Tâi-pak Tōa-kī-tàn

Tâi-pak Tōa-kī-tàn, 2019-nî hip.

Tâi-pak Tōa-kī-tàn, koh hō-chò Tâi-pak Tōa-lia̍p-nn̄g, Tâi-pak Tōa-kiong-téng, Tâi-pak Tōa-îⁿ-tiâⁿ..., sī ūi-tī Tiong-hôa Bîn-kok Tâi-pak-chhī Sìn-gī-khu ê sek-lāi iá-kiû-tiûⁿ, siōng chē ē-tàng hō͘ 59,833 ê koan-chiòng ji̍p--khì (ū 40,575 ê ūi, tān-sī iá-kiû pí-sài siōng-chē kan-na ē-tàng khai-hòng 40,071 ê), ūi-tī Kok-hū Kì-liām-koán piⁿ-á. Tōa-kī-tàn mā-sī choân Tâi-oân tē-it-ê sek-lāi ê iá-kiû-tiûⁿ, só͘-í siū-tio̍h bē-chió ê koan-chù.

1991-nî 11-goe̍h 10-hō, bān-gōa ê koan-chiòng tī Tâi-pak Chhī-li̍p Iá-kiû-tiûⁿ beh khòaⁿ 1991-nî Tiong-hôa Chit-pāng Chóng-koan-kun-sài tē-7-tiûⁿ Bī-choân Liông tùi Thóng-it Sai ê pí-sài, hit-sî ê hêng-chèng-īⁿ īⁿ-tiúⁿ Hok Pek-chhunmā tī lāi-té; bô-gî-ngō͘ hit-àm lo̍h-tōa-hō͘ bē-sái phah, Tiong-hôa Chit-pāng soan-pò͘ pí-sài iân-kî. Hiān-tiûⁿ ê koan-chiòng chū-àn-ne khai-sí hoah "Hok-īⁿ-tiúⁿ, goán siūⁿ-beh kī-tàn!"

Tōa-kī-tán tī 2012-nî 4-goe̍h 17 khí-kang, 2023-nî 10-goe̍h 20 oân-kang, 2023-nî 12-goe̍h 2-hō khé-iōng, Tiong-hôa Chit-pāng tùi 2024-nî sài-kùi khai-sí tī Tōa-kī-tàn pí-sài.