Thóng-it 7-ELEVEn Sai

Thóng-it Sai

Thóng-it 7-ELEVEn Sai sī Tiong-hôa Chit-pāng ê chhòng-sí kiû-tūi chi-it, mā-sī bo̍k-chêng ûi-it chi̍t-ê tùi Chit-pāng goân-nî kàu-taⁿ lóng bô bē-tiāu, m̄-bat kái-sàn kòe ê goân-ló kiû-tūi. Tī chit-pāng chhòng-li̍p ê sî-chūn, i ê choân-miâ hō-chò Thóng-it Sai, tī 2008-nî Thóng-it Khì-gia̍p ūi-tio̍h beh kā in kî-hā ê 7-ELEVEn chhiau-siong khǹg-tī saⁿ téng-koân, sûi kā tūi-miâ kái-chò chit-má ê Thóng-it 7-ELEVEn Sai. Thóng-it ê chú-tiôⁿ tī Tâi-lâm, tāi-piáu-sek sī kam-á-sek, kòe-khì chheⁿ-sek mā sī Thóng-it Sai ê tāi-piáu-sek chi-it, 2017-nî khai-sí tio̍h khah hán-tit iōng chheⁿ-sek--ah. Thóng-it sī Tiong-hôa Chit-pāng thâu-chi̍t-ê iâⁿ-kiû ê kiû-tūi, mā-sī bo̍k-chêng iâⁿ siōng-chē, sèng-lu̍t siōng koân, chham-ka kùi-āu-sài siōng-chē kái, choân-lúi-táⁿ siōng chē, tit-tio̍h siōng-chē Tâi-oân Tōa-sài koan-kun ê kiû-tūi.