Lô Chong-lo̍k

Lô Chong-lo̍k

Lô Chong-lo̍k (羅宗洛; 1898 nî 8 goe̍h 2 hō – 1978 nî 10 goe̍h 26 hō) sī chi̍t ūi Tiong-kok si̍t-bu̍t seng-lí-ha̍k-ka, kàu-io̍k-ka.

Seng-pêng

Chá-nî

Lô Chong-lo̍k tī Chheng-kok Chiat-kang-séng Hông-giâm-koān chhut-sì, siáu-liân sî-chūn khì Ji̍t-pún liû-ha̍k, 1930 nî the̍h-tio̍h Pak-hái-tō Tè-kok Tāi-ha̍k ê lông-gia̍p phok-sū. Tńg-khì Tiong-kok liáu-āu, tī Kok-li̍p Tiong-san Tāi-ha̍k, Kok-li̍p Kì-lâm Tāi-ha̍k, Kok-li̍p Tiong-iong Tāi-ha̍k ê kàu-siū.

Jīm-chit Tâi-tāi

1945 nî, Jī-chiàn kiat-sok, Tiong-hôa Bîn-kok chiàm-niá Tâi-oân. Lô Chong-lo̍k tāi-piáu Tiong-hôa Bîn-kok Kok-bîn Chèng-hú Kàu-io̍k-pō͘ khì Tâi-oân chiap-siu Tâi-pak Tè-kok Tāi-ha̍k, chò Kok-li̍p Tâi-oân Tāi-ha̍k thâu chi̍t jīm hāu-tiúⁿ. Āu-lâi Lô Chong-lo̍k ê lí-liām kah téng-si sio-ke̍h, koh ū hāu-bū keng-hùi bô-kàu-gia̍h ê būn-tê, i chū-án-ne tī 1946 nî 5--goe̍h lī-chit, tńg-khì Tiong-kok Siōng-hái ê Tiong-iong Gián-kiù-īⁿ Si̍t-bu̍t-ha̍k Gián-kiù-só͘ chò só͘-tiúⁿ.

Tiong-hôa Jîn-bîn Kiōng-hô-kok sî-kî

1948 nî Lô Chong-lo̍k Tiong-iong Gián-kiù-īⁿ tē-1-kài īⁿ-sū, bô goān-ì koh tòe Pò͘ Su-liân khì Tâi-oân, lâu tàm Siōng-hái gêng-chiap Tiong-hôa Jîn-bîn Kiōng-hô-kok kiàn-li̍p. 1953 nî tiû-kiàn Tiong-kok Kho-ha̍k-īⁿ Si̍t-bu̍t Seng-lí-ha̍k Gián-kiù-só͘, chò thâu-chi̍t-jīm só͘-tiúⁿ. 1955 nî tòng-soán Tiong-kok Kho-ha̍k-īⁿ tē-1-kài īⁿ-sū.

Bûn-hòa Tāi Kek-bēng kî-kan, Lô Chong-lo̍k hŏng hām-hāi, chē-kaⁿ 6 tang, koh hŏng chhú-hoa̍t, chò lô-tōng kái-chō.

1978 nî, Lô Chong-lo̍k tī Siōng-hái ê Tiong-san Pēⁿ-īⁿ pēⁿ-sē.

Chham-khó chu-liāu

• 李東華、楊宗霖編，《羅宗洛校長與臺大相關史料集》，國立台灣大學出版中心，2007年，台北市