Khó͘ Hûn-ki

Wikipedia (chū-iû ê pek-kho-choân-su) beh kā lí kóng...
跳至導覽 跳至搜尋
Khó͘ Hûn-ki (1948)

Khó͘ Hûn-ki (許雲基; 1924 nî 7 goe̍h 16 ji̍t chhut-sì ) sī chi̍t-ūi Tâi-oân Tâi-tiong chhut-sin ê goân-chú-hu̍t bu̍t-lí-ha̍k ha̍k-ka. Ùi Tâi-tiong It-tiong pit-gia̍p liáu-āu, Khó͘ Hûn-ki bat chiân-óng Ji̍t-pún lōe-tē ê Kiaⁿ-to͘ Tè-kok Tāi-ha̍k kang-ha̍k-pō͘ chiū-tho̍k, pēng tī chiàn-āu choán-hôe Kok-li̍p Tâi-oân Tāi-ha̍k Tiān-ki-hē, jiân-āu ùi hia pit-gia̍p.

1947 nî, Khó͘ Hûn-ki chiâⁿ-chò Kok-li̍p Tâi-oân Tāi-ha̍k Bu̍t-lí-ha̍k-hē ê chō͘-kàu, hām Tè Ūn-kúi kap Thài-tiân Nāi-siông téng-lâng tâng-chê tī Tâi-tāi tiông-kiàn Hong-sèng Bûn-chhek thoân-tūi tong-nî tī Tâi-tāi chè-chok, bat oân-sêng sè-kài tē-jī pái jîn-kang cheng-lòng goân-chú-hu̍t si̍t-giām ê Cockcroft–Walton ka-sok-khì. Pēng sêng-kong tī 1948 nî oân-sêng liáu Tâi-oân kap chiàn-āu choân À-chiu tē-it pái jîn-kang cheng-lòng goân-chú-hu̍t ê si̍t-giām. Lo̍h-bóe, Khó͘ Hûn-ki thè-chhiú iû Thià-tiân Nāi-siông chú-chhî ê goân-chú-hu̍t si̍t-giām-sek, pēng léng-tō Tâi-oân chē-chē ki-su kái-liông si̍t-giām-sek ê siat-pī, hō͘ i chiâⁿ-chò 1960 nî-tāi À-chiu siōng-sian-chìn ê goân-chú-hu̍t si̍t-giām-sek. Lo̍h-bóe, Khó͘ Hûn-ki iû chō͘-kàu ta̍uh-ta̍uh-á seng-keh chò káng-su, hù-kàu-siū, kàu-siū, chìn-jî tī 1962 nî chiâⁿ-chò Tâi-tāi Bu̍t-lí-hē ê hē-chú-jīm. 1985 nî, Khó͘ Hûn-ki ùi Tâi-tāi Bu̍t-lí-hē thè-hiu, tī 1989 nî chiâⁿ-chò in-ê bêng-ū kàu-siū, pēng tī 2005 nî khí sut-niá tiông-kiàn goân-chú-hu̍t si̍t-giām-sek chiâⁿ-chò Tâi-tāi Bu̍t-lí Bûn-bu̍t-thiaⁿ.