Wikipedia (chū-iû ê pek-kho-choân-su) beh kā lí kóng...
Lí ê Kiáⁿ M̄ Sī Lí ê Kiáⁿ (Hàn-jī: 你的囝毋是你的囝，Hôa-gí: 你的孩子不是你的孩子)，sī chi̍t-pō͘ 2018 nî Tâi-oân Si-soán (詩選) Tiān-sī-kio̍k, ùi chok-ka Ngô͘ Hiáu-ngāu (Hàn-jī: 吳曉樂) ê kāng-miâ chok-phín lāi-bīn ê gō͘-ê kò͘-sū, hun-pia̍t sī Ma-ma ê Lī-mó͘-khòng (媽媽的遙控器), Niau ê Kiáⁿ (貓的孩子), Ba̍k-nī ê Chòe-āu Chi̍t Kang (茉莉的最後一天), Khóng-chhiok (孔雀), Pit-su Kòe-tāng (必須過動). Múi-ê kò͘-sū nn̄g-chip, choân-pō͘ chóng-kiōng cha̍p-chip, iû Tân Hūi-lêng (陳慧翎) lâi chòe tō-ián. Kò͘-sū í chhin-chú (親子) chi-kan ê hō͘-tōng (互動) chò chú-tê, tī kho-hoàn (科幻) goân-sò͘ ê pau-chong chi-hā, khau-sé (剾洗) thé-chè ē-bīn niú-khiok (扭曲)--ê chhin-chú koan-hē (親子關係) kap kàu-io̍k khùn-kéng (教育困境), gō͘-ê kò͘-sū tang-tiong ê a-bú hun-pia̍t iû Koa Sò͘-hûn (柯素雲), Cheng Him-lêng (鍾欣凌), Ún Heng (尹馨), Chiā Khiông-loán (謝瓊煖) kap Ia̍p Choân-chin (葉全真) ián-chhut. Iáⁿ-chip ēng 4K chhiau-koân ōe-chit (超懸畫質) ki-su̍t liap-iáⁿ (攝影), 2017 nî 8 goe̍h 7 ji̍t khui-kiàⁿ (開鏡). Kong-sī Chú-pîn (公視主頻) tī 2018 nî 7 goe̍h chhe-chhit àm-sî 9 tiám siú-pò͘ (首播), mā tī Kong-sī+, Netflix kap LINE TV téng tong-ji̍t (當日) keng-sin siōng sin--ê chi̍t-chip. myVideo tī 2018 nî 8 goe̍h chhe-gō͘ choân-chi̍p chiūⁿ-kè (上架). Tû-liáu tiān-sī-kio̍k, Kong-sī mā tâng-pō͘ thui-chhut kái-pian tiān-tōng Kiáⁿ-jî KIDZ (孩子 KIDZ).
Tâi-oân