-chhoe phoāⁿ-chàu. Kó͘-chhoe tī jazz im-ga̍k iû-kî tiōng-iàu, liû-hêng-koa lāi-té mā tiāⁿ thiaⁿ ē-tio̍h kó͘-chhoe ê siaⁿ.
Kó͘-chhoe-chhiú
[siu-kái | kái goân-sí-bé]Chhut-miâ ê kó͘-chhoe-chhiú pau-koat:
Nā kā jazz to̍k-to̍k kéng chhut-lâi khoàⁿ, jazz chhut-miâ ê kó͘-chhoe-chhiú ū: