Saⁿ-tè-chhù (Sam-bîn-khu)

20 sè-kí chho͘ ê tē-tô͘ lāi ê Saⁿ-tè-chhù.

Saⁿ-tè-chhù (三塊厝) sī hiān-tāi Tâi-oân Ko-hiông-chhī Sam-bîn-khu lāi-té ê chi̍t-ê só͘-chāi, sī Ko-hiông siāng chá ê ke-chhī chi it.

Tē-lí

Saⁿ-tè-chhù ūi tī leh Sam-bîn-khu lāi, Saⁿ-tè-chhù pún-sin ê ke-chhī chin chá tio̍h í-keng chhun ji̍p tâng-pêng ê Tōa-káng lāi-bīn, Tōa-káng koh kòe sī Oan-á-lāi. Tī Saⁿ-tè-chhù pak-pêng sī Lap-á-té kap Lêng-chúi (龍水), sai-pak-pêng sī Lāi-ûi, tang-lâm-pêng sī Tōa-káng-po͘ kap Chiân-kim-khu lāi ê Āu-kim (後衿) tē-hng.

Le̍k-sú

Liû-hông-chúi (硫磺水; kin-á-ji̍t ê Ài-hô) ê iân-hōaⁿ, tī Hô-lân niá Tâi-oân ê sî-kî chio̍h ū Hàn-jîn teh oa̍h-tāng. Kàu Tēⁿ-sī ê sî-tāi, in í-keng tī khe-chúi pak-pêng hoat-tián chhut Lêng-chúi kap Lê-á-té (螺仔底, Lap-á-té) nn̄g-ê chng-siā, chū-bîn chú-iàu sī sèⁿ Ông, sèⁿ Tēⁿ kap sèⁿ Chhòa saⁿ hē sī-cho̍k. Chia-ê lâng hâⁿ kòe Liû-hông-chúi lâm-pêng tùi-hōaⁿ khah bô lâng ê só͘-chāi khui-khún, tio̍h sī tī āu-lâi só͘ kóng ê Saⁿ-tè-chhù.

Sóa kòe Saⁿ-tè-chhù ê goân-in chi it sī Liû-hông-chúi hit-pêng thó͘-tē khah bô sek-ha̍p chhèng-choh, tian-tó lâmg-pêng Saⁿ-tè-chhù-khe iân-hōaⁿ khah hó chèng mi̍h. Ông--sèⁿ chiàm Saⁿ-tè-chhù tang-pêng ê Kiô-thâu (橋頭) khiā-khí, tī tang-pak-pêng choh-sit; Chhòaⁿ--sèⁿ chiàm lâm toāⁿ ê Hái-kîⁿ (海墘), chhân-hn̂g oa̍h sai-pak-pêng; nā Tēⁿ--sī sī tòa tī sai-pak-pêng, koh tī sai-pêng chèng-chhân.

Chham-khó

• 鄭景仁 (2008). 高雄市三塊厝地區空間變遷之研究 (sek-sū thesis). 樹德科技大學 建築與古蹟維護研究所.