Tâi-oân-séng Chham-gī-hōe

Tâi-oân-séng Chham-gī-hōe (臺灣省參議會) sī Tâi-oân-séng Gī-hōe ê chiân-sin, chiàn-āu chho͘-kî Tâi-oân-séng ê chòe-ko bîn-ì ki-koan. 1946 nî 5 goe̍h 1 hō sêng-li̍p, 1951 nî 12 goe̍h hòe-chí. Chham-gī-hōe siat tī Tâi-pak-chhī Lâm-hái-lō͘ kap Choân-chiu-lō͘ oat-kak-á ê Goân Tâi-oân Kàu-io̍k Hōe-koán.

Chiàu 1945 nî siu-tēng liáu-āu ê Séng-chham-gī-oân Soán-kí Tiâu-lē (省參議員選舉條例) ê kui-tēng, séng-chham-gī-oân thàu-kòe kàn-chiap soán-kí hong-sek sán-seng, iā chiū sī iû kok koān-chhī chham-gī-hōe ê chham-gī-oân lâi tam-jīm soán-kí-jîn. Goân-té kui-tēng múi koān-chhī kan-na ē-tàng soán-kí 1 lâng, āu-lâi keng-kòe Tâi-oân-séng Hêng-chèng Tióng-koaⁿ Kong-sú thêng-pò Kok-bîn Chèng-hú he̍k-chún liáu-āu, chiàu jîn-kháu tiâu-chéng. 1946 nî 4 goe̍h 15 hō, choân séng 17 koān-chhī chóng-kiōng soán chhut tē-it-kài séng-chham-gī-oân 30 lâng, koh ka-siōng āu-lâi tiong-iong lîn-soán 6 lâng, kap cheng-gia̍h ê soann-tē-che̍k séng-chham-gī-oân 1 lâng, lóng-chóng hoat-tēng miâ-gia̍h 37 lâng.