Thó-lūn:Iô-kún-ga̍k

搖滾樂

搖滾樂是1950年代中期佇美國出現的流行音樂款式，原底的英文寫做Rock and Roll抑是Rock'n'Roll， 這个詞一般的欲說明原起頭，是用"搖" (rock)佮"輾/滾" (roll)來表現音樂的起落佮嘹拍，毋過窮實這本底是美國烏人的俗語，意思是性交或者是跳舞。

Rock and Roll嘛簡省講Rock，這个講法自搖滾樂拄起基的時陣就有人咧用矣，1960年代Rock的講法變普遍，Rock and Roll顛倒較罕講，總是現此時兩種攏猶有咧使用。

搖滾樂已經湠去美國以外的所在，不止仔時行，後來產生濟濟分支，總號名來講，普通叫做rock(滾石)， 搖滾樂四常有歌詞，板嘹基本上是加強後拍位的布基烏基(boogie-woogie)藍調(bu-lù-suh)，強拍差不多攏有lang鼓 (snare drum)的鼓聲。

古典的搖滾樂演奏，有一枝抑兩枝電gí-tah(gitar)， (一枝chhoā頭，一枝做板嘹)，一枝下音電gí-tah佮一組鼓，Khí-bó͘(keyborad)嘛定加入來做伙，若1950年代早期的搖滾樂，較捷用薩克斯風chhoā頭，到1950年代中期才予gí-tah替換去，閣較早期，佇搖滾樂發祖的款式裡，鋼琴才是chhoā頭的樂器，事實上搖滾樂的根底是1940年代佇美國音樂占頭位的布基烏基(boogie-woogie)鋼琴演奏。

搖滾樂差不多佇全世界攏受著歡迎，也自按呢對社會有嶄然大的影響，伊已經毋是單純的音樂款式，進一步的，伊影響咱的生活方式、時行姿勢、態度佮語言。