To̍k-phín

To̍k-phín (毒品) sī tùi chi̍t kóa khah tiāⁿ chō-sêng giàn-phiah ia̍h sī it-poaⁿ jīn-ûi tùi lâng iú hāi ê io̍h-bu̍t ia̍h kî-tha hòa-ha̍k chè-phín chhām thian-jiân bu̍t-chit ê kóng-hoat. "To̍k-phín" chit-ê Hàn-jī-sû chú-iāu sī thong tī Hôa-gí tē-khu, chiàu-jī ê ì-sù sī "ū to̍k ê mi̍h".

Hoat-lu̍t tēng-gī

Tī Tiong-hôa Jîn-bîn Kiōng-hô-kok kap Tiong-hôa Bîn-kok ê hoat-lu̍t ū tùi "to̍k-phín" chit jī chò choan-bûn ê tēng-gī.

Nā chiàu Tiong-hôa Jîn-bîn Kiōng-hô-kok Hêng-hoat, to̍k-phín sī chí "a-phiàn, heroin, methamphetamine, mô͘-hui, tōa-bâ, cocaine kap kî-tha chiàu kok-ka kui-tēng koán-chè thang hō͘ lâng sán-seng giàn-phiah ê bâ-chùi io̍h-phín kap cheng-sîn io̍h-phín." In lēng-gōa tī Bâ-chùi io̍h-phín kap cheng-sîn io̍h-phín phín-chióng bo̍k-lio̍k (麻醉药品及精神药品品种目录) khai-lia̍t 121 chióng bâ-chùi io̍h-phín kap 130 chióng cheng-sîn io̍h-phín.

Bô siū hoat-lu̍t kìm-chí ê to̍k-phín

Chi̍t kóa liâm-che tī siā-hōe siōng ū hông tòng chò "to̍k-phín" sú-iōng, chia ê bu̍t-chit pún-sin tī hoat-lu̍t siōng it-poaⁿ sī bô te̍k-pia̍t siū kìm-chí--ê. Pí-lūn nā chiàu Tâi-oân si̍t-si ê Tiong-hôa Bîn-kok hoat-lu̍t lâi kóng, phīⁿ "kiông-le̍k-ka" (強力膠 qiánglìjiāo) chò bê-hûn-io̍h lō͘-ēng ê hêng-ûi ū khó-lêng siū Siā-hōe Tì-sū Ûi-hō͘-hoat (社會秩序維護法) hoa̍t-chîⁿ; che sī tùi hêng-ûi ê koán-chè, m̄-sī tùi mi̍h-kiāⁿ ê kìm-chí.

Siong-koan

• Io̍h-bu̍t ê kìm-chí
• Bâ-io̍h